މިދިޔަ މަހު 27 ގައި ޕްރިމިއާކުރި "ކަލްކީ 2898 އޭޑީ" އަށް ބޮކްސް އޮފީހުގައި ރިކޯޑް އާމްދަނީއެއް ލިބިއްޖެ އެވެ.
ލީޑުން ސައުތުގެ މަޝްހޫރު އެކްޓަރު ޕްރަބާސް ފެނިގެންދާއިރު އޭނާ އާއި އެކުގައި ލީޑުން ފެނިގެންދާނީ ދީޕިކާ ޕަދުކޯންއެވެ. އަދި މުހިންމު ރޯލަކުން މަޝްހޫރު ލެޖެންޑްރީ އެކްޓަރު އަމިތާބް ބަޗަން ވެސް ފެނިގެންދާނެއެވެ.
ރިޕޯޓްތައް ބުނި ގޮތުގައި މި ފިލްމަށް ވަނީ ދުނިޔޭގެ ބޮކްސް އޮފީހުގައި 29 ދުވަހުގެ ތެރޭގައި 1،020 ކްރޯޑް ރުޕީސް (122 މިލިއަން ޑޮލަރު)ގެ އާމްދަނީއެއް ލިބިފަ އެވެ. އެއީ އިންޑިއާގައި މި ފިލްމުގައި ދައްކައިގެން ލިބުނު 743 ކްރޯޑް ރުޕީސް (88 މިލިއަން ޑޮލަރު) އާއި ދުނިޔޭގެ އެހެން ގައުމުތަކުގައި ދައްކައިގެން ލިބުނު 281 ކްރޯޑް ރުޕީސް (33 މިލިއަން ޑޮލަރު) އެވެ. ފިލްމު ރިލީޒް ކުރި ދުވަހު އެކަނިވެސް އެ ފިލްމު ވަނީ 95.3 ކްރޯޑް ރުޕީސް ހޯދާފަ އެވެ. 3-ޑީ ކޮށް ބަލައިލެވޭ މި ފިލްމަކީ ހިންދީ ފިޔަވާ ބައެއް އެހެން ބަސްތަކުން ވެސް އަޑުއަޅާފައިވާ ފިލްމެކެވެ.
ނަގް އަޝްވިންގެ މި ފިލްމަކީ އިންޑިއާގައި ހަދާފައިވާ އެންމެ އަގު ބޮޑު ފިލްމު ކަމަށް ރިޕޯޓުތައް ބުނެ އެވެ. އެއީ މި ފިލްމުގެ ބަޖެޓުގެ ގޮތުގައި 600 ކްރޯޑް ރުޕީސް ހޭދަކޮށްފައިވާތީ އެވެ.
ވިޖަޔަންތީ މޫވީޒް ޕްރޮޑިއުސް ކޮށްފައިވާ މި ފިލްމުގެ ކާސްޓުގައި ބޮލީވުޑްއާއި ހޮލީވުޑްގެ މަޝްހޫރު ތަރިން ހިމެނެއެވެ. އެގޮތުން ކަމާލް ހަސަން، ދިޝާ ޕަޓާނީ، ސަސްވާތާ ޗެޓަޖީ އަދި ޝޯބާނާ ހިމެނެ އެވެ.
