ސްރީލަންކާ ޕޮދުޖަނަ ޕެރަމުނަ (އެސްއެލްޕީޕީ) ޕާޓީގެ ލީޑަރު އަދި ޕާލިމެންޓް މެމްބަރު ނަމާލް ރާޖަޕަކްސާ (38 އަހަރު) އަންނަ ރިޔާސީ އިންތިޚާބުގައި އެ ޕާޓީގެ ކެންޑިޑޭޓަކަށް ވާނެކަމަށް ބުދަ ދުވަހު އިއުލާނު ކުރާނެ ކަމަށް ރިޕޯޓުތައް ބުނެފިއެވެ. މިގޮތަށް ނިންމީ "ކެސިނޯ ކިންގް" ދަންމިކަ ޕެރޭރާ އިންތިޚާބަށް ކުރިމަތިލުމުން ތަނާޒުލުވުމާ ގުޅިގެންނެވެ.
މި އިންތިޚާބުގައި ވާދަކުރާނެ އެންމެ ޅަ ކެންޑިޑޭޓަކަށް ވާނީ ނަމާލް ރާޖަޕަކްސާއެވެ. އޭނާ އިންތިޚާބު ކާމިޔާބު ކޮށްފިނަމަ، ސްރީލަންކާގެ އެންމެ ޅަ ރައީސްކަމުގެ ރެކޯޑު އޭނާ ހާސިލުކުރާނެއެވެ.
ކުރީގެ ރައީސް އަދި ބޮޑުވަޒީރު މަހިންދާ ރާޖަޕަކްސާގެ އެންމެ ދޮށީ ދަރިފުޅު ކަމަށްވާ ނަމާލް ވަނީ ލަންޑަނުގެ ސިޓީ ޔުނިވަރސިޓީން ޤާނޫނީ ދާއިރާއިން ފުރަތަމަ ޑިގްރީ ހާސިލުކޮށްފައެވެ. އޭގެ ފަހުން އޭނާ ވަނީ ސްރީލަންކާ ލޯ ކޮލެޖުގައި ބައިވެރިވެ ވަކީލުކަމުގެ ހުއްދަ ހޯދާފައެވެ.
ނަމާލް ވަނީ 2019 ވަނަ އަހަރު ލިމިނީ ވީރަސިންހޭއާ ކައިވެނިކޮށް، މިހާރު ދެ ދަރިން ލިބިފައެވެ.
2010 ވަނަ އަހަރުގެ ޕާލިމެންޓް އިންތިޚާބުގައި ނަމާލް ވަނީ ޔުނައިޓެޑް ޕީޕަލްސް ފްރީޑަމް އެލަޔަންސްގެ ފަރާތުން ހަމްބަންޓޯޓާ ޑިސްޓްރިކްޓުން ކުރިމަތިލާ ޕާލިމެންޓަށް ހޮވިފައެވެ. އޭނާގެ ބައްޕަ މަހިންދާ ވެސް ވަނީ 2005 ގައި ރައީސްކަމަށް ހޮވުމުގެ ކުރިން 16 އަހަރު ވަންދެން ހަމްބަންޓޯޓާއިން ޕާލިމެންޓް މެމްބަރެއްގެ ގޮތުގައި މަސައްކަތްކޮށްފައެވެ.
