ފައިސާ ކާޑުން ރާއްޖެއިން ބޭރުގައި މުއާމަލާތް ނުކުރެވޭގޮތް ހެދުމަށް ބީއެމްއެލްއިން ނިންމި ނިންމުން ބަދަލު ކުރުމަށް ބޭންކުން އަލުން ނިންމިކަމަށް މީޑިއާގައި އަޑު ފެތުރިގެން ދިއުމާއެކު އެފަދަ ނިންމުމެއް ވެގެންދާނީ ގޯސް ނިންމުމަކަށް ކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބީއެމްއެލްއިން ވަނީ ރާއްޖެއިން ބޭރުގައި ބޭނުންކުރެވޭ ކާޑުތަކުގެ ލިމިޓަށް ބަދަލުތަކެއް ގެނެސްފައެވެ. ނަމަވެސް އެކި ފަރާތްތަކުން މިކަމާމެދު ނުރުހުން ފާޅުކުރަމުންދާތީ، މި ނިންމުން އަނބުރާ ގެންދިއުމަށް ބޯޑު ބައްދަލުވުމެއް ބޭއްވުމަށް ހަމަޖެހިފައިވާކަމުގެ މަޢުލޫމާތު މީޑިއާގައި ވަނީ ފެތުރިފައެވެ.
މި މައްސަލައާ ގުޅިގެން ރައީސް ނަޝީދު ކުރެއްވި ޕޯސްޓެއްގައި، ބީއެމްއެލްގެ ނިންމުމަށްވުރެ އެ ނިންމުން އަނބުރާ ގެންދިއުމަށް ނިންމުން ގޯސްކަމަށް ވިދާޅުވެފައިވެއެވެ.
ބީއެމްއެލްއިން ނެރުނު ބަޔާނުގައި ބުނެފައިވަނީ، ކާޑުތަކުން ކުރެވޭ ބޭރުގެ މުޢާމަލާތްތަކުގެ އަދަދު އިތުރުވަމުންދިޔަ ނަމަވެސް، ބޭންކަށް ލިބޭ ބޭރު ފައިސާގެ އަދަދު ހުރީ އެއް މިންވަރެއްގައި ކަމަށެވެ. އެހެންކަމުން، މި ބަދަލުތައް ގެނައުމަށްފަހު ވަގުތުން ފެށިގެން އެއަށް ޢަމަލުކުރަން ފެށުމަށް ނިންމާފައިވާ ކަމަށް އެ ބަޔާނުގައި ބަޔާންކޮށްފައިވެއެވެ.
