ސަރުކާރުގެ ފަރާތުން ހުށަހެޅި ބިނާވެށި ޕްލޭންކުރުމާއި ހިންގުމުގެ ބިލު ރައްޔިތުންގެ މަޖިލީހުން މިއަދު ފާސްކޮށްފިއެވެ. ކޮޅުމާފުށީ ދާއިރާގެ މެންބަރު އިބްރާހިމް ޙުސައިން ދީދީ ހުށަހެޅުއްވި މި ބިލު ފާސްވެފައިވަނީ 67 މެންބަރުންގެ ތާއީދާއެކުގައެވެ. ބިލާ ދެކޮޅަށް ވޯޓު ދެއްވާފައިވަނީ 10 މެންބަރުންނެވެ.
މި ބިލުގެ މައިގަނޑު މަޤްޞަދަކީ ދިވެހިރާއްޖޭގެ ބިނާވެށި ޕްލޭންކޮށް ހިންގުމާ ގުޅޭ ކަންކަން ހަރުދަނާކޮށް، ޤާނޫނީ އޮނިގަނޑެއްގެ ދަށުން އިންތިޒާމުކުރުމެވެ. މީގެ ތެރޭގައި ދެމެހެއްޓެނިވި އަދި ޒިންމާދާރު ގޮތެއްގައި ދިވެހިރާއްޖޭގެ ބިމުގެ ބޭނުން ހިފުމާއި، ބިން ތަރައްޤީކޮށް ހިންގުމުގެ އަސާސީ މިންގަނޑުތައް ކަނޑައެޅުމާއި، ތަރައްޤީގެ މަސައްކަތްތައް މޮނިޓަރކޮށް ފިޔަވަޅު އެޅުމާ ބެހޭ އުސޫލުތައް ކަނޑައެޅުން ހިމެނެއެވެ.
ނަމަވެސް، މި ބިލާ ގުޅޭގޮތުން އައްޑޫ ސިޓީގެ މޭޔަރު ޢަލީ ނިޒާރު ވަނީ ކަންބޮޑުވުން ފާޅުކުރައްވާފައެވެ. އޭނާ ވިދާޅުވީ މި ބިލު ފާސްވުމުން ކައުންސިލުތަކަށް ލިބިފައިވާ ބިން ޕްލޭންކުރުމާއި ބޭނުންކުރުމުގެ އިޚްތިޔާރު އެއްކޮށް ކަނޑާލެވި، މިނިސްޓްރީތަކުގެ ބާރުގެ ދަށަށް ގެނެވިގެންދާނެ ކަމަށެވެ.
އިތުރަށް ވާހަކަދައްކަވަމުން ނިޒާރު ވިދާޅުވީ ރައްޔިތުން އުންމީދުކުރީ ޤަދީމީ ޖާހިލު ބަދަލުތަކަކަށް ނޫން ކަމަށާއި، ރައްޔިތުން އެދުނީ ތަހުޒީބު، ޒަމާނީ، ޑިމޮކްރެޓިކް ބަދަލުތަކަށް ކަމަށެވެ. އަދި ސަރުކާރުގެ ކިބައިން ފެންނަނީ ރައްޔިތުންގެ އުންމީދުތަކުގައި ކޮޅުފައިން ޖަހާތަން ކަމަށްވެސް ނިޒާރު ވަނީ ފާހަގަކުރައްވާފައެވެ.
