ތިލަފުށީގައި ހުރި މެރިންޑޯ މެރިންވޯކްސް ވޯކްޝޮޕުގައި މިއަދު ހެނދުނު 8:25 ހާއިރު އަލިފާނެއް ރޯވެ އަލިފާންގަނޑު ކޮންޓްރޯލްނުވެ، ކައިރީގައި ހުރި އިރާއީ ބުކްޝޮޕުގެ ގުދަނަށްވެސް އަލިފާން ފެތުރިއްޖެއެވެ.
މިއަދު ހެނދުނު ތިލަފުށިގައި ހުރި މެރިންޑޯ ވޯކްޝޮޕުގައި ރޯވުމާއެކު، އެ ވޯކްޝޮޕްގައި ތިބި 30 އެއްހާ މުވައްޒަފުން ރައްކާތެރިކަމާއެކު އެތަނުން ބޭރަށް ނުކުމެފައިވެއެވެ. އަދި އެއަށްފަހު، ދުމާއި އަލިފާނުގެ އަސަރުކޮށްގެން އެކަކަށް ފަރުވާ ދޭން ޖެހިފައިވެއެވެ. ނަމަވެސް މިހާތަނަށް އިތުރު އެއްވެސް މީހަކަށް ގެއްލުމެއް ލިބުނުކަން ނުވަތަ ނޫންކަން ކަށަވަރު ކުރެވިފައެއް ނުވެއެވެ.
އެމްއެންޑީއެފްއިން މައުލުމާތު ދޭ ގޮތުގައި މި ވަގުތުވެސް ސިފައިން ދަނީ އަލިފާން ނިއްވުމުގެ މަސައްކަތް ކުރަމުންނެވެ. އެހެންނަމަވެސް ތިލަފުށީގައި އަލިފާން ނިއްވުމަށް ބޭނުންކުރާ ވަސީލަތްތައް މަދުކަމާއެކު، އަލިފާން ނިއްވުމުގެ މަސައްކަތް އޭގެ އެންމެ ބާރުމިނުގައި ކުރިޔަށް ގެންދެވިފައި ނުވާކަން ފާހަގަ ކޮށްލެވެއެވެ. މީގެ ކުރިންވެސް މިފަދަ ހާދިސާތަކުގައި މި ސަބަބާ ހުރެ ބޮޑެތި ގެއްލުންތަކެއް ވަނީ ލިބިފައެވެ.
އަލިފާން ރޯވާން މެދުވެރިވި ސަބަބެއް އަދި ސާފުވެފައެއް ނޫނެވެ. އިރާއީ ބުކްޝޮޕުގެ ގުދަނުގައި ފޮތްފަންސޫރާއި އެބާވަތުގެ އަލިފާން ގަދައަށް ހިފާ ޒާތުގެ ތަކެތި ހުރެދާނެކަމަށް ލަފާކުރެވެއެވެ.
ތިލަފުށްޓަކީ އިންޑަސްޓްރިއަލް ގިނަ މަސައްކަތްތަކެއް ހިންގާ ރަށެކެވެ. މި ރަށުގައި ނުރައްކާތެރި ކެމިކަލްތަކާއި އެކިއެކި މައުދަންތައް ރައްކާކޮށްފައި ހުރެއެވެ. މިކަމާ ގުޅިގެން އިތުރު ނުރައްކަލެއް ކުރިމަތިވެދާނެކަމުގެ ބިރު އެބައޮތެވެ.