ސަރުކާރުން އާބަން ޑިވެލޮޕްމަންޓް ބިލުގެ ބަހުސް ރައްޔިތުންގެ މަޖިލީހުގައި ފަށައިފިއެވެ. މި ބިލުގެ މައިގަނޑު މަޤްޞަދަކީ އާބަން ސަރަހައްދުތައް ކަނޑައަޅައި، އެ ސަރަހައްދުތައް ހިންގުމުގެ ބާރު އާބަން ޑިވެލޮޕްމަންޓް އޮތޯރިޓީއަށް ދިނުމެވެ. ވިލިނގިލީ ދާއިރާގެ މެންބަރު އާޒިމް އަބްދުލް އަޒީޒް މި ބިލު މަޖިލީހަށް ހުށަހެޅުއްވިއެވެ.
ބިލުގެ މަޤްޞަދުތަކުގެ ތެރޭގައި އާބަން ސަރަހައްދުތައް ކަނޑައެޅުމާއި ތަރައްޤީކުރުމާ ގުޅޭ ކަންކަން ހަރުދަނާ ޤާނޫނީ އޮނިގަނޑެއްގެ ދަށުން އިންތިޒާމުކުރުމާއި، އާބަން ސަރަހައްދުތަކުގެ ޒޯންތަކާއި ގިންތިތައް ކަނޑައެޅުމާއި، ތަރައްޤީގެ މަޝްރޫޢުތައް މޮނިޓަރކޮށް ފިޔަވަޅު އެޅުމާބެހޭ އުސޫލުތައް ކަނޑައެޅުން ހިމެނެއެވެ.
ބިލުގައި އާބަން ސަރަހައްދުތައް ގިންތިކޮށްފައިވާ ގޮތުން، ޖުމުލަ އާބާދީ 150،000 އަށްވުރެ ބޮޑު ސަރަހައްދުތަކަކީ މެޓްރޮޕޮލިޓަން ސަރަހައްދު ކަމަށާއި، 50،000 އަށްވުރެ ބޮޑު ސަރަހައްދުތަކަކީ އާބަން ރީޖަން ކަމަށާއި، 10،000 އަށްވުރެ ބޮޑު ސަރަހައްދުތަކަކީ އާބަން ސެންޓަރު ކަމަށް ކަނޑައަޅާފައިވެއެވެ.
އާބަން ސަރަހައްދުތައް ކަނޑައަޅާނީ ރައީސުލްޖުމްހޫރިއްޔާ ކަމަށާއި، މި ސަރަހައްދުތައް ޕްލޭންކުރުމާއި ތަރައްޤީކުރުމުގެ ބާރު އޮންނާނީ އާބަން ޑިވެލޮޕްމަންޓް އޮތޯރިޓީއަށް ކަމަށް ބިލުގައި ބަޔާންކޮށްފައިވެއެވެ. ކައުންސިލްތަކުން ބަލަހައްޓާނީ މުނިސިޕަލް ޚިދުމަތްތަކެވެ.
އާބަން ޑިވެލޮޕްމަންޓް އޮތޯރިޓީ އުފެދުމުން، ޕްލޭނިންގ މިނިސްޓްރީގެ ދަށުން ހިންގާ އާބަން ޕްލޭނިންގ އާއި އާބަން ޑިވެލޮޕްމަންޓް ޑިޕާޓްމަންޓްގެ ޒިންމާތަކާއި ވަސީލަތްތައް މި އޮތޯރިޓީއަށް ބަދަލުވާނެ ކަމަށާއި، އާބަން ސަރަހައްދުތައް ތަރައްޤީކުރުމުގެ ކަންކަން އޮތޯރިޓީގެ ބެލުމުގެ ދަށަށް ގެންދާނީ ކައުންސިލްތަކާއެކު ވެވޭ އެއްބަސްވުމެއްގެ ދަށުން ކަމަށްވެސް ބިލުގައި ބަޔާންކޮށްފައިވެއެވެ.
