ނޯބެލް ސުލްޙަ އިނާމު ލިބިވަޑައިގެންފައިވާ އިޤްތިޞާދީ މާހިރު މުޙައްމަދު ޔޫނުސް، ބަންގްލަދޭޝްގެ ވަގުތީ ސަރުކާރުގެ އިސްވެރިޔާގެ ގޮތުގައި ހުވާކުރައްވައިފިއެވެ. ޔޫނުސް އިންތިގާލީ ވެރިޔާގެ ގޮތުގައި ހުވާ ކުރެއްވީ ބަންހްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ އިސްތިއުފާދެއްވައި އިންޑިއާއަށް ވަޑައިގަތުމަށްފަހު 3 ދުވަސް ފަހުންނެވެ.
84 އަހަރުގެ ޔޫނުސް ހުވާކުރެއްވީ ބުރާސްފަތި ދުވަހުގެ ރޭ ޑާކާގެ ރިޔާސީ ގަނޑުވަރުގައި ބޭއްވުނު ރަސްމިއްޔާތެއްގައެވެ. މި ރަސްމިއްޔާތުގައި ސިޔާސީ އިސްވެރިން، މަދަނީ ޖަމްޢިއްޔާތަކުގެ އިސްވެރިން، ޖެނެރަލުން އަދި ޑިޕްލޮމެޓުން ބައިވެރިވެވަޑައިގެންނެވިއެވެ.
"އަޅުގަނޑު ޤާނޫނުއަސާސީ ނަގަހައްޓައި، އެއަށް ތާއީދުކޮށް، އަދި ރައްކާތެރިކުރާނަމެވެ،" ރައީސް މުޙައްމަދު ޝަހާބުއްދީން ހުވާ ލާދެއްވުމަށްފަހު ޔޫނުސް ވިދާޅުވިއެވެ. އަދި އޭނާގެ މަސްއޫލިއްޔަތުތައް "އިޚްލާޞްތެރިކަމާއެކު" އަދާކުރައްވާނެ ކަމަށް ވިދާޅުވިއެވެ. ޔޫނުސްގެ ކެބިނެޓްގެ ދަށުން މަސައްކަތްކުރައްވާ ފަރާތްތަކުގެ މަޤާމުތަކަކީ ވަޒީރުންގެ ބަދަލުގައި ލަފާދޭ ފަރާތްތައް ކަމުގައި ހަމަޖައްސަވައި، 12 އަށް ވުރެ ގިނަ ބޭފުޅުން ހުވާކުރެއްވިއެވެ.
މި ވަގުތީ ސަރުކާރުގެ މަޤްޞަދަކީ މިހާރު އަމާންކަން ޤާއިމުކޮށް އައު އިންތިޚާބަކަށް ތައްޔާރުވުމެވެ.
މި ބޭފުޅުންގެ ތެރޭގައި ނާހިދު އިސްލާމް އަދި އާޞިފު މަޙްމޫދު ހިމެނެއެވެ. މި ދެބޭފުޅުންނަކީ ހަފްތާތަކެއްގެ މައްޗަށް ދެމިގެންދިޔަ، ހަސީނާ ވެރިކަމުން ދުރުކުރުމަށް ކުރެވުނު މުޒާހަރާތަކުގެ އިސް ދަރިވަރުން ކަމުގައިވާ "ސްޓޫޑެންޓްސް އަގެއިންސްޓް ޑިސްކްރިމިނޭޝަން" ގެ އިސްވެރިންނެވެ.
މީގެ އިތުރުން ކުރީގެ ޚާރިޖީ ސެކްރެޓަރީ ތައުހީދު ހުސައިން، އަދި ކުރީގެ އެޓަރނީ ޖެނެރަލް ޙަސަން ޢާރިފްވެސް ހިމެނެއެވެ. އިނާމު ލިބިވަޑައިގެންފައިވާ ތިމާވެށީގެ ޤާނޫނީ ވަކީލު ސައްޔިދާ ރިޒްވާނާ ޙަސަން، އަދި ޤާނޫނީ އިސް ޕްރޮފެސަރަކާއި ލިޔުންތެރިއެއްކަމަށްވާ އާޞިފް ނަޒްރުލްވެސް ހުވާކުރެއްވިއެވެ.
ހަސީނާގެ ސަރުކާރުން 2 އަހަރުގެ ޖަލު ޙުކުމެއް އިއްވާފައިވާ، އިންސާނީ ޙައްޤުތަކުގެ ފާހަގަކޮށްލެވޭ ހަރަކާތްތެރިއެއް ކަމުގައިވާ ޢަދިލް ރަޙްމާން ޚާންވެސް ލަފާދޭ ފަރާތެއްގެ ގޮތުގައި ހުވާކުރެއްވިއެވެ.
ހަސީނާގެ އަވާމީ ލީގު ޕާޓީގެ އެއްވެސް މަންދޫބެއް އެ ރަސްމިއްޔާތުގައި ބައިވެރިވެފައެއް ނުވެއެވެ.
ސަރުކާރުގެ ވަޒީފާތަކަށް މީހުން ހޮވުމުގައި ޢަމަލުކުރާ ކޯޓާ ނިޒާމަކީ ހަސީނާހެ ޕާޓީއާ ގުޅުން ހުރި މީހުންނަށް އިސްކަންދޭ ނިޒާމެއް ކަމަށް ފާޑުކިޔާ ފަރާތްތަކުން ބުނެ، ޖުލައި މަހުން ފެށިގެން ބޭއްވުނު ޤައުމީ ފެންވަރުގެ އިހުތިޖާޖުތަކަށް ފަހު ހަސީނާ ހޯމަ ދުވަހު އިސްތިއުފާ ދިނެވެ.
ނަމަވެސް މި މުޒާހަރާތައް އަވަހަށް ބޮޑުވެގެން ދިޔައީ ހަސީނާގެ 15 އަހަރުގެ ވެރިކަމަށް ކުރިމަތިވި ބޮޑު ގޮންޖެހުމަކަށެވެ. އެއީ އިތުރަށް ގޯސްވަމުން ދިޔަ އަނިޔާވެރިކަމުގެ ތެރޭގައި، ދަރިވަރުންނާއެކު 300 އަށް ވުރެ ގިނަ މީހުން މަރުވުމާ ގުޅިގެންނެވެ.
