އިންތިގާލީ އިންސާފަކީ "ޓްރާންސިޝަނަލް ޖަސްޓިސް"އެވެ. ނުވަތަ ފާއިތުވެ ގޮސްފައިވާ ދިގުމުއްދަތެއްގައި، އަނިޔާލިބުނު މީހުން، އެބައެއްގެ އިންސާނީ ހައްގުތަށް ގެއްލި، އެހައްގުތައް ކަށަވަރުކުރެވޭނެ އެއްވެސް މަގެއްނެތި، މާޔޫސްވެ، އިންސާފަށް އެދި ގޮވަމުންދާ އެތައްބަޔަަކަށް އިންސާފު ލިއްބައި ދިނުމަށްޓަކާ، ގާއިމް ކުރެވޭނިޒާމެވެ.

އެނިޒާމަކީ، މާޒީން އިންސާފު ލިއްބައިދޭ ނިޒާމަކަށްވައިރު، މި އިންސާފު ކަށަވަރު ކުރުމަށްޓަކާ އެކުލަވާލެވޭ ނިޒާމް ވާންޖެހެނީ އޭގެ ޒާތުގައިވެސް އިންސާފްވެރި ނިޒާމަކަށެވެ.

ސަބަބަކީ، އިންސާފު ހޯދާދިނުމަށް ކުރެވޭ ކޮންމެ މަސައްކަތަކީވެސް، އަބަދުވެސް ދެފަރާތެއްގެ ހައްގުތައް އޭގައި އެކުލެވިގެންވާ، އަބަދުވެސް ކޮންމެވެސް އެއް ފަރާތެއްގެ ޝަކުވާތަކާއި އުދާސްތައްވެސް އޭގައި އެކުލެވިގެންދާނޭ މަސައްކަތަކަށް ވާތީއެވެ. އަދި އެއީވެސް، ކުރެވިގެންދާ ޝަރީއަތަކަށް ވާއިރު، މިޝަރީއަތަކީ، އިންސާފްވެރި ޝަރީއަތެއްކަން ގަބޫލު ކުރެވެންޖެހޭނީ، ވަކީލުންނާއި އަދި މުވައްކިލުންނަށް އެކަންޏެއް ނޫނެވެ. ދުރުތިބީންނަށްވެސް، އިންތިގާލީ އިންސާފުގެ ނިޒާމުގެ ތެރެއިން އިންސާފު ލިބެމުންދާތަން ފެނި، އެކަމުގެ އިހުސާސްތައް ކުރެވެންވެސް ޖެހޭނެއެވެ.

ގައުމުތަކުގައި އިންތިގާލީ އިންސާފު ކަށަވަރު ކުރެވުނީ ކިހިނެއް؟

ދުނިޔޭގައި ހުރިހާ ޒަމާނެއްގައިވެސް، ހުރިހާ ގައުމެއްގައިވެސް، އިންސާނިއްޔަތާ ޚިލާފު ޖަރީމާތައް ހިގާފައި އެބަހުއްޓެވެ. އެކި ޒަމާންތަކުގައި، އެކި ގައުމުތަކުގައި، އެކި މިންވަރަށެވެ.

މިސާލެއްގެ ގޮތުން، ފަހުގެ ޒަމާންތަކުގައި، އިންސާނިއްޔަތާއި ޚިލާފު ބޮޑެތި ޖަރީމާތައް، ނުވަތަ އިންސާނީ ހައްގުތައް ދިގު ޒަމާންތަކެއް ވަންދެން ގެއްލިގެން ދިޔަ ގައުމުތަކަށް ބަލާއިރު، ސައުތު އެފްރިކާއަށް ބަލަމާތޯއެވެ. ސައުތު އެފްރިކާއެވެ. އެގައުމުގެ ކަޅު ނަސްލުގެ މީހުންނަކީ އެގައުމުގެ އެންމެ ބޮޑު އާބާދީއެވެ. މުޅި އާބާދީގެ %79.0 މީހުންނަކީ ކަޅު ނަސްލަށް ނިސްބަތްވާ މީހުންނެވެ. ދޮން މީހުންގެ އާބާދީއަކީ އެންމެ %8.9 އެވެ.

