ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވުމުގެ ތުހުމަތުގައި ހައްޔަރުކުރި ކަރެކްޝަންސްގެ 13 އޮފިސަރުންގެ ތެރެއިން ފަސް އޮފިސަރެއްގެ މައްޗަށް ދައުވާކޮށްދިނުމަށް އެދި ޕްރޮސެކިޔުޓަރ ޖެނެރަލް (ޕީޖީ) އޮފީހުން ކްރިމިނަލް ކޯޓަށް އިއްޔެ ހުށަހަޅައިފިއެވެ.
ޕީޖީ އޮފީހުން ބުނެފައިވަނީ ކަރެކްޝަންސްގެ މުވައްޒަފުންތަކެއް، ވަޒީފާގެ ވާޖިބުތަކާ ޚިލާފުވެ، ވަޒީފާގައި ތިބެގެން ހުއްދަ ނޫން ކަންކަމުން މަންފާ ހޯދާ، ފައިސާގެ މުޢާމަލާތްކޮށްފައިވާކަމަށް ތުހުމަތު ކުރެވޭ މައްސަލައެއް ފުލުހުން ތަޙްޤީޤުކޮށް އެ އޮފީހަށް ހުށަހަޅާފައިވާ ކަމަށެވެ.
މިދިޔަ ޖޫން މަހު ބޭއްވި ނޫސްވެރިންގެ ބައްދަލުވުމެއްގައި ފުލުހުން ހާމަކޮށްފައިވާ ގޮތުގައި، ކަރެކްޝަންސްގެ ދަށް ލެވެލްގެ 18 އޮފިސަރެއްގެ އެކައުންޓަށް ޝައްކު ކުރެވޭ 73 މިލިއަން ރުފިޔާ ޖަމާކޮށްފައިވެއެވެ. މި ފައިސާ އެ އޮފިސަރުންގެ އެކައުންޓްތަކަށް ޖަމާކޮށްފައިވަނީ ޖަލުގައި ތިބި ގައިދީންނާއި އެ މީހުންނާ ގުޅުން ހުރި މީހުންގެ އެކައުންޓްތަކުންނެވެ. މި މައްސަލައިގައި ޝާމިލްވާކަމަށް ބެލެވޭ 13 މީހަކު ހައްޔަރުކޮށް، އެ މީހުންގެ ވަނަވަރު ވަނީ އާންމުކޮށްފައެވެ.
އެ މައްސަލައިގައި ދައުވާ ކުރަން ފޮނުވި 5 މީހުންގެ މައްޗަށް ވެސް ރަސްމީ ހައިސިއްޔަތު ނަހަމަ ގޮތުގައި ބޭނުން ކުރި ކަމުގެ ދައުވާ އުފުލައިދިނުމަށް އެދިފައިވެއެވެ. ދައުވާ އުފުލަން ފޮނުވި ފަސް މީހުންގެ ތެރެއިން ޖިނާހު އަބްދުއްރަހީމް، އައިވަރީ ހައުސް/ރ.އުނގޫފާރު އަދި އަލީ ހިޝާމް، ބީޗްހައުސް/ ކ.މާފުށި މި ދެމީހުންގެ މައްޗަށް ތިން ދައުވާއެއް ކުރަން ވަނީ ހުށަހަޅާފައެވެ. އެއީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ، މަނީ ލޯންޑްރިންގެ ކުށުގެ ދައުވާ، އަދި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާއެވެ.
މީގެ އިތުރުން އެ މައްސަލައިގައި ދެން ދައުވާ ކުރަން ފޮނުވީ އަލީ ނާޒިމް، ތަރާނާގެ/ހދ. ނޭކުރެންދޫ، މުހައްމަދު ފަތޫހު އަބްދުﷲ، ކުއްޅަވައްގެ/ގއ. ވިލިނގިލި، އަދި އަލީ އަޝްފާގު، ކާމިނީގެ/ނ.ލަންދޫ އެވެ. މި ތިން މީހުންގެ މައްޗަށް ދެ ދައުވާއެއް ކުރަން ވަނީ ހުށަހަޅައިފައެވެ. އެއީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އަދި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާއެވެ.
ޕީޖީ އޮފީހުން ބުނެފައިވަނީ، މި މައްސަލައިގައި ތުހުމަތުކުރެވޭ އިތުރު މީހުންގެ މައްޗަށް ދައުވާކުރެވޭ މިންވަރަށް މިވަގުތު ހެކި ލިބިފައި ނުވާތީ މިވަގުތަށް އެ މީހުންގެ މައްޗަށް ދައުވާ ނުކުރަން ނިންމާފައިވާ ކަމަށެވެ. އެ މައްސަލައިގެ ތަޙްޤީޤު އަދިވެސް ކުރިއަށްދާތީ، އިތުރު ބައިތަކުގެ ތަޙްޤީޤު ނިމުމުން، ތުހުމަތުކުރެވޭ އިތުރު މީހުންގެ މައްޗަށް ދައުވާކުރުމާމެދު ގޮތެއް ނިންމާނެ ކަމަށް ވެސް ޕީޖީން ބުނެފައިވެއެވެ.
