މޫސުމާބެހޭ ޤައުމީ މަރުކަޒު (މެޓް އޮފީސް) އިން މަޢުލޫމާތު ދީފައިވާ ގޮތުގައި، އުތުރުގެ އަތޮޅުތަކުގައި މިހާރު އާދައިގެ މިންވަރަކަށް ކަނޑު ގަދަވެފައިވީ ނަމަވެސް، ކުރިއަށް އޮތް ދުވަސްތަކުގައި މޫސުން ރަނގަޅުވާނެ ކަމަށް ލަފާކުރެވެއެވެ.
އިއްޔެ، އުތުރުގެ އަތޮޅުތަކަށް ކުރަމުންދިޔަ ވިއްސާރައާ ގުޅިގެން މެޓް އޮފީހުން އޮރެންޖު އެލާޓެއް ނެރުނެވެ. ހއ. އަތޮޅުން ފެށިގެން ށ. އަތޮޅާ ހަމައަށް ނެރުނު މި އެލާޓްގައި، ގުގުރުމާއެކު ބޯކޮށް ވާރޭވެހި ފެންބޮޑުވެދާނެ ކަމަށް އިންޒާރު ދީފައި ވެއެވެ.
މެޓް އޮފީހުގެ އަންދާޒާގައި، އުތުރަށް ކުރަމުންދާ ވިއްސާރަ މިހާރު ދަނީ މަޑުމަޑުން ރަގަޅުވަމުންނެވެ. އުތުރުގެ ރަށްތަކަށް މިވަގުތު ކެރީގެ އަސަރު ކުރަމުންދާއިރު، ހުޅަނގުގެ އަތޮޅުތަކަށް މިހާރު ކެރީގެ އަސަރެއް ނުކުރެއެވެ. އުތުރާއި މެދުރާއްޖެތެރެއަށް ވައި ޖެހޭނެ ކަމަށް ލަފާކުރެވެނީ ގަޑިއިރަކު 8 މޭލާއި 18 މޭލާ ދެމެދުގެ ބާރުމިނުގައެވެ.
އިއްޔެ އުތުރުގެ އަތޮޅުތަކަށް ކުރި ވިއްސާރައިގެ ސަބަބުން ލިބުނު ގެއްލުންތަކާ ގުޅޭގޮތުން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ހިއްސާކޮށްފައިވާ މަޢުލޫމާތުގައިވާ ގޮތުން:
– ހއ. ހޯރަފުށި: 2 ގެއަކަށް ގެއްލުން
– ހދ. ކުޅުދުއްފުށި: 57 ގެއަކަށް ގެއްލުން
– ށ. ފީވައް: 5 ގެއަކަށް ގެއްލުން
– ށ. ނޫމަރާ: 5 ގެއަކަށް ގެއްލުން
މި ހުރިހާ ގެއަކަށްވެސް ގެއްލުން ލިބިފައިވަނީ ފެން ވަނުމުގެ ސަބަބުންނެވެ. ޖުމުލަ 72 ގެއަކަށް ގެއްލުން ލިބިފައިވާކަމަށް އެންޑީއެމްއޭ އިން ފާހަގަކޮށްފައިވެއެވެ.