އެތައް ޒަމާނެއްވަންދެން، ގަދަބާރުން، ވަކި ކުލައަކަށް ނިސްބަތްވީތީވެ ހައްގުތައް ނިގުޅައިގަނެވުނު، ކަޅު ނަސްލުގެ އެގައުމުގެ ރައްޔިތުންނަށް މިނިވަންކަން ލިބިގެން ދިޔައީ 1994 ވަނަ އަހަރުއެވެ. މިނިވަންކަމަށްޓަކާ، އެތައްކެއް އަހަރުތަކެއް ވަންދެން، ކަޅުނަސްލުގެ ލީޑަރު އެތަކެއް ގުރުބާނީތަކެއް ވެވަޑައިގެންނެވިއެވެ. އެގައުމުގައި އޮތް ނަސްލީ ފަތާތުކުރުންތައް ނައްތާލުމުގެ މަސައްކަތުގައި، ކަޅު ނަސްލުގެ ލީޑަރު ނެލްސަން މަންޑޭލާ 27 އަހަރު ޖަލުގައި އޮންނެވިއެވެ.

މި ހުރިހާ މަސައްކަތަކަށްފަހު، ނަސްލީ ތަފާތު ކުރުންތައް ނައްތާލާ، ދެކުނު އެފްރިކާގައި ހުރިހާ ނަސްލަކުން ހިއްސާވާ ވެރިކަމެއް އުފެއްދެވީވެސް މަންޑޭލާއެވެ. އޭނާގެ އެންމެ ފުރަތަމަ ކެބިނެޓުގެ ނާއިބު ރައީސަކަށް ހަމަޖެއްސެވީ، އެގައުމުގައި އެންމެފަހުން ވެރިކަން ކުރެއްވި ދޮން މީހުންގެ ނަސްލަށް ނިސްބަތްވެ ވަޑައިގެންނެވި އެފްޑަބްލިއު ޑެކްލާލެވެ. ދޮން ނަސްލުގެ ވަޒީރުން ކެބިނެޓުގައި ހިމެނުއްވިއެވެ.

އެއަށްފަހު، "އެޕާތޭޑް ތެދު ބުނުމާއި މާފްކުރުމުގެ ނިޒާމެއް"ގެ ދަށުން އިންތިގާލީ އިންސާފުގެ ދޮރު ހުޅުއްވާ ދެއްވިއެވެ. މި ނިޒާމުގެ ތެރެއިން، އަނިޔާ ލިބުނު ފަރާތްތަކާ، އަނިޔާ ދިނުމުގައި ބައިވެރިވި ފަރާތްތަކަށް ތެދުބަހުން ވާހަކަ ދެއްކުމަށް ފުރުސަތު ލިއްބައިދިނެވެ. މުޅި ނިޒާމު ބައްޓަންވެގެން ދިޔައީ މާޒީގައި ހިގާފައިވާ ކަންކަން ހޯދާ ބެލުމާއި، މާފް ކުރުމާއި، ދައުވާ އުފުލާ އަބަދު ތަންފީޒު ކުރުމުގެ މައްޗަށެވެ.

މިހާލަތުގައި، މުޅި އިންތިގާލީ އިންސާފުގެ އަސްލު މަގުސަދަކަށް ވެގެން ދިޔައީ އެއްޒަމާނެއްގެ ދެކޮޅުވެރީން އުލު ބޭންދުމެއް ނޫނެވެ. އަދަބުދީ ހަސަދަ ފިލުވުމެއްވެސް ނުމެނޫންމެއެވެ. މުޅި ނިޒާމުގެ އަމާޒަކަށްވެގެން ދިޔައީ މާޒީން އިބުރަތް ހާސިލްކޮށް، ގައުމުގައި ސުލްހަ މަސަލަސްކަން ގާއިމްކޮށް، ކުރިޔަށް ދިއުމުވެ. މުސްތަގުބަލެއް ހޯދުމެވެ. މިމަގުސަދު އެގައުމަށް ހާސިލްވި އެންމެ ބޮޑު އެއްސަބަކީ އިންސާފަށް ލޯބިކުރާ ތެދުވެރި ވެރީންތަކެއް، އިންތިގާލީ އިންސާފު ކަށަވަރު ކުރުމަށްޓަކާ ކަމަރު ބެންނެވުމެވެ.

