ކޮލްކަތާގައި އަންހެން ޑޮކްޓަރަކު ރޭޕްކޮށް މަރާލި މައްސަލައާ ގުޅިގެން އިންޑިއާގެ ޑޮކްޓަރުން ގައުމީ ފެންވަރުގައި ހުއްޓުމެއްނެތި މުޒާހިރާ ފަށާއިފިއެވެ. މިއީ މި މައްސަލައާ ގުޅިގެން ކުރަމުންދާ އިހުތިޖާޖުތައް އިތުރަށް ގަދަވެގެން ދިޔުމެކެވެ.
އިންޑިއާގެ އެންމެ ބޮޑު ޑޮކްޓަރުންގެ ޖަމްޢިއްޔާ ކަމަށްވާ އިންޑިއަން މެޑިކަލް އެސޯސިއޭޝަން (އައިއެމްއޭ) އިން ބުނެފައިވަނީ އަންނަ ހޮނިހިރު ދުވަހު މުޅި ގައުމުގައި ހުރިހާ ހޮސްޕިޓަލްތަކެއްގެ މުހިންމުނޫން ހިދުމަތްތައް ހުއްޓާލާނެ ކަމަށެވެ.
މިދިޔަ ހަފްތާގައި ހިނގި މި މާރާމާރީއަކީ "އަންހެނުންނަށް ރައްކާތެރި ތަންތަން ނެތުމުގެ ސަބަބުން ހިނގާފައިވާ އަނިޔާވެރި ކުށެއް" ކަމުގައި އައިއެމްއޭ އިން ސިފަކޮށްފައިވެއެވެ. އަދި އިންސާފު ހޯދުމަށް ކުރާ މަސައްކަތުގައި ހުރިހާ ފަރާތްތަކެއްގެ އެހީތެރިކަމަށް އެދިފައިވެއެވެ.
މި ހަމަލާއާ ދެކޮޅަށް އަދި އަންހެނުންނަށް ރައްކާތެރިކަން ހޯދައިދިނުމަށް އެދި ކުރާ އިހުތިޖާޖުތައް ވަނީ ފަހަކަށް އައިސް އިތުރުވެފައެވެ. މިކަން މިހެން ދިމާވީ މި ހާދިސާ ހިނގި ހޮސްޕިޓަލަށް ބަޔަކު އަރައި ގެއްލުން ދިނުމާ ގުޅިގެންނެވެ.
އައިއެމްއޭ އިން ނެރުނު ބަޔާނެއްގައި ބުނެފައިވަނީ އިމަޖެންސީ އަދި ކެޝުއަލްޓީ ހިދުމަތްތައް ކުރިއަށް ގެންދާނެ ކަމަށާއި، އެހެންނަަމަވެސް ހަޅުތާލު ހުއްޓުމެއް ނެތި 24 ގަޑިއިރަށް ކުރިޔަށްދާނެ ކަމަށެވެ.
ބައެއް ސަރުކާރު ހޮސްޕިޓަލްތަކުގެ ޑޮކްޓަރުން މިދިޔަ ހަފްތާގައި އިޢުލާންކުރި ގޮތުގައި އިހުތިޔާރީ ޕްރޮސީޖަރތައް މުއްދަތެއް ނެތް ގޮތަށް ހުއްޓާލާނެއެވެ.
އައިއެމްއޭ އިން ވަނީ މެޑިކަލް މުވައްޒަފުން އަނިޔާއިން ރައްކާތެރިކުރުމަށް ގާނޫނު ވަރުގަދަކުރުމާއި، ހޮސްޕިޓަލްތަކުގެ ސެކިއުރިޓީ އިތުރުކުރުމާއި، އަރާމުކުރުމަށް ރައްކާތެރި ތަންތަން ހެދުން ފަދަ ކަންކަމަށް އެދިފައެވެ.
މި މަރާމާރީގެ "ފުރިހަމަ އަދި ޕްރޮފެޝަނަލް" ތަހުގީގެއް ކުރުމަށާއި، ގެއްލުންދިން ފަރާތްތަކަށް ދަޢުވާކުރުމަށާއި، މަރުވި އަންހެން ޑޮކްޓަރުގެ އާއިލާއަށް ބަދަލު ދިނުމަށް އައިއެމްއޭ އިން ގޮވާލާފައިވެއެވެ.
އިންޑިއާގައި 31 އަހަރުގެ އަންހެން ޑޮކްޓަރު ރޭޕްކޮށް މަރާލި މައްސަލާގައި މުޅި އިންޑިއާއަސް ވަނީ ސިހުން ގެނުވާފައެވެ. އާރު ޖީ ކާ މެޑިކަލް ކޮލެޖްގެ ސެމިނަރ ހޯލަކުން އޭނާގެ ހަށިގަނޑު ފެނުނު އިރު، އަނިޔާގެ ނިޝާންތައް ހުރި ކަމަށާއި، ފޭރާން ބައެއް ބައިތައް ނެތް ކަމަށް މީޑިއާތަކުން ރިޕޯޓު ކޮށްފައި ވެއެވެ. އޭނާ ޑިއުޓީ ވަގުތު އެތަނަށް ދިޔައީ އަރާމުކުރަން ކަމަށް މީޑިއާތަކުން ރިޕޯޓުކޮށްފައި ވެއެވެ.
މި ކުށާ ގުޅިގެން ހޮސްޕިޓަލުގައި މަސައްކަތްކުރާ ވޮލަންޓިއަރެއް ވަނީ ހައްޔަރުކޮށްފައެވެ.
މައްސަލައިގެ ތަހުގީގު ލަސްވަމުންދާތީ ކުރެވުނު ފާޑުކިޔުންތަކާ ގުޅިގެން، މި މައްސަލަ ވަނީ ލޯކަލް ފުލުހުންގެ އަތުން އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އަށް ބަދަލުކޮށްފައެވެ.
އަންހެން ޑޮކްޓަރު މަރުވި ފަހުން، އިތުރު ރޭޕް މައްސަލަތަކެއް ވަނީ އިންޑިއާގެ ހެޑްލައިންތަކަށް އައިސްފައެވެ. އަދި ބޮޑުވަޒީރު ނަރެންދްރަ މޯދީ ވިދާޅުވެފައިވަނީ "އަންހެނުންނާ މެދު ކުރެވޭ ވަހުޝީ އަމަލުތަކަށް ހަރުކަށި އަދަބު އަވަހަށް ދޭންޖެހޭ" ކަމަށެވެ.
