ކުރީގެ ރައީސް އަބްދުﷲ ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ބާތިލްކޮށް، އެ މައްސަލަ އަލުން ބެލުމުގައި ޔާމީނާ ދެކޮޅަށް ދައުލަތުން ހުށަހެޅި އާ ހެކިތައް ބަލައިގަނެވޭނެ ކަމަށް ކަނޑައަޅަން ދައުލަތުން ސުޕްރީމް ކޯޓަށް ހުށަހެޅި މައްސަލަ އެ ކޯޓުން ބަލައިގެންފިއެވެ.
ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ހައި ކޯޓުން ބާތިލްކޮށް، އެ މައްސަލަ އަލުން ބަލަން އަންގާފައިވެއެވެ. ނަމަވެސް އެ މައްސަލަ އަލުން ބަލާއިރު، ޔާމީނާ ދެކޮޅަށް ދައުލަތުން ފަހުން ހުށަހެޅި އާ ހެކިތައް ބަލައިނުގަނެވޭނެ ކަމަށް ހައި ކޯޓުން ކަނޑައަޅާފައިވެއެވެ.
މިހާރު ދައުލަތުން ވަނީ އާ ހެކިތައް ބަލައިގަނެވޭނެ ކަމަށް ބުނެ ސުޕްރީމް ކޯޓަށް މައްސަލަ ހުށަހަޅާފައެވެ. ސުޕްރީމް ކޯޓުން ވަނީ މި މައްސަލަ ބަލައިގަތުމަށް ނިންމާފައެވެ. އެހެންނަމަވެސް މި މައްސަލައިގެ އަޑުއެހުންތަކެއް އަދި ފަށާފައެއް ނުވެއެވެ.
ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވެސް މި މައްސަލައިގައި އިއްވި ޖަލު ހުކުމް ހައި ކޯޓުން ބާތިލްކޮށްފައިވެއެވެ. ދައުލަތުން ޔޫސުފް ނައީމްގެ ބައި ވެސް ސުޕްރީމް ކޯޓަށް ހުށަހެޅުމުން އެ މައްސަލަ ވެސް މިހާރު ވަނީ ބަލައިގަނެފައެވެ.
މި މައްސަލަ ސުޕްރީމް ކޯޓުން ބަލައިގަތް އިރު، އާރަށް މައްސަލައިގެ ޝަރީއަތް މާދަމާ އަލުން ފެށުމަށް ކްރިމިނަލް ކޯޓުން ވަނީ ތާވަލްކޮށްފައެވެ.
ކޮމެންޓު ފޮނުވާ