މި ސަރުކާރުން އާ މަޝްރޫޢުތައް ނުފެށި ލަސްވަނީ ކުރީ ސަރުކާރުގެ ނުނިމި ހުރި މަޝްރޫޢުތަކަށް އިސްކަންދޭންޖެހޭތީ ކަމުގައި ރާއްޖޭގެ ބޯހިޔާވަހިކަމާބެހޭ ވަޒީރު އަލީ ހައިދަރު ވިދާޅުވެއްޖެއެވެ.
ވަޒީރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ކުރީގެ ސަރުކާރުން ދޫކުރި ފްލެޓުތަކާއި ގޯތިތަކާ ގުޅޭ ސުވާލުތަކަށް ޖަވާބުދެއްވަމުންނެވެ.
ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ އައު މަޝްރޫޢުތަކާއި ކުރީގެ ސަރުކާރުން ދޫކުރި ބޯހިޔާވަހިކަމާ ބެހޭ ގޮތުން ކުރެއްވި ސުވާލުތަކަށް ޖަވާބު ދެއްވަމުން، ވަޒީރު ވިދާޅުވީ ކުރީގެ ސަރުކާރުން ދޫކޮށްފައިވާ ފްލެޓުތަކާއި ގޯތިތަކަށް ބަދަލެއް ނުގެންނާނެ ކަމަށެވެ. އަދި އޭގެ ޙައްޤުވެރިންނަށް އެ ތަންތަން ލިބޭނެކަން ޔަޤީންކަމާއެކު ވިދާޅުވިއެވެ.
މި ސަރުކާރާ ހަވާލުވީއިރު ވަރަށް ގިނަ މަޝްރޫއުތައް ފެށިފައި ހުރި، ހުއްޓިފައި ހުރީ. އެހެންވީމާ އަޅުގަނޑުމެންނަށް އެހެން މަޝްރޫއަކައިގެން ކުރިއަށް ގެންދެވެން އޮތީ އެ މައްސަލަތައް ހައްލުކޮށް، އެ މައްސަލަތަކަށް ގޮތެއް ހޯދައިދީފާ ކަމަށް، އަޅުގަނޑުމެން އެންމެ ބޮޑު އިސްކަމެއް ދޭންޖެހޭނީ އެ ކަމަށް، ކަމަށް ދެކޭތީ އެ މަސައްކަތް މިހާރު ކުރަމުން މި ގެންދަނީ.
ވަޒީރު ވިދާޅުވިއެވެ.
ވަޒީރު ވިދާޅުވީ މި ސަރުކާރުން ވެރިކަމާ ހަވާލުވިއިރު ގިނަ މަޝްރޫޢުތަކެއް ހުރީ ފަށައި، ހުއްޓިފައި ކަމަށެވެ. އެހެންކަމުން، އެ މަޝްރޫޢުތަކަށް ހައްލު ހޯދުމަށް އިސްކަންދޭންޖެހޭ ކަމަށް ވަޒީރު ފާހަގަކުރެއްވިއެވެ.
އެހެންނަމަވެސް، މި އަހަރު ނިމުމުގެ ކުރިން ސަރުކާރުން ބޯހިޔާވަހިކަމުގެ ބޮޑު މަޝްރޫޢެއް ފަށާނެކަމަށް ވަޒީރު ވިދާޅުވިއެވެ. އިތުރު ތަފްސީލު ހާމަނުކުރެއްވި ނަމަވެސް، ސަރުކާރުގެ އަމާޒަކީ ވެރިކަމުގެ ފަސް އަހަރު ނިމޭއިރު މުޅި ރާއްޖޭގައި 85,000 ހައުސިންގ ޔުނިޓު އެޅުން ކަމަށް ވަޒީރު ހާމަކުރެއްވިއެވެ. މީގެ ތެރެއިން 30,000 ޔުނިޓު އަޅާނީ ރަސްމާލޭގައި ކަމަށްވެސް ވިދާޅުވިއެވެ.