ދިވެހި ރާއްޖޭގައި އިންތިގާލީ އިންސާފުގެ ވާހަކަ މިދެކެވެނީ މިބީދައިން ބާވައެވެ؟ ވެރިންގެ އިޚްލާސްތެރިކަމާއި، ކުޅެދުންތެރިކަން ހުރީ ކޮން މިވަރަކުން ބާވައެވެ؟ ހަސަދައިން ފޯވެތިބެ، ސިޔާސީ ކުޅިފަސް ހޯދުން ނޫން އެހެން ބޭނުމެއް މިރާއްޖޭގައި އެބައޮތްބާވައެވެ؟

ދިވެހިރާއްޖޭގެ ޙާލަތު

އިންތިގާލީ އަދާލަތުގެ ގާނޫނު ރައްޔިތުންގެ މަޖިލީހުން ފާސް ކޮށްފައިވަނީ 1953 ވަނަ އަހަރުން ފެށިގެން ލިބިފައިވާ އަނިޔާތައް ބެލޭނެ ގޮތަށް ކަމަށް ބުނެވެއެވެ.

ތެދެކެވެ. އިންސާފުލިބެންވީ ކޮންމެހެނެއް 1953 ވަނަ އަހަރުން ފެށިގެނެއްވެސް ނޫނެވެ. އިންސާފު ހޯދުމަށް، ނުވަތަ ލިބުމަށް ވަކި މުއްދަތެއްވެސް އޮންނާކަށް ނުޖެހެއެވެ. އިންސާފު ލިބުމަކީ ހުރިހާ މާނައެއްގައިވެސް އިންސާފު ލިބުމެވެ. އިންސާފު ދޭން އިންނަ މީހާ ކުށެއްކުރިވި ކަމުގައިވި ނަމަވެސް އޭނާގެ މައްޗަށްވެސް އިންސާފު ގާއިމް ކުރެވިގެން ދިއުމެވެ.

އިބްރާހިމް ނާސިރުގެ ދައުރުގައި ރައީސް މައުމޫން ޖަލަށް ލެވުނެވެ. އިންތިގާލީ އިންސާފުގެތެރެއިން އިންސާފު ލިބެން ޖެހެއެވެ. ރައީސް މައުމޫނުގެ ދިގު 30 އަހަރުގެ ތެރޭގައި އެތައްބަޔަކު ޖަލަށް ލެވި، ލާއިންސާނީ އަނިޔާތައް ލިބިގެން ދިޔައެވެ. އިންތިގާލީ އިންސާފުގެ މަގުން އިންސާފު ކަށަވަރުވާން ޖެހޭ އެތައްބަޔަކު އެބަތިއްބެވެ.

ރައީސް މައުމޫނުގެ ދިގު 30 އަހަރަށްފަހު ވެރިކަމަށް ވަޑައިގެންނެވުނީ ރައީސް ނަޝީދަށެވެ. ދައުރެއް ފުރިހަމަ ނުކުރެއްވުނު ކަމުގައިވި ނަމަވެސް، އެބޭފުޅާގެ ވެރިކަމުގައިވެސް، އަބުދުﷲ ގާޒީ ނިޒާމުން ގެއްލުވާލީއެވެ. ރައީސް ޔާމިން އާރަށުގައި ބަންދު ކުރެއްވީއެވެ. ބޮޑެތި އެތަކެއް މުޒާހަރާތަކެއް ކުރެވި އެތަކެއް ބަޔަަކަށް އަނިޔާވިއެވެ. އިންތިގާލީ އިންސާފުގެ މަގުން އިންސާފު ލިބެން އެބަޖެއެވެ.

ރައީސް ނަޝީދަށްފަހު ދެން ރައީސްކަމަށް ވަޑައިގެންނެވީ ރައީސް ވަހީދެވެ. ފުރިހަމަ ދައުރެއްގައި ވެރިކަން ކުރައްވާފައި ނުވިނަމަވެސް، ވެރިކަމެއް ވައްޓާލުމުގެ ތުހުމަތު ރައީސް ވަހީދުގެ މައްޗަށް ކުރެވެއެވެ. ރާއްޖޭގައި އޭރު ކުރެވިގެންދިޔަ ބޮޑެތި މުޒާހަރާތަކުގައި، އެތައް ބަޔަކަށް ބޮޑެތި އަނިޠާކަތެއް ލިބިގެންދިޔައެވެ. މި އެންމެންވެސް އަދިވެސް ވަކާލާތު ކުރަމުންދަނީ، ލިބުނު އަނިތާތަކަށް އިންސާފު ލިބެންޖެހޭނެ ކަމަށެވެ.

