މީގެ ތިން އަހަރެއްހާ ދުވަސް ކުރިން އަނިޔާވެރި ގޮތަކަށް ވިޔަފާރިވެރިޔާ މަހްމޫދް އަބޫބަކުރު މަރައިލި ކަމަށް ކުރިން އެއްބަސްވި އަލޮމް މިއާ (ސާލިމް) ގެ މައްޗަށް މަރުގެ އަދަބު ކަނޑައެޅުމަށް ކްރިމިނަލް ކޯޓުން ކުރި ހުކުމް ދެމެހެއްޓުމަށް ހައި ކޯޓުން މިއަދު ހުކުމްކޮށްފި އެވެ.

ދަށު ކޯޓުން ސާލިމް މަރަން ހުކުމް އިއްވި ނަމަވެސް، މަރުގެ މައްސަލަތަކުގައި ޝަރީއަތުގެ ތިން މަރުހަލާ ފުރިހަމަ ކުރަން ގާނޫނުގައި ލާޒިމުކޮށްފައިވެ އެވެ. އެހެންވެ މި މައްސަލަ ވެސް ކުށް ކުރި ކަން ޔަގީން ކުރަން ހައި ކޯޓާއި ސުޕްރީމް ކޯޓުގައި ޝަރީއަތް ގެންދަން ޖެހޭނެ އެވެ.

ގާނޫނުގައި އޮންނަ ގޮތުގެ މަތީން، މި މައްސަލަ ހައި ކޯޓުގައި ފެށި ދުވަހު ސާލިމް ބުނީ އޭނާ ކުރިން ކުށަށް އިއުތިރާފުވީ، އިއުތިރާފުވުމުން ބަންގްލަދޭޝްއަށް ފޮނުވާލާނެ ކަމަށް ތަހުގީގު މަރުހަލާގައި ތަރުޖަމާނު އޭނާ ކައިރީ ބުނެފައި އޮތުމުން ކަމަށެވެ. އެކަމަކު ފަހުން އޭނާ ވަނީ ދިފާއުވުމުގެ ހައްގު ދޫކޮށްލާފައިވެ އެވެ.

ހައި ކޯޓުގައި މި މައްސަލަ ބެއްލެވީ ތިން ފަނޑިޔާރުންގެ ބެންޗަކުންނެވެ. ބެންޗުގެ ރިޔާސަތުގައި އިންނެވީ ފަނޑިޔާރު ހަސަން ޝަފީއެވެ. ދެން ތިއްބެވީ ފަނޑިޔާރު މުހައްމަދު ނިޔާޒު އަދި ފަނޑިޔާރު ފާތިމަތު ފަރުހީޒާ އެވެ.

ހައި ކޯޓުން ދަށު ކޯޓުގެ ހުކުމް ދަމަހައްޓަން ހުކުމް އިއްވީ ދެ ފަނޑިޔާރުންގެ އަގުލަބިއްޔަތުންނެވެ. އެ ގޮތަށް ރައުޔަ އިއްވީ ފަނޑިޔާރު ނިޔާޒެވެ. ފަނޑިޔާރު ނިޔާޒުގެ ރައުޔައަށް ތާއީދު ކުރެއްވީ ފަނޑިޔާރު ފަރުހީޒާ އެވެ.

ދެ ފަނޑިޔާރުންގެ އަގުލަބިއްޔަތުން ކުރި ހުކުމުގައި ވަނީ ދައުވާ އުފުލާފައިވަނީ ބިދޭސީއަކަށް ވާތީ، ތަރުޖަމާނު މެދުވެރިކޮށް ދައުވާ ކިޔައިދިނުމުން ފުދޭނެ ކަމަށެވެ. އަދި ދައުވާގެ ލިޔެކިޔުންތައް ހަމަވިކަން ޔަގީންކުރަން ދިފާއީ ވަކީލާ ސުވާލުކުރުމުން ފުދޭނެ ކަމަށް ފަނޑިޔާރު ވިދާޅުވި އެވެ.

އަދި ދަށު ކޯޓުގެ ފަނޑިޔާރު، ގާނޫނީ ވަކީލާ ސުވާލުކޮށް ގަނޫނީ ވަކީލު ޖަވާބުދީފައިވާ ކަން އެނގެން އެބަ އޮތް ކަމަށް ފަނޑިޔާރު ނިޔާޒު ވިދާޅުވި އެވެ. އޭނާ ވެފައިވާ އިއުތިރާފުގެ އިތުރުން ދައުލަތުން ހުށަހަޅާފައިވާ ހެކި ގަރީނާއިން ވެސް ކުށުގެ އަމަލު ސާބިތުވާ ކަމަށް ފަނޑިޔާރު ނިޔާޒު ވިދާޅުވި އެވެ.

ފަނޑިޔާރު ޝަފީއުގެ ރައުޔަކީ ސާލިމަށް ބައެއް ހައްގުތައް ޔަގީންކޮށްދެވިފައިނުވާ ކަމަށް ފެންނާތީ ދަށު ކޯޓުގެ ޝަރީއަތް އަލުން ފެށުމެވެ. އޭނާ ކުށަކަށް އިއުތިރާފުވި ނަމަވެސް ދެން ޝަރީއަތް ދާނީ އަވަސް ނިޔާގެ ދަށުން ކަން ސާލިމަށް އަންގައިދީފައި ނުވާ ކަމަށް ފަނޑިޔާރު ޝަފީއު ވިދާޅުވި އެވެ.

"ހައްގުތައް ޔަގީންނުކޮށް ވެފައިވާ އިއުތިރާފަކީ އެއްވެސް މަޖުބޫރު ކަމެއް ނެތި ދެވޭ އިއުތިރާފެއް ކަމަކަށް އަހަރުންނަށް ގަބޫލެއް ނުކުރެވޭ، އެފަދަ އިއުތިރާފަކަށް ބުރަދަނެއް ދެވޭނެ ކަމަކަށް ނުދެކެން،" ފަނޑިޔާރު ޝަފީއު ވިދާޅުވި އެވެ.

މަޙުމޫދު ގެއްލިގެން ހޯދަމުން ދަނިކޮށް ދަނގެތީގެ ފަޅު ގޯއްޗެއްގެ ތެރޭގައި ހުރި ވަޅަކުން އޭނާ ފެނުނުއިރު، ތޫނު އެއްޗަކުން ހަމާލާދީ ބޮޑެތި އަނިޔާތަކެއް ވަނީ ދީފައެވެ. އަދި ޝާ ޢާލޮމް (ސާލިމް) އުޅޭ ގޭގެތެތެރޭގައި މަޙުމޫދަށް ހަމާލާދިނުމަށްފަހު 5 ގަޑިއިރުވަންދެން އެގޭގެތެރޭގައި މަޙުމޫދުގެ ހަށިގަނޑު ބޭއްވިކަމަށް ފުލުހުން ވިދާޅުވިއެވެ. އަދި މި ހުރިހާކަމެއް އޭނާކޮށްފައިވަނީ އިތުރު މީހެއްގެ ބައިވެރިވުން ނެތިކަމަށްވެސް ފުލުހުން ވަނީ ހާމަކުރައްވާފައެވެ.

މަޙުމޫދަށް ހަމަލާދިނުމުގެ ކުރިން ވައްކަމުގެ މައްސަލައެއްގައި މި ބަންގްލަދޭޝް މީހާގެ ބައިވެރިވުން އޮތްކަމަށްވެސް ފުލުހުން ވަނީ ބުނެފައެވެ.