ގަރުދިޔައާއި ބަތާ ކާ ހިސާބަށް މިގައުމު ފޮނުވާލީ ކުރީ ސަރުކާރުންކަމުގައި ޖުމުހޫރީ ޕާޓީގެ ލީޑަރު ގާސިމް އިބުރާހިމް ވިދާޅުވެއްޖެއެވެ.
މަޖިލިހުގެ ހަނިމާދޫ ދާއިރާގެ މެމްބަރު މިއަދު މަޖިލިހުގައި ދައްކަވަމުން ގެންދެވި ވާހަފުޅާއި ގުޅޭގޮތުން ގާސިމް ނިޒާމީ ނުކުތާއެއް ނަންގަވައިގެން ވާހަކަ ދައްކަވަމުން ގާސިމް އިބުރާހިމް ވިދާޅުވީ ކުރީ ސަރުކާރުގެ ވެރިކަން ނިމިގެންދިޔައިރު، މުޅި ގައުމު އޮތީ ދަރުލާފާއި ކަމަށާއި، ދައުލަތުގެ ކުންފުނިތައެވެސް އޮތީ ދަރާފައި ކަމުގައެވެ.
އަދި ގާސިމް އިބުރާހިމް ވިދާޅުވީ، ގައުމުގެ މިހާރުގެ ހާލަތު ރަގަޅު ކުރުމަށްޓަކާ ބޯންޖެހޭ ހިތި ބޭހެއް ބޯންޖެހޭ ކަމުގައެވެ. އެއީ ނަންގަވަންޖެހޭ ކޮންމެ ފިޔަވަޅެއްވެސް ނަންގަވަންޖެހޭ ކަމަށާއި، އެއީ މިހާރުގެ ރައީސުލްޖުމުހޫރިއްޔާ އަޅުއްވަންޖެހޭ ފިޔަވަޅުތަކެއް ކަމުގައި ގާސިމް ވިދާޅުވިއެވެ.
ގާސިމް އިބުރާހިމް ވިދާޅުވީ އޭނާ ނިޒާމީ ނުކުތާއެއް ނަންގަވަންޖެހުނީ، ހަނިމާދޫ ދާއިރާގެ މެމްބަރު އަބުދުލް ޢަފޫރު މޫސާ މަޖިލިހުގެ ތަޅުމުގައި ކަނޑައެޅިގެން ދޮގު ހައްދަވާތީ ކަމުގައެވެ.
މަޖިލިހުގެ ރިޔާސަތުންވަނީ ގާސިމް ނެންގެވީ ނިޒާމީ ނުކުތާއެއްކަމަށް ވިދާޅުވެފައެވެ. އޭގެ ސަބަބަކީ ހަނިމާދޫ ދާއިރާގެ މެމްބަރު މަޖިލިހުގައި ދޮގުބަހުން ވާހަކަ ދައްކަވާފައިވާތީ ކަމުގައިވެސް މަޖިލިހުގެ ރިޔާސަތުގައި އިންނެވި އަބުދުއްރަހީމް ވިދާޅުވެފައިވެފައި ވެއެވެ.