ރައީސް ވަހީދަށްފަހު ވެރިކަމަށް ވަޑައިގެންނެވީ، ރައީސް ޔާމީނެވެ. އުފެދިގެން ދިޔަ ސިޔާސީ ޚިޔާލުތަފާތުވުން ތަކުގައި އެންމެފަހުން، އަމިއްލަފުޅު ބޭބޭފުޅުވެސް ޖަލައް ލެއްވީއެވެ. ރައީސް ނަޝީދުވެސް ޖަލަށް ލެއްވީއެވެ. ޖުމުހޫރީ ޕާޓީގެ ލީޑަރު ގާސިމް އިބުރާހީމާ، މަޖިލިސް މެމްބަރުންނާ، މިހެންގޮސް ސިޔާސީ ހުރިހާ ވާދަވެރިން ކަހަލަގޮތަކަށް ލެއްވީ ޖަލަށެވެ. މިއެންމެންމެ އަދިވެސް، އެދި ގޮވަމުންދަނީ، މި އަނިޔާތަކަށް އިންސާފު ހޯއްދެވުމަށެވެ.

ރައީސް ޔާމިންގެ ވެރިކަން ނިމި، ރައީސް އިބުރާހިމް މުހައްމަދު ސޯލިހުގެ ވެރިކަމެވެ. މިއަދު ރައީސް ޔާމިން އޮންނެވީ ޖަލުގައެވެ. އެމަނިކްފާނުގެ ޕާޓީންނާ، ތާއީދުކުރާ ފަރާތްތަކުން އެދި ގޮވަމުންދަނީ އިންސާފަށެވެ.

މާދަމާގެ ހާލަތަކީ ކޮބައިތޯއެވެ. މިއަދުގެ އިދިކޮޅު ފަރާތްތަކުން ބުނަމުންދަނީ އެންމެ ވާހަކައެކެވެ. ފުރަތަމަ ދުވަހުން ފެށިގެން އިބުރާހިމް މުހައްމަދު ސާލިހު އޮންނަވާނީ ޖަލުގައިކަމެވެ.

މިއީ އަޅުގަޑުމެން ހާލަތެވެ. ވަށައިގެން ތިބިހާ ބަޔަކު އެއްބައަކު އަނެއް ބައެއްގެ ކިބައިން އެދި ގޮވަމުންދަނީ އިންސާފަށެވެ. އެއްބަޔަކު އަނެއްބައެއްގެ މައްޗަށް ކުރަމުންދަނީ އަނިޔާގެ ތުހުމަތެވެ. އެއްބަޔަކު އަނެއް ބައެއްގެ މައްޗަށް ހިފަމުންދާ އަހުދު ކަށަވަރަކީ ބަދަލު ހިފުމާއި، ޖަލަށް ލުމެވެ. ފެންނާން އޮތްހާވެސް ކަމަކީ ކޮޅުނެތް ކޮޅަށް ހަސަދަވެރިކަމެވެ.

އިންތިގާލީ އިންސާފުގެ ބިލް

ސިޔާސީ ނުފޫޒުން އެއްކިބާ ވެފައޮތް، އިންސާފުގެ ބިލަކުން މެނުވީ، އިންސާފު ނުލިބޭނެކަން މިއީ، އެއްވެސް އޮޅުމެއް އޮތް ކަމެއް ނޫނެވެ.

ރާއްޖޭގަ އުފެދިފަ އޮތް މިނިވަން މުވައްސަސާތަކުގެ ތެރެއިންވެސް، އިންސާފުގެ ރަހަ ނުދީގެން މިއުޅެނީވެސް މިސަބަބަށްޓަކައެވެ. މުވައްސަސާތަކަށް މެމްބަރުން އައްޔަން ކުރަނީ ސިޔާސީ ކުލަވަރު އިންތިހާއަށް އެތަނެއްގައި ޖެހިފައޮތް، ރައްޔިތުންގެ މަޖިލީހުންވެ.

މިމަގާމްތަކަށް އައުމަށްޓަކާ، މެމްބަރުންގެ ފައިބުޑަށް ވެއްޓި، މަގާމާ ހަވާކުވުމުގެ ކުރިން ސިޔާސީ އަހުދު ކަށަވަރު، މަގާމްތަކަށް ވަޑައިގަންނަވާ ބޭފުޅުން ހިތްޕަވައެވެ. މިނިވަން މުވައްސަސާތަކަށް ވަޑައިގަންނަވާ މެމްބަރުންނަކީ، އެއްވެސް ސިޔާސީ ޕާޓީއެއްގައި ނުހިމެނޭ މެމްބަރުންނަށް ވާންޖެހޭނެ ކަމަށް ލިޔެފައި އޮންނަނީ ގާނޫނުގައެވެ. ހުރިހާ މެމްބަރުންވެސް ތިއްބަވަނީ، ސިޔާސީ ޕާޓީތަކާ އިބުލީހުގެ ކައިވެނި ކުރައްވައިގެންނެވެ.

