ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް މަޤާމުން ވަކިކުރުމަށް ހުށަހެޅިފައިވާ މައްސަލައާ ގުޅިގެން، މިއަދު ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް އޭނާ ހާޒިރު ކޮށްފިއެވެ.
ޝަމީމް ކޮމިޓީއަށް ހާޒިރުކޮށް ބޭއްވުމަށް ހަމަޖެއްސި ބައްދަލުވުން ޕީޖީ އޮފީހުން އެދުނީ ލައިވްކޮށް ކުރިޔަށް ގެންގޮސްދިނުމަށެވެ. ނަމަވެސް، ތުލުސްދޫ ދާއިރާގެ މެންބަރު އިބްރާހިމް ނަސީމް ހުށަހެޅުއްވި ގޮތުގައި، ޝަމީމަށް ކުރެވޭ ތުހުމަތުތަކުގައި ބައެއް މީހުންގެ ޒާތީ ކަންކަން ހިމެނޭތީ، ކޮމިޓީ ސިއްރުކުރަން ޖެހެއެވެ. މި ހުށަހެޅުމަށް ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ތާއީދުކުރެއްވުމާއެކު، ވޯޓަކަށް އަހައި ކޮމިޓީ ސިއްރުކުރުމަށް ނިންމުނެވެ.
ޝަމީމް މަޤާމުން ވަކިކުރުމަށް ހުށަހެޅީ ހުޅުދޫ ދާއިރާގެ މެންބަރު މުޙައްމަދު ޝާހިދެވެ. އޭނާގެ ހުށަހެޅުމުގައި ޝަމީމް ވަކިކުރަންޖެހޭ 8 ސަބަބެއް ފާހަގަކޮށްފައިވެއެވެ.
މި މައްސަލަ ކުރިމަތިވެފައިވަނީ ސަރުކާރުގެ އިސް ބައެއް މުވައްސަސާގައި ތިބި ބައެއް އިސްވެރިން މަގާމުން ދުރުކުރުމުގެ މަސައްކަތް ރައްޔިތުންގެ މަޖިލިހުން ފަށާފައި ވަނިކޮށެވެ. އެގޮތުން، އެމްއެމްއޭގެ ގަވަރުނަރު އަލީ ހާޝިމް ވެސް ވަނީ، ވެރިކަންކުރާ ޕީއެންސީގެ ސުޕަރ މެޖޯރިޓީ އޮތް މަޖިލީހުން މަޤާމުން ވަކިކޮށްފައެވެ.
ޝަމީމް ޕީޖީގެ މަޤާމަށް އައްޔަންކުރެވުނީ 2019 ވަނަ އަހަރުގެ ޑިސެމްބަރު މަހުގައި، ރައީސް އިބްރާހިމް މުޙައްމަދު ޞާލިޙްގެ ވެރިކަމުގައެވެ. އޭނާގެ ފަސް އަހަރުގެ ދައުރު ހަމަވާނީ މިއަހަރުގެ ޑިސެމްބަރު މަހުގައެވެ.
