މިހާރު ރާއްޖެއަށް ކުރަމުންދާ ވިއްސާރައިގައި އެންމެ ގިނައިން ވާރޭވެހުނު ސަރަޙައްދަކީ ރާއްޖޭގެ އުތުރު ކަމަށް މޫސުމާބެހޭ ޤައުމީ މަރުކަޒުން ހާމަކޮށްފިއެވެ. އެގޮތުން މޫސުމާބެހޭ ޤައުމީ މަރުކަޒު ހާމަކޮށްފައު¥ިވާ ގޮތުގައި، ވޭތުވެދިޔަ ދުވަހު އެންމެ ބޯކޮށް ވާރޭވެހުނު ރަށަކީ ތިލަދުންމަތީ އުތުރުބުރީ ކެލާއަށެވެ. އެރަށަށް 231.5 މިލިމީޓަރުގެ ވާރޭ ވެހުނެވެ.
ދެވަނައަށް އެންމެ ބޯކޮށް ވާރޭވެހުނީ ތިލަދުންމަތީ ދެކުނުބުރީ ހަނިމާދޫއަށެވެ. އެރަށަށް 177.5 މިލިމީޓަރުގެ ވާރޭ ވެހުނެވެ. ހދ. ކުޅުދުއްފުށްޓަށްވެސް ވަރަށް ބޯކޮށް ވާރޭވެހި، 77.8 މިލިމީޓަރުގެ ވާރޭ ރެކޯޑުކުރެވުނެވެ.
މެދުރާއްޖެތެރޭގައި އެންމެ ބޯކޮށް ވާރޭވެހުނު ރަށަކީ މާޅޮސްމަޑުލު އުތުރުބުރީ އިފުރެވެ. އެރަށަށް 102 މިލިމީޓަރުގެ ވާރޭ ވެހުނެވެ.
ރާއްޖޭގެ އުތުރު ސަރަޙައްދުގައި ވިއްސާރައިގެ މިންވަރު ބޮޑުވެފައިވާއިރު، މެދު ރާއްޖެތެރޭގައި ވެސް ފާހަގަކޮށްލެވޭ މިންވަރަކަށް ވާރޭވެހިފައިވާކަން ފާހަގަ ކޮށްލެވެއެވެ.
