ބުޅާ މަރައިގެން ކާބޯތަކެތި ތައްޔާރުކޮށް ވިއްކާ ކަމަށް ތުހުމަތުކުރެވުނު ބަންގްލަދޭޝްގެ ރައްޔިތެއް ކަމަށްވާ އަރަފާތު ހުސައިން ފުލުހުންގެ އެހީތެރިކަމާއެކު ހޯދައި، އިމިގްރޭޝަންގެ ބެލުމުގެ ދަށަށް ގެނެވިއްޖެއެވެ.
އިމިގްރޭޝަންއިން މިއަދު ކުރި އެކްސް ޕޯސްޓެއްގައި ބުނެފައިވަނީ، އަރަފާތު ހުސައިން އިމިގްރޭޝަނަށް ހާޒިރުވުމަށް އަންގައި އިޢުލާނު ކުރުމަށްފަހު، އިމިގްރޭޝަން އިންޓެލިޖަންސަށް ލިބުނު މަޢުލޫމާތަކާ ގުޅިގެން މޯލްޑިވްސް ޕޮލިސް ސަރވިސްގެ އެހީތެރިކަމާއެކު އޭނާ ހޯދައި ހައްޔަރުކުރެވުނު ކަމަށެވެ.
މި މައްސަލަ ފުރަތަމަ ސަމާލުކަމަށް އައީ ސޯޝަލް މީޑިއާގައި ފެތުރުނު ވީޑިއޯއަކާ ގުޅިގެންނެވެ. އެ ވީޑިއޯގައި ދައްކާފައިވަނީ އަރަފާތު ހުސައިން ކޮތަޅަކަށް ބުޅަލެއް އަޅައިގެން ހުރިތަނެވެ. މިކަމާ ގުޅިގެން އާންމުންގެ މެދުގައި ކަންބޮޑުވުން ފާޅުކޮށް، އިމިގްރޭޝަނަށް ގިނަ ޝަކުވާތަކެއް ހުށަހެޅުނެވެ.
އިމިގްރޭޝަންގެ ބަޔާނުގައި އިތުރަށް ބުނެފައިވަނީ، މިހާރު އަރަފާތު ހުސައިން ހުރީ އިމިގްރޭޝަންގެ ބެލުމުގެ ދަށުގައި ކަމަށާއި، މި މައްސަލައާ ގުޅޭ އިތުރު ތަޙްޤީޤުތައް ކުރިއަށްދާ ކަމަށެވެ. އަދި ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންނާ މެދު ޤާނޫނީ ފިޔަވަޅު އަޅާނެ ކަމަށްވެސް ބަޔާނުގައި ބުނެފައިވެއެވެ.
މި މައްސަލައާ ގުޅިގެން ސަރުކާރުގެ ކަމާބެހޭ އިދާރާތަކުން ވަނީ ރާއްޖޭގައި ކާބޯތަކެތި ތައްޔާރުކޮށް ވިއްކާ ތަންތަނުގެ ސާފުތާހިރުކަން ކަށަވަރުކުރުމަށް އިތުރު ފިޔަވަޅުތަކެއް އަޅާނެ ކަމަށް ބުނެފައެވެ. އަދި މިފަދަ ޤާނޫނާ ޚިލާފު ޢަމަލުތައް ހުއްޓުވުމަށް އާންމުންގެ އެއްބާރުލުން ބޭނުންވާ ކަމަށްވެސް ފާހަގަކޮށްފައިވެއެވެ.
