މާލޭ ސިޓީ ކައުންސިލުގެ ސެކްރެޓަރީ ޖެނެރަލް (އެސްޖީ) ވަޖީހު ނަސީރު މަޤާމުން ވަކިކުރުމަށް ކައުންސިލުން ފާސްކޮށްފިއެވެ.
މި ނިންމުން ނިންމީ ކައުންސިލުގެ ޑެޕިއުޓީ މޭޔަރު އަޙްމަދު ނަރީޝް ހުށަހެޅުއްވި ހުށަހެޅުމަކަށް ފަހުގައެވެ. ނަރީޝް ވިދާޅުވީ އެސްޖީއަށް އިތުބާރު ނެތް ކަމަށެވެ.
ސިޓީ ކައުންސިލްގެ ބައްދަލުވުމުގައި ބައިވެރިވި ގިނަ މެންބަރުން މި ހުށަހެޅުމަށް ތާއީދުކުރެއްވިއެވެ. ނަމަވެސް، ދެ މެންބަރަކު ވަކި ގޮތަކަށް ވޯޓު ނުދެއްވައެވެ. އޭގެ ތެރޭގައި ހިމެނެނީ ގަލޮޅު އުތުރު ދާއިރާގެ މެންބަރު މުޙައްމަދު ސައިފް ފާތިޙް އަދި މައްޗަންގޮޅި ދެކުނު ދާއިރާގެ މެންބަރު ޢާއިޝަތު ނާޒިމާއެވެ.
ސައިފް ފާތިޙް ވިދާޅުވީ ވަޖީހު ވަކިކުރުމުގެ ކުރިން އޭނާއަށް ޖަވާބުދާރީވުމުގެ ފުރުޞަތު ދޭންޖެހޭނެ ކަމަށެވެ. ނަމަވެސް، ނަރީޝް ވިދާޅުވީ ވަޖީހު ވަކިކުރަން ހުށަހެޅުއްވީ ޒާތީ މައްސަލައަކަށް ނޫން ކަމަށާއި، ކައުންސިލް ރަނގަޅަށް ނުހިނގާތީ ކަމަށެވެ.
މޭޔަރު އާދަމް އާޒިމް ވިދާޅުވީ ކައުންސިލުގެ މަސައްކަތްތަކުގައި ލަސްތަކެއް ހުރިކަން ގަބޫލުކުރައްވާ ކަމަށެވެ. ނަމަވެސް، އެއީ ހަމައެކަނި އެސްޖީގެ ޒިންމާ އަދާނުކުރެއްވުމުގެ ސަބަބުން ދިމާވާ ކަމެއް ނޫން ކަމަށް ވެސް ވިދާޅުވިއެވެ.
ނަރީޝް އިތުރަށް ވިދާޅުވީ އެސްޖީއަކީ ސިވިލް ސަރވިސް ކޮމިޝަނުން އައްޔަންކުރާ މަޤާމެއް ކަމަށާއި، ވަޖީހު ވަކިކުރުމާމެދު ފަހުގެ ނިންމުން ނިންމާނީ ސިވިލް ސަރވިސް ކޮމިޝަނުން ކަމަށެވެ.
