ދިރާގު ހެޑް އޮފީހާއި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ކައިރީގައި ހުރި ޕާކިން ސަރަހައްދެއްގެ ފެންސެއް ވެއްޓި، އެތަނުގައި ޕާކުކޮށްފައި ހުރި ގިނަ އަދަދެއްގެ ސައިކަލުތަކަށް ގެއްލުން ލިބިއްޖެއެވެ.
މި ހާދިސާ ހިނގި މަންޒަރު ދައްކުވައިދޭ ވީޑިއޯއެއް މިހާރު ވަނީ ސޯޝަލް މީޑިއާގައި ފެތުރިފައެވެ. މި ފެންސަކީ އައިޖީއެމްއެޗްގެ ފަހަތުގައި އަދި ދިރާގު ހެޑް އޮފީހުގެ އަރިމަތީގައި ހުންނަ ޕާކިން ސަރަހައްދެއްގެ ފެންސެކެވެ.
މި ސަރަހައްދަކީ އައިޖީއެމްއެޗާއި ދިރާގު މުވައްޒަފުންނާއި، އެ ދެ ތަނުގެ ޚިދުމަތް ހޯދާ ފަރާތްތަކުގެ އިތުރުން ވިލިމާލޭ ރައްޔިތުން އާންމުކޮށް އުޅަނދުފަހަރު ބާއްވާ ތަނެކެވެ.
ފުލުހުން މަޢުލޫމާތު ދިންގޮތުގައި މި ހާދިސާއާ ގުޅިގެން ފުލުހުން ވަނީ އެ ސަރަހައްދަށް ޙާޟިރުވެފައެވެ. އަދި އެއްވެސް މީހަކަށް އަނިޔާއެއް ލިބިފައިނުވި ނަމަވެސް، އެތަނުގައި ޕާކުކޮށްފައި ހުރި ސައިކަލުތަކަށް ގެއްލުން ލިބިފައިވާކަން ފުލުހުން ފާހަގަކޮށްފައިވެއެވެ.
