ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް މަޤާމުން ވަކިކުރުމާމެދު ގޮތެއް ނިންމުމަށް ރައްޔިތުންގެ މަޖިލީހުގެ ޖަލްސާއެއް މިރޭ 9:00 އަށް ބޭއްވުމަށް ތާވަލުކޮށްފިއެވެ. މި ޖަލްސާއަކީ މި ދައުރުގެ އެންމެ ފަހު ޖަލްސާ ކަމަށް މަޖިލީހުގެ ނައިބު ރައީސް އަޙްމަދު ނާޒިމް ވަނީ ވިދާޅުވެފައެވެ.
މިއަދު ބޭއްވުނު ޖުޑިޝަރީ ކޮމިޓީގެ ބައްދަލުވުމުގައި ޝަމީމަށް ޖަވާބުދާރީވުމުގެ ފުރުޞަތު ދިނުމަށްފަހު، ކޮމިޓީން ވަނީ ޝަމީމް މަޤާމުން ވަކިކުރުމަށް ނިންމައި، އެ ރިޕޯޓު މަޖިލީހުގެ ތަޅުމަށް ފޮނުވާފައެވެ.
ޝަމީމްގެ މައްޗަށް ކުރެވިފައިވާ ތުހުމަތުތަކުގެ ތެރޭގައި:
1. ޖިންސީ ކުށުގެ މައްސަލަތަކުގައި ދަޢުވާ ނުކުރުން
2. ސިޔާސީ ނުފޫޒަށް ލެނބި މައްސަލަތައް ފައިލްކުރުން
3. ބައެއް މައްސަލަތަކުގައި ދަޢުވާ އަނބުރާ ގެންދިއުން
4. ވެންޓިލޭޓަރު މައްސަލައިގައި ދަޢުވާ ނުކުރަން ނިންމުން
5. ޕީޖީ އޮފީހުގެ މުވައްޒަފުންނާމެދު ތަފާތުކުރުން ގެންގުޅުން
ނަމަވެސް، ޝަމީމް ވަނީ މި ހުރިހާ ތުހުމަތުތަކަށް އިންކާރުކުރައްވާފައެވެ. އޭނާ ވިދާޅުވީ މިއީ ހަޤީޤަތާ ޚިލާފު ތުހުމަތުތަކެއް ކަމަށާއި، މީގެ ކުރިން ޖަވާބުދާރީވެފައިވާ މައްސަލަތަކެއް ކަމަށެވެ. އަދި ޕީޖީ އޮފީހުން ކުރިން ނެރެފައިވާ ރިޕޯޓުތަކާއި ލިޔުންތައް މެންބަރުން ދިރާސާކުރައްވާނަމަ، މިފަދަ ތުހުމަތުތައް ކުރައްވާކަށް ނުޖެހޭނެ ކަމަށްވެސް އޭނާ ވިދާޅުވިއެވެ.
މިރޭ ބޭއްވޭ ޖަލްސާގައި ޕީޖީ ޝަމީމް މަޤާމުން ވަކިކުރުމާމެދު ވޯޓަށް އަހާ، ގޮތެއް ނިންމާނެ ކަމަށް ބެލެވެއެވެ.
