ފަސް ރަށެއްގައި އައިސް ޕްލާންޓް އެޅުމަށްޓަކައި ބަޔަކު ހޯދުމަށްފިނޭންސް މިނިސްޓްރީން އިޢުލާނުކޮށްފިއެވެ. މި ރަށްތަކަކީ ހއ. އިހަވަންދޫ، ހއ. ދިއްދޫ، ށ. ކޮމަންޑޫ، އއ. ރަސްދޫ އަދި ގދ. ރަތަފަންދޫއެވެ. ސަޢޫދީ ފަންޑުގެ އެހީގައި މި ރަށްތަކުގައި އަޅަން ހަމަޖެހިފައިވަނީ 50 ޓަނުގެ އައިސް ޕްލާންޓްތަކެކެވެ.
މި މަޝްރޫޢުގެ ބީލަން ހުށަހެޅުމުގެ ފުރުސަތު ހުޅުވާލާފައިވަނީ އިންޓަނޭޝަނަލް ބިޑިންގ އުސޫލުންނެވެ. ބީލަން ހުށަހަޅާ ފަރާތްތަކުން އަނބުރާ ނުލިބޭގޮތަށް ރަޖިސްޓްރޭޝަން ފީއެއް ދައްކަންޖެހޭނެއެވެ. އަދި ބިޑް ސެކިއުރިޓީގެ ގޮތުގައި 250,000 ރުފިޔާ ހުށަހަޅަންޖެހެއެވެ. ބީލަން ހުށަހެޅުމުގެ ސުންގަޑިއަކީ ސެޕްޓެންބަރު މަހުގެ 20 ވަނަ ދުވަހެވެ.
މިހާރުވެސް ސަޢޫދީ ފަންޑުގެ އެހީގައި 11 ރަށެއްގައި އައިސް ޕްލާންޓް އެޅުމުގެ މަސައްކަތް ކުރިއަށްދެއެވެ. މީގެ އިތުރުން، ރާއްޖޭގެ އެކި ކަންކޮޅުތަކުގައި 25 އައިސް ޕްލާންޓުން މިހާރުވެސް ޚިދުމަތް ދެމުންދެއެވެ.
