ގުޅީ ފަޅުން ބިންލިބުނު ފަރާތްތަކަށް ބިން ހަވާލުކުރެވޭނެ ވަކި ތާރީޚެއް މިވަގުތު ކަނޑައެޅިފައި ނެތް ކަމަށް ބޯހިޔާވަހިކަމާ ބެހޭ ވަޒީރު ޑރ. އަލީ ހައިދަރު ވިދާޅުވެއްޖެއެވެ.
ވަޒީރު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ކުރެއްވި ސުވާލަކަށް ޖަވާބު ދެއްވަމުންނެވެ.
ވަޒީރު ފާހަގަކުރެއްވި ގޮތުގައި ގުޅީފަޅުގެ ބިން ހިއްކުމުގެ މަސައްކަތް އަދި ނުނިމޭކަމާއި، މާލެ-ތިލަފުށި ބްރިޖުގެ މަސައްކަތަށް އެ ސަރަހައްދު ބޭނުންކުރަމުންދާ ކަމަށެވެ. އަދި ބްރިޖުގެ މަސައްކަތް ނިމޭނެ ކަމަށް ލަފާކުރެވެނީ އަންނަ އަހަރުގެ ސެޕްޓެމްބަރު މަހުގެ ތެރޭގައި ކަމަށާއި، ގުޅީފަޅުން ކުރިން ދޫކޮށްފައިވާ ގޯތިތަކުގެ ކަށިމުޑިތައް ހަލާކުވެފައިވާ ކަމަށްވެސް ވިދާޅުވިއެވެ.
އިތުރުން، ވަޒީރު ވިދާޅުވީ ގުޅީފަޅުގެ ބިން ބޭނުންކުރާނެ ގޮތުގެ ޕްލޭނެއް އެކުލަވާލައި، އެ ޕްލޭން ފާސްކުރުމުގެ މަރުހަލާގައި މިހާރު އުޅޭ ކަމަށެވެ. އަދި ގިރާވަރު ފަޅުން ގޯތި ލިބުނު ބައެއް ފަރާތްތައް ގުޅީފަޅަށް ބަދަލުކުރަން ޖެހޭ ކަމަށާއި، ކުރީގެ ސަރުކާރުން ދޫކޮށްފައިވާ ގޯތިތައް ހުރީ ކަނޑާއި ފަޅުގައި ކަމަށްވާތީ، އެ ސަރަހައްދު ހިއްކުމަށްފަހު ނޫނީ ގޯތި ހަވާލު ނުކުރެވޭނެ ކަމަށްވެސް ވިދާޅުވިއެވެ.
ވަޒީރު އިތުރަށް ވިދާޅުވީ، ގުޅީފަޅުގެ ބިން ހިއްކުމުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށް ގެންދިއުމަށް މަޝްވަރާކުރަމުންދާ ކަމަށާއި، އަދިވެސް 85 ހެކްޓަރުގެ ބިން ހިއްކަން އޮތް ކަމަށެވެ. ބިން ހިއްކައި ނިމުމުން ގޯތި ހަވާލުކުރެވޭނެ ކަމަށް ވިދާޅުވި ނަމަވެސް، ހަވާލުކުރެވޭނެ ވަކި ތާރީޚެއް މިވަގުތު ކަނޑައެޅިފައި ނެތް ކަމަށް ވަޒީރު ވިދާޅުވިއެވެ.
ނިމޭނެ ވަކި ދުވަހެއް ވިދާޅެއް ނުވޭ، 85 ހެކްޓަރު އަދި ހިއްކަން އެބައޮތް، އެ ހިއްކައި ނިމުނީމަ އެތަނުން ގޯތި ހަވާލުކުރެވޭނީ، ހަވާލުކުރެވޭ ވަކި ތާރީހެއް މިވަގުތު ދަންނަވަން ދަތި، ލޭންޑް ޔޫސް ޕްލޭން ފާސްކޮށް އެއަށް އަމާޒުކޮށް ސާވޭއެއްކޮށްފަ ބިން ކަނޑައެޅިދާނެ، ނަމަވެސް އެތަނުގައި ޖަހާ ކަންމުޑިތައް ހުންނާނެ ކަމުގެ ޔަގީންކަމެއް ނެތް، އެހެންކަމުން އަލުން ހަރަދުކޮށްގެން ފަހުން އެކަން ކުރަންޖެހޭއިރު މިވަގުތު އެކަންކުރަން އެކަށީގެނެއް ނުވޭ، ބުރިޖު މަސައްކަތްކުރަމުންދާތީ.
މިނިސްޓަރު ވިދާޅުވިއެވެ.
