ކުށުގެ މާޙައުލަށް ހުށަހެޅޭ ކުދިން އަލުން މުޖުތަމަޢުއަށް އަހުލުވެރިކުރުމަށްޓަކައި ތަރައްޤީކުރާ "ހޯޕް އައިލެންޑް" ގެ ކުރެހުމުގެ މަސައްކަތް ނިމިފައިވާ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. މި މަޝްރޫޢުގެ ދެން އޮތް މަރުޙަލާއަކީ ފައިނޭންސް ކުރާނެ މޮޑެލް އިކޮނޮމިކް ކައުންސިލަށް ހުށަހެޅުން ކަމަށާއި، އެ މަސައްކަތް ކުރިއަށް އޮތް ހަފުތާގެ ތެރޭގައި ކުރިއަށްގެންދާނެ ކަމަށް ވަޒީރު މަޢުލޫމާތު ދެއްވިއެވެ.
މި މަޝްރޫޢުގެ ދަށުން ދ. ވާނީގައި ޤާއިމުކުރާ މަރުކަޒުގައި އެއްފަހަރާ 400 ކުދިން ބައިތިއްބައިގެން ރީހެބިލިޓޭޓް ކުރެވޭނެއެވެ. މި މަރުކަޒުގައި ކުދިންނަށް ދީނީ، ތަޢުލީމީ އަދި އެހެނިހެން ހުނަރުތައް ދަސްކޮށްދިނުމުގެ ޕްރޮގްރާމްތައް ހިންގުމަށް ވަނީ ރޭވިފައެވެ. މި މަރުކަޒުގައި ތިބޭ ކުދިން 18 އަހަރު ފުރެންދެން އެތަނުގައި ތިބުމަށްފަހު، ދިވެހި ފުލުހުންގެ ޚިދުމަތުގައި ނުވަތަ ދިވެހި ސިފައިންގެ ޚިދުމަތުގައި ވަކި މުއްދަތަކަށް ޚިދުމަތްކުރަން ޖެހޭނެއެވެ.
ސަރުކާރުން ވަނީ ކުޑަކުދިންގެ ޢަދުލުގެ ނިޒާމު ހަރުދަނާކުރުމުގެ ގޮތުން ޖިނާއީ ކުށުގެ ޒިންމާ ނަގަންޖެހޭ އުމުރު 15 އަހަރުން 12 އަހަރަށް ދަށްކުރުމަށް ނިންމާފައެވެ. މިގޮތަށް ނިންމީ 12-15 އަހަރާ ދެމެދުގެ ކުދިން ކުށްތަކަށް އަރައިގަތުން އިތުރުވެފައިވާތީ ކަމަށް ވަޒީރު ވިދާޅުވިއެވެ. ނަމަވެސް، މި އުމުރުފުރާގެ ކުދިން ޖަލަށްލުމުގެ ވިސްނުމެއް ނެތްކަމަށާއި، އެކަން ޤާނޫނުގައި ސާފުކޮށް ބަޔާންކުރާނެ ކަމަށް ދާޚިލީ ސަލާމަތާބެހޭ ވުޒާރާއިން ބުނެފައިވެއެވެ.
