ރައީސް މުއިއްޒު ފާޚާނާތެރެއަށް ވެއްޓިވަޑައިގެން ލިބިވަޑައިގެންނެވި އަނިޔާއަކަށް ހޮސްޕިޓަލުން ފަރުވާ ހޯއްދަވާފައިވާކަމަށް ސޯޝަލް މީޑިއާގައި އަޑު ފެތުރިފައިވަނިކޮށް، ހޮސްޕިޓަލުން ފަރުވާ ހޯއްދެވީ ފުޓުބޯޅަ ކުޅުއްވަމުން ދަނިކޮށް ލިބިވަޑައިގަތް އަނިޔާއަކާ ގުޅިގެން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު އާރަށު ފާޚާނާގެ ތެރެއަށް ވެއްޓިވަޑައިގަތުމުގެ ސަބަބުން ހޮސްޕިޓަލުގައި ފަރުވާ ހޯއްދެވި ކަމަށް ބައެއް ފަރާތްތަކުން ދެއްކި ވާހަކަތަކަށް ރައީސް ޖަވާބު ދެއްވައި، މިރޭވަނީ ހަޤީޤަތް ސާފުކޮށްދެއްވާފައެވެ.
ރައީސް ވިދާޅުވި ގޮތުގައި އެމަނިކުފާނަކީ މާ ބޮޑަށް ކުޅިވަރު ކުޅުއްވާ ބޭފުޅަކަށް ނުވިނަމަވެސް، ހަފުތާއަކު ތިން ދުވަހު އާރަށުގައި ހުންނަ ދަނޑުގައި ފުޓުބޯޅަ ކުޅުއްވަން މަސައްކަތް ކުރައްވާކަމުގައެވެ. އެގޮތުން، އެންމެ ފަހުން ކުޅުއްވި ރޭ ވެވަޑައިގަތް ގޮތަކުން އަނިޔާއެއް ލިބިވަޑައިގަތް ކަމަށް ވިދާޅުވިއެވެ.
މިރޭ ސިންގަޕޫރަށް ވަޑައިގަންނަވަނީވެސް މި އަނިޔާގެ ފަރުވާއަށް ކަމަށް ރައީސް މުއިއްޒު ހާމަކުރެއްވިއެވެ.
މި ދެންނެވި އިންޖަރީ ވެގެން މާލޭގައި ޑޮކްޓަރުންނަށް ދައްކާފައި ސެކަންޑް އޮޕީނިއަންއަކާ އަދި ކުރީގައި މީގެ ދެތިން އަހަރު ކުރިން ކުރި ސާޖަރީއެއްގެ ރެގިއުލާ ޗެކަޕް ވެސް އޮތުމާ އެކީގައި މިރޭ އެބަ ދަން ސިންގަޕޫރަށް.
ޕީއެންސީގެ ހަރުގޭގައި ބޭއްވި ޖަލްސާގައި ރައީސް މުއިއްޒު ވިދާޅުވި އެވެ.
