ސަރުކާރު ތެރެއިން ބަޣާވާތެއް ކުރަން އުޅޭ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފައްޔާޒު ވިދާޅުވީ، ރާއްޖޭގައި މާލީ ބަޣާވާތެއް ހިންގަން އުޅުނު ކަމަށް ރައީސް ޑރ. މުޙައްމަދު މުއިއްޒު ރޭ ދެއްކެވި ވާހަކަފުޅުތަކަކީ އެއްގޮތަކަށްވެސް ދައްކައިގެންވާނެ ވާހަކަތަކެއް ނޫން ކަމަށެވެ.
ފައްޔާޒު އިތުރަށް ވިދާޅުވީ، ޑޮލަރު ލިމިޓް މައްސަލައިގައި ބޭންކް އޮފް މޯލްޑިވްސް (ބީއެމްއެލް)ގެ ޑިރެކްޓަރުންގެ ބޯޑުން ނިންމި ނިންމުން އާންމުކުރި ވަގުތާއި، އެމްޑީޕީން ބޭއްވި ނޫސްވެރިންގެ ބައްދަލުވުމަކީ ރާވައިގެން ކުރި ކަމެއް ކަމަށް ބުނާނެ ޖާގައެއް ނެތް ކަމަށެވެ. އެމްޑީޕީގެ ނޫސްވެރިންގެ ބައްދަލުވުމަކީ މާ ދުރާލައި އިޝްތިހާރުކޮށް، އޮންނާނެކަން އަންގައިގެން ތައްޔާރުވެގެން ބޭއްވި ބައްދަލުވުމެއް ކަމަށް އޭނާ ފާހަގަކުރެއްވިއެވެ.
ބޭންކުގެ ނިންމުމަކީ ބަޣާވާތެއްގެ ގޮތުގައި ސަރުކާރުން ސިފަކުރަން އުޅުނު އުޅުމުން ހާމަވާ އެއް ކަމަކީ ސަރުކާރު ތެރޭގައި ގޯސްތަކެއް އޮތްކަން ކަމަށް ފައްޔާޒު ވިދާޅުވިއެވެ. އަދި ފެންނަނީ ސަރުކާރުން އަމިއްލައަށް ބަޣާވާތެއް ކުރަން ރާވާ ތަން ކަމަށްވެސް އޭނާ ފާހަގަކުރެއްވިއެވެ.
އަދި އޭގެ އިތުރުން އަޅުގަނޑުމެންނަށް ފާހަގަވާ އެއްކަމަކީ އެ ބޭފުޅުންގެ އެތެރޭގައި ގޯސްތަކެއް އުޅޭކަން. އެ ބޭފުޅުންގެ އެތެރޭގައި ގޯސްތަކެއް އުޅޭކަން، އަމިއްލައަށް ކުރިއަށްހުރި ދުވަސްތަކުގެ ތެރޭގައި ބަޣާވާތެއް ކުރާތަން ފެންނަނީ.
ފައްޔާޒު ވިދާޅުވިއެވެ.
ފައްޔާޒު އިތުރަށް ވިދާޅުވީ، ރައީސް ޑރ. މުޙައްމަދު މުއިއްޒު ހިމެނޭހެން ސަރުކާރުގެ ވެރިން ބީއެމްއެލްގެ ނިންމުމާ ގުޅޭގޮތުން ދެއްކެވި ވާހަކަފުޅުތަކަކީ މާލީ ނިޒާމު އެއްކޮށް ފުނޑޭވަރުގެ ވާހަކަތައް ކަމަށެވެ. މިއީ ބީއެމްއެލްއާ މެދު ބައިނަލްއަޤްވާމީ އިދާރާތަކާއި ބޭންކުތަކުން ކުރާ އިތުބާރު ގެއްލޭނެ ކަމެއް ކަމަށްވެސް އޭނާ ފާހަގަކުރެއްވިއެވެ.
މި މައްސަލައާ ގުޅިގެން ފުލުހުން ވަނީ ތަޙުޤީޤު ފަށައިފައެވެ. އަދި ބީއެމްއެލްގެ ޑެޕިއުޓީ ސީއީއޯ، އައިޝަތު ނޫރައްދީން ވަކިކޮށްފައިވާ ކަމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ސިޓީ ފޮނުވާފައިވަނިކޮށް، އޭނާ ވަނީ މިއަދު ހެނދުނު އެ މަޤާމުން އިސްތިއުފާ ދެއްވައިފައެވެ.
