އެމްޑީޕީގެ ރައީސް އަބުދުﷲ ޝާހިދު މި ހަފްތާގައި އިނގިރޭސިވިލާތަށް ކުރެއްވި ދަތުރުފުޅުގެ ބައެއް ބައްދަލުވުންތަކުގައި އެޕާޓީގެ ކުރީގެ ޗެއަރޕާސަލް އަލީ ވަހީދު ބައިވެރިކުރުމުން އާންމުންގެ އިތުރުން އެމްޑީޕީގެ ލީޑަރޝިޕްގެ ބައެއް ބޭފުޅުންގެ ފާޑު ކިއުންވެސް ޝާހިދަށް އަމާޒު ވެއްޖެއެވެ.
ޝާހިދު އިއްޔެ ކުރެއްވި އެކްސް ޕޯސްޓެއްގައި ވިދާޅުވެފައިވަނީ، ވެސްޓްމިންސްޓަރ ޕެލަސްއަށް ޒިޔާރަތްކޮށް، އިނގިރޭސި ވިލާތުގެ ރައްޔިތުންގެ މަޖިލީހުގައި ތިއްބެވި ތަފާތު މެމްބަރުންނާ ބައްދަލުކުރެއްވުމުގެ އުފާ އަޅުގަނޑަށް ލިބިގަންނަ ކަމުގައެވެ. އަދި މި ބައްދަލުވުންތަކުގެ ސަބަބުން ގުޅުންތައް ބަދަހިކޮށް، އެއްބާރުލުން އިތުރުކުރުވެގެން ދާނެކަމަށް އުއްމީދުކުރައްވާކަމަށްވެސް ޝާހިދު ވިދާޅުވެފައި ވެއެވެ.
މި ބައްދަލުވުންތަކުގެ ވީޑިއޯއެއް ހެއްދެވުމަށްފަހު ބެކް މިއުޒިކާއެކު ޝާހިދުވަނީ އެކްސްގައި ޕޯސްޓު ކުރައްވާފައެވެ. އެ ވީޑިއޯގެ ބައެއް ހިސާބުތަކުން އަލީ ވަހީދުވެސް ފެންނާން ހުރެއެވެ.
އެއާއެކު އެކްސްގައި އާންމު ބައެއް ފަރާތްތަކުގެ ފާޑުކިއުން ޝާހިދަށް އަމާޒުވެގެން ދިޔައިރު، އެމްޑީޕީގެ ލީޑރޝިޕްގެ ބޭފުޅުން ހިމެނޭ ވަޓްސްއަޕް ގުރޫޕެއްގައިވެސް ވަނީ އެކަމާއި ގުޅޭގޮތުން ބައެއް ފަރާތްތަކުން ފާޑުކިއުން އަމާޒު ކޮށްފައެވެ.
އެގޮތުން، އެމްޑީޕީގެ ޑެޕިއުޓީ ޗެއަރޕާސަންގެ މަގާމްގައި ހުންނެވި މަދަނަ އިބުރޭ ވަނީ އަލީވަހީދުއަކީ އެމްޑީޕީގެ ރަސްމީ އެއްވެސް މަގާމެއްގައި ހުންނެވި ބޭފުޅަކަށް ނުވާތީ އޭނާ އެބައްދަލުވުމުގައި ބައިވެރިވި ހައިސިއްޔަތާމެދު ދުވާލު ކޮށްފައެވެ.
އިބުރޭގެ ސުވާލަށް ޖަވާބު ދެއްވަމުން ޝާހިދު ވިދާޅުވެފައިވަނީ އަލީވަހީދުއަކީ ދާދިފަހުން އެމްޑީޕީގެ ޓިކެޓްގައި މަޖިލިހަށް ވާދަކުރި ފަރާތެއް ކަމަށާއި، އަމިއްލަފުޅަށް މީހުންނާއި ބައްދަލުކުރާއިރު ޕާޓީގެ ސެކެޓްރިއޭޓުން ނިންމާގޮތަށް ހަމަޖެހިފައި ނޯންނަ ކަމުގައެވެ.
ޝާހިދުގެ ވާހަކައާއި ގުޅިގެން ފައްޔާޒު ވިދާޅުވެފައިވަނީ ޝާހިދުގެ ދަތުރުފުޅަކީ ޕާޓީގެ ރައީސްގެ އަމިއްލަފުޅު ދަތުރެއް ކަމަށާއި، އެއީ ޕާޓީގެ ދަތުރެއް ނޫންކަމުގައެވެ.
އެހެންނަމަވެސް މަދަ އިބުރޭ ވިދާޅުވީ މަޖިލިސް އިންތިޚާބުގައި ވާދަކުރުމަކީ ހުރިހާ ތަނެއްގަ ޕާޓީ ތަމްސީލް ކުރެވެން އޮތް ސަބަބެއް ނޫން ކަމުގައެވެ. އަދި ޕާޓީގެ އެކައުންޓުން ޕާޓީއަށް ޑެމޭޖް ވާފަދަ ޕޯސްޓުތައް ނުކުރުމަށް އިބުރޭ ވަނީ ޗެއަރޕާސަން ފައްޔާޒު އަރިހުން އެދޭކަމަށް ވިދާޅުވެފައެވެ. އަދި ޝާހިދުވެސް ވަނީ އެކަމަށް ތާއީދުކުރައްވާކަމަށް ވިދާޅުވެފައެވެ.
އަލީ ވަހީދަކީ ރައީސް ސާލިހުގެ ވެރިކަމުގައި ޖިންސީ ފުރައްސާރައިގެ ތުހުމަތުގައި ވަޒީރުކަމުން ވަކިކުރި ފަރާތެކެވެ. އޭރު އޭނާވަނީ ރައީސް ސާލިހަށް އެމްއެމްޕީއާރުސީގެ ފައިސާވެސް ލިބުނުކަމަށް ބުނެ ގިނަ ތުހުމަތުތަކެއް ކޮށްފައެވެ.
އެހެންނަމަވެސް އޭނާވަނީ، ފާއިތުވި މަޖިލިސް އިންތިޚާބުގައި އެމްޑީޕީއާ ގުޅިފައެވެ. އަދި ކުޅުދުއްފުށި ދެކުނު ދާއިރާއަށް ވާދަކޮށް އޭނާވަނީ ބަލިވެފައެވެ.