އިންތިގާލީ އިންސާފުގެ ބިލުގައިވާގޮތުން، މިއިންސާފު ގާއިމް ކުރުމުގެ އެންމެ މުހިންމު ދައުރެއް އަދާކުރާނީ އޮމްބަޑްސްމަނެވެ. އޭނާގެ އޮފީހެއް ހުންނާން ޖެހެއެވެ. އޭނާގެ އޮފީހުން ތަހުގީގު ހިންގާނެއެވެ. ހިންގުމަށްފަހު، މަދަނީ ދައުވާ ކުރަންޖެހޭ ފަރާތްތައް އޭނާ ކަޑައަޅަންޖެހެއެވެ. އަދި ކުށްވެރިވާ ފަރާތްތަކުގެ މައްޗަށް އޭނާ ދައުވާކުރަން ފޮނުވައެވެ.

ލިބެން އޮތް އިންސާފަކީ ކޮބައިތޯ؟

އިންތިގާލީ އިންސާފުގެ ގާނޫނު ބުނާގޮތުން، އޮމްބަޑްސްމަނަކީ އެއްވެސް ސިޔާސީ ޕާޓީއަކަށް ނިސްބަތްވާ މީހަކަށް ވެގެން ނުވާނެއެވެ. މައްސަލައެއް ނެތެވެ. މިއަދު ދިދަ ހިފައިގެން މަގުމައްޗަށް ނިކުމެ، ހިތްފުރެންދެން މުޒާހަރާ ކުރުމަށްފަހު، ގެއަށްވަދެ، ސިޔާސީ ޕާޓީން ވަކިވެ، މާދަމާ ކޯޓު ފަޓުލޫނުގައި އޮމްބަޑްސްމަނުގެ މަގާމުގެ ހުވާ ކުރައްވަން ވަޑައިގަންނަވަންވީއެވެ.

އެއަށްފަހު އޮމްބަޑްސްމަން މި އިށީދެ ވަޑައިގަންނަވަނީ، އެތައް ބައެއްގެ ޝަކުވާތައް އަޑު އައްސަވާ، ބައިގަރުނުވީ އެތަކެއް ބޮޑެތި މައްސަލަތަކެއްގެ އިންސާފު ހޯދާދީ، ލާއިންސާނީ އަނިޔާ ލިބުނު އަތައް ބައެއްގެ ކެކުޅުންތަކަށް ހައްލު ހޯއްދަވާ ދެއްވުމަށެވެ.

ހަގީގަތަކީ ކޮބައިތޯއެވެ؟ ވުން އެންމެ ގާތް ގޮތަކީ މިއީއެވެ. މިފަދައިން އެކަށްއެޅޭ ނިޒާމެއްގައި، އިންސާފު ހޯދާދިނުމަށް އިންވާ ބޭފުޅާ ވުން އެންމެ ގާތީ، ޚުދު އެބޭފުޅާގެ މައްޗަށް އެންމެ ފުރަތަމަ އިންސާފު ގާއިމް ވާންޖެހޭ ބޭފުޅާ ކަމުގައި ވެގެން ދިއުމެވެ.

އާދެ! މިއީ، އިންތިގާލީ އިންސާފު ހޯދާދިނުމަށް އަޅުގަޑުމެން މިއެކަށައެޅި ނިޒާމު އަސްލު ހާލަތެވެ.

އިންތިގާލީ އިންސާފުގެ ބަދަލުގައި ހިފާނީ ބަދަލު!

އިންތިގާލީ އިންސާފަކީ، އިންސާފަށް ލޯބި ކުރާ ވެރިންގެ އަތްމަތިން ލިބިގެންދާ އެއްޗެކެވެ.

ގައުމަށް އިޚްލާސްތެރި، ޒާތީ ހަސަދައާއި ތައައްސުބުން އެއްކިބާވެ ތިބި ވެރީންނަށް މެނުވީ ގާއިމް ކުރެވޭނެ ނިޒާމެއް ނޫނެވެ. ތިމާމެންގެ ހިތުގައި، ކުރަން އޮތްކަމަކީ، ވެރިކަން ނޫން އެހެންކަމެއް ނެތި، ހިތުން ހިތްތިރިކަމަށް ހެދިގެން، ކަމުން އެންމެ ޚުދުމުޚްތާރު ވެރީންނަށް އަމުދުން ގާއިމު ކުރެވޭނޭ ޒާތުގެ ނިޒާމެއް ނޫނެމެވެ. އަދި ކަމުގެ ހަގީގަތަކީވެސް އެއީއެވެ. އެފަދަ ވެރީންނަކީ، ހަގީގަތުގައި އިންތިގާލީ އިންސާފު ހޯއްދަވާ ދެއްވުމުގެ މަގުސަދުގައި އިންތިގާލީ އިންސާފުގެ ވާހަކަ ދައްކަވާ ވެރީންނެއްވެސް ނުމެ ނޫންމެއެވެ.

އިންތިގާލީ އިންސާފުގެ ނަމުގައި ގާނޫނެއް ހަދާ، ކަރުދާހުގެ ސިފައިގައި އެގާނޫނު އޮތެއްކަމަކު، އެކަރުދާހަކަށް، އެއްވެސް މީހަކަށް ހޯދާދެވޭނެ އިންސާފެއް ނޯންނާނެެވެ.

ދުނިޔޭގެ ގައުމުތަކުގައި، އިންތިގާލީ އަދާލަތު ގާއިމްވެގެން ގޮސްފައިވަނީ، ވަރަށް ހަރުދަނާ، ހިތްތެރި، ކެތްތެރި ވެރީންގެ އަތްމަތިންނެވެ.

އިންތިގާލީ ބިލު މަޖިލީހުން ފާސްކުރެއްވުމަށްފަހު، ޓީވީ ޕްރޮގްރާމުގައި ވާހަކަ ދައްކަވަމުން، އެމްޑީޕީގެ ޕާލަމެންޓްރީ ގްރޫޕްގެ މެމްބަރު، އިމްތިޔާޒު ފަހުމީ ވިދާޅުވެފައިވަނީ، އިންތިގާލީ އިންސާފުގެ ބިލުގެ މަހުފޫމުގެ ތެރެއަށް، ރައީސް ނަޝީދުގެ ދައުރުގައި އަބުދުﷲ ގާޒީ ނިޒާމުން ގެއްލުވާލި ގެއްލުވާލުން ވަދެގެން ނުދާނެ ކަމަށެވެ.

އިންތިގާލީ އިންސާފުގެ ބިލުން ބެލޭނެ މައްސަލަތަކާއި، ނުބެލޭނެ މައްސަލަތަކުގެ ވާހަކަ އެންމެ ފުރަތަމަވެސް ވިދާޅުވާން މިފެއްޓެވީ މިބިލް ކޮށާމަށާ، މިބިލް، މެޖޯރިޓީ އޮތް ބަޔަކު ބޭނުންވާ ގޮތަކަށް ބައްޓަންކޮށް، މިބިލް ފާސްކުރުމަށް ވޯޓުވެސް ދެއްވި ބޭފުޅުންނެވެ.

އެހެންކަމުން އިންތިގާލީ އިންސާފުގެ ބިލުން އިންސާފު ލިބިގެންދާނޭ މިންވަރު ވަޒަންކޮށްލަން އަދި ތަންކޮޅެއް ދައްޗެވެ.

އިންސާފަކީ، އަބަދުވެސް، ގައުމުގެ ސުލްހަ މަސްލަހަތާއި ނުހަނު ބޮޑަށް ގުޅި ލާމެހިފައި އޮންނަ ކަމަކަށް ވާއިރު، އިންސާފު ހޯދާދިނުމުގެ ނަމުގައި، އެއްބައެއްގެ އިންސާފު ގެއްލުވާލެވިއްޖެނަމަ، ހޯދަން އުޅުނު އިންސާފު ވެގެން ދާނީ ބޯންޖެހޭ ހިތި ޒަހަރަކަށެވެ. އެހަޒަހަރުގެ ހިތިރަހަ ލާނީ ވަކިބައެއްގެ އަރުތެރޭގައި ކަމަށް ހީކުރުމަކީ، ހެދޭނެ އެންމެ ބޮޑު ގޯހެވެ.

ގިނަފަހަރަށް، ހޯދާދޭން އުޅުނު އިންސާފު، އެބުރި އައިސް، އެންމެ ގާތީ ތިމާމެންގެ އަމިއްލަ ކަރުގައި ހިފުމެވެ.