މަރުކަޒީ ބޭންކް (އެމްއެމްއޭ)ގެ ގަވަރުނަރުގެ މަގާމުގައި ހުންނެވި އަލީ ހާޝިމް އެ މަގާމުން ވަކި ކުރެއްވުމަށް ރައްޔިތުން މަޖިލީހުގެ މާލިއްޔަތު ކޮމެޓީން ނިންމައިފިއެވެ.
އަލީ ހާޝިމް މަގާމުން ވަކި ކުރުމަށް ނިންމާ މާލިއްޔަތު ކޮމެޓީން ވަނީ އެ މައްސަލަ މަޖިލީހުގެ ތަޅުމަށް ހުށަހެޅުމަށް ފާސްކޮށްފައެވެ. އަލީ ހާޝިމް ވަކި ކުރުމަށް ކޮމިޓީން ނިންމިއިރު އެނިންމުމަށް ވޯޓު ނުދެއްވާ އިންނެވީ ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދެވެ.
އެމްއެމްއޭގެ ގަވަރުނަރު އަލީ ހާޝިމް މަގާމުން ވަކިކުރަން މަސައްކަތް ފެށުމަށް ޓަކައި، ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުވާން އަންގައިފައިވަނިކޮށް، އާލާސްކަންފުޅާ އުޅުއްވާތީ ފާއިތުވި ދެ ކޮމިޓީގެ ބައްދަލުވުމަށްވެސް ގަވަރުނަރު ހާޒިވެވަޑައިގެންނެވިފައި ނުވަނިކޮށް، އާލާސްކަންފުޅާ އުޅުއްވާތީ، މިއަދުވެސް ކޮމިޓީއަށް ވަޑައި ނުގެންނެވޭނެކަމަށް އަލީ ހާޝިމްވަނީ ސިޓީއަކުން އަންގަވާފައެވެ.
މިއަދުވެސް 11:00 އަށް ގަވަރުނަރާއެކީ ތާވަލު ކޮށްފައިއޮތް ކޮމިޓީގެ ބައްދަލުވުމަށް އާލާސްކަންފުޅާ އުޅުއްވާތީ ވަޑައިގެންނެވެން ނެތްކަން އަމންގަވާ ފޮނުއްވި ސިޓީގައި އަލީ ހާޝިމް އެދިވަޑައިގަތީ ކުރިން ފޮނުއްވި ޖަވާބުގައި ފާހަގަކުރެއްވި ކަންކަމާއި ގުޅޭގޮތުން އިތުރު ސުވާލެއް އޮތްނަމަ ލިޔުމުން ޖަވާބު ދެއްވުމުގެ ފުރުސަތު ދެއްވުމަށެވެ.
އާލާސްކަންފުޅާ އުޅުއްވާތީ ފާއިތުވި ދެ ކޮމިޓީގެ ބައްދަލުވުމަށްވެސް ގަވަރުނަރު ހާޒިވެފައި ނުވާތީ، މިއަދުގެ ކޮމިޓީއަށް ހާޒިރު ނުވެއްޖެނަމަ، ރިިޕޯޓުގެ މައްޗަށް ބަލާ، ގަވަރުނަރުގެ ޢައިރު ހާޒިރުގައި ކޮމިޓީން މައްސަލަ ނިންމާގޮތަށް އިއްޔެވަނީ ފާސްކޮށްފައެވެ.
އަލީ ހާޝިމް ކޮމިޓީއަށް ހާޒިރުކުރުން ފުރަތަމަ ތާވަލުކުރީ މިމަހުގެ 8 ވަނަ ދުވަހު އެވެ. އެ ބައްދަލުވުން ކެންސަލްކުރީ ކީއްވެ ކަމެއް އޭރު މަޖިލީހުން ހާމައެއް ނުކުރެ އެވެ. އަލީ ހާޝިމް މާލިއްޔަތު ކޮމިޓީއަށް ހާޒިރުކުރަން ނިންމާފައި މިވަނީ އޭނާ މަގާމުން ވަކިކުރުމަށް އެ ކޮމިޓީން ރައީސް ޑރ. މުއިއްޒަށް ލަފާވެސް ދީފައި ވަނިކޮށެވެ.
މި މައްސަލަ މަޖިލިހުގެ ކޮމިޓީ އަށް ހުށަހެޅުއްވީ މަޖިލިހުގެ ނައިބު ރައީސް އަދި ކޮމިޓީގައި ހިމެނިވަޑައިގަންނަވާ ދިއްގަރު ދާއިރާގެ މެމްބަރު އަހުމަދު ނާޒިމެވެ.
ނާޒިމް ހުށަހެޅުއްވި މައްސަލައިގައި ބުނެފައިވަނީ ގައުމުގެ އިގްތިސޯދު ހީނަރުވެ، އަލުން އަނބުރާ އިޔާދަ ކުރަން އުނދަގޫ ހިސާބަކަށް ގައުމުގެ އިގްތިސޯދު ނިކަމެތިވެގެން ދިޔައިރު،އެމްއެމްއޭގެ ގާނޫނުގައި ބަޔާން ކުރާ މަގްސަދުތައް ހާސިލް ކުރެވިފައި ނެތް ކަމަށެވެ. އަދި އެމްއެމްއޭގެ މައިގަނޑު އެއް އަސާސްކަމުގައިވާ މަނިޓަރީ ޕޮލިސީ އޭގެ އެންމެ އެކަށޭނެ ގޮތުގައި ހިނގަމުންދާކަން ފެންނަމުން ނުދާ ކަމަަށް ވެސް ނާޒިމް ވިދާޅުވިއެވެ.
ނާޒިމް ވިދާޅުވެފައިވަނީ ރާއްޖޭގައި ހިންގާ ބޭންކުތަކާއި ފައިނޭންޝިއަލް އިންސްޓިޓިއުޓްތަކުން އާންމުންނަށް ލޯން ދޫކުރާ މިންވަރު ނުސީދާކޮށް ހިފަހައްޓައި ބޭންކުތަކުގެ ރިޒާވް އެމްއެމްއޭގައި ބެހެއްޓުމަށް ގަވަރުނަރު ބާރު އަޅުއްވާފައިވާ ކަމަށެވެ. މިގޮތަށް