ޑިޖިޓަލް ވަސީލަތްތަކަށް އަހުލުވެރިކޮށް ބޭނުން ކުރުމަކީ މުހިންމުކަމެއްކަމަށާއި، ނަމަވެސް ހަމަ އެއާއިއެކު ކުދިންގެ އަޚްލާޤާއި ސުލޫކު ބިނާކުރުމަށް އަހައްމިއްޔަތުކަން ދިނުމަކީވެސް މުހިންމު ކަމެއްކަމުގައި މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރްޔަމް މާރިޔާ ވިދާޅުވެއްޖެއެވެ.
އެކަމަނާ މިފަދައިން ވިދާޅުވެފައިވަނީ މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިން "ޑިޖިޓަލް ޓެކްސްޓްފޮތްތައް ތަރައްޤީކުރުމާއި ބޭނުންކުރުމާ ބެހޭ ފޯރަމް"ގެ ފެށުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. އެކަމަނާގެ ވާހަކަފުޅުގައި ތަޢުލީމީ ދާއިރާގައި މިހާރު އަންނަމުންދާ ބޮޑު ބަދަލަށް އަލިއަޅުވާލައްވާފައިވެއެވެ. އޭނާ ފާހަގަކުރެއްވި ގޮތުގައި ތައުލީމީ ދާއިރާގައި އުގަންނައިދިނުމުގެތެރެއިން ޑިޖިޓަލް ވަސީލަތްތަ ބޭނުންކުރުމަކީ މުހިންމު ކަމެއްކަމަށާއި، ނަމަވެސް އެއާއެިއެކު ކުދިންގެ އަޚްލާޤާއި ސުލޫކު ބިނާކުރުމަސްވެސް އިސްކަމެއް ދޭންޖެހޭނެކަމަށެވެ.
އެކަމަނާގެ ވާހަކަފުޅުގައި އާ އީޖާދުތައް ތައާރަފްކުރާއިރު އެ އީޖާދުތަކަކީ ހުރިހާ ފަރާތްތަކަށް ފޯރުކޮށްދެވޭ، ފަސޭހައިން ލިބެންހުންނަ، އަދި ހަމަހަމަ ތަޢުލީމެއް އެންމެންނަށް ފޯރުކޮށްދިނުމުގެ ވިސްނުމާ އެއްގޮތްވާ އީޖާދުތަކަކަށް ހެދުމަށް ގޮވާލައްވާފައިވެއެވެ. މިގޮތުން ޑިޖިޓަލް ވަސީލަތްތައް ބޭނުންކުރުމަކީ މުހިންމު ކަމެއް ނަމަވެސް، ހަމައެއާއެކު ކުދިންގެ އަޚްލާޤާއި ސުލޫކު ބިނާކުރުމަށް އަހައްމިއްޔަތުކަން ދިނުމަކީވެސް މުހިންމު ކަމެއްކަމަށް އެކަމަނާ ވަނީ އިތުރަށް ފާހަގަކުރައްވާފައެވެ.
