ހޯމް މިނިސްޓްރީން ހާމަކޮށްފައިވާ ގޮތުގައި، ބިދޭސީންނާ ގުޅޭ ހުއްދަ އަދި ކޯޓާ ފީ ނުދެއްކުމުގެ ސަބަބުން ޖޫރިމަނާ އަރާފައިވާ ފަރާތްތަކުގެ ލިސްޓު އާންމުކުރިފަހުން 182 މިލިއަން ރުފިޔާއަށްވުރެ ގިނަ ފައިސާ ރިކަވަރ ކުރެވިފައިވާކަމަށް ހޯމް މިނިސްޓްރީން ބުނެފިއެވެ.
މިދިޔަ ޖުލައި 24 ވަނަ ދުވަހު، ހޯމް މިނިސްޓްރީން ވަނީ ބިދޭސީ މަސައްކަތްތެރިންގެ ވޯކް ޕާމިޓް އަދި ކޯޓާ ފީ ނުދެއްކުމުގެ ސަބަބުން ޖޫރިމަނާ އަރާފައިވާ ފަރާތްތަކުގެ މަޢުލޫމާތު ހާމަކޮށްފައެވެ. މި ލިސްޓުގައި ހިމެނެނީ އެއް ލައްކަ ރުފިޔާއަށްވުރެ ގިނަ އަދަދެއް ދައްކަން ޖެހިފައިވާ ފަރާތްތަކެވެ.
އެކްސްޕެޓް ޚިދުމަތް ހޯދާ ވަޒީފާދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން، ފައިސާ ނުދައްކާ ފަރާތްތަކުގެ ލިސްޓު ޢާއްމު ކުރި ތާރީޚުން ފެށިގެން މިއަދާ ހަމައަށް -/182،954،572ރ (އެއްސަތޭކަ އައްޑިހަ ދެމިލިއަން، ނުވަލައްކަ ފަންސާސް ހަތަރުހާސް ފައްސަތޭކަ ހަތްދިހަ ދެރުފިޔާ)… pic.twitter.com/18s4qQPRnU
— Ministry of Homeland Security & Technology, MV (@HomeMinistrymv) August 13, 2024
ހޯމް މިނިސްޓްރީގެ ހާމަކޮށްފައިވާ ގޮތުގައި، ހާހަކަށްވުރެ ގިނަ ކުންފުނިތަކުން ދައުލަތަށް ދައްކަންޖެހޭ ފައިސާގެ ޖުމްލަ އަދަދު ބައި ބިލިއަން ރުފިޔާއަށްވުރެ އިތުރުވެއެވެ. މީގެ ތެރޭގައި ހިމެނެނީ 1,026 ކުންފުންޏެވެ. އޭގެ ތެރޭގައި ބޮޑެތި، މަޝްހޫރު ކުންފުނިތައްވެސް ހިމެނެއެވެ. އޭގެ ތެރޭގައި ބޮޑެތި އަދަދުތަކުން ދައުލަތަށް ފައިސާ ދަންކަން ޖެހިފައިވާ ތިރީގައިމިވާ ކުންފުނިތައްވެސް ހިމެނެއެވެ:
– ފުޓްސަން އިންޓަނޭޝަނަލް ޕްރައިވެޓް ލިމިޓެޑް: 26.8 މިލިއަން ރުފިޔާ
– އެޑްވާންސް ގޯ ކޮންސްޓްރަކްޝަން: 14.8 މިލިއަން ރުފިޔާ
– ބްރައުން ބިލްޑާސް: 14.5 މިލިއަން ރުފިޔާ
– ހޮޓެލްސް އެންޑް ރިސޯޓް ކޮންސްޓްރަކްޝަން: 11.2 މިލިއަން ރުފިޔާ
ލިސްޓުގައި ހިމެނޭ ހުރިހާ ކުންފުނިތަކުން ޖުމްލަ 636.5 މިލިއަން ރުފިޔާ ދައުލަތަށް ދައްކަން ޖެހިފައިވާކަން ފާހަގަކުރެވެއެވެ. މިއީ ސަރުކާރުން މިފަދަ މަޢުލޫމާތު އާންމުކުރި ފުރަތަމަ ފަހަރެވެ.
ލިސްޓު އާންމުކުރުމަށްފަހު، ބިދޭސީން ގެނެސް ވަޒީފާދޭ ފަރާތްތަކުން ދައުލަތަށް ދައްކަންޖެހޭ ފައިސާގެ ތެރެއިން 182,954,572 ރުފިޔާ މިހާތަނަށް ހޯދިފައިވާކަމަށް ހޯމް މިނިސްޓްރީން ބުނެފައިވެއެވެ.
