މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ނަމުގައި ސްކޭމެއް ހިންގަމުންދާކަން ފާހަގަކުރެވި، އެކަމަށް ސަމާލުވާން ޔުނިވަރސިޓީން އެދިއްޖެއެވެ. އެމްއެންޔޫއިން ހާމަކޮށްފައިވާ ގޮތުގައި، ސްކޭމް ހިންގަމުންދަނީ ޔުނިވާސިޓީން ހިލޭ އޮންލައިން ޑިގްރީ ކޯސްތަކެއް ހިންގާކަމަށް ބުނެ އެވެ.
ސްކޭމަރުން ޝާއިޢުކޮށްފައިވާ ޕޯސްޓުގައި ބުނެފައިވަނީ އެމްއެންޔޫގައި ހިލޭ ޑިގްރީ ކޯސްތައް ހިންގަނީ 18 އަހަރާއި 35 އަހަރާ ދެމެދުގެ މީހުންނަށާއި، 35 އަހަރާއި 45 އަހަރުގެ މީހުންގެ އިތުރުން 55 އަހަރުން މަތީގެ މީހުންނަށް ކަމަށެވެ. ނަމަވެސް، އެމްއެންޔޫއިން ވަނީ މިއީ ސްކޭމެއްކަން ކަށަވަރުކޮށްދީ، ރައްޔިތުން މިކަމަށް ސަމާނުވުމަށް އިލްތިމާސްކޮށްފައެވެ.
އެމްއެންޔޫއިން އާންމުންނަށް އަންގާފައިވަނީ ކޯސްތަކާބެހޭ މަޢުލޫމާތު ހޯދުމަށާއި ކޯސްތަކަށް އެޕްލައިކުރުމަށް ޔުނިވާސިޓީގެ ރަސްމީ ވެބްސައިޓް މެދުވެރިކޮށް މަސައްކަތްކުރުމަށެވެ.
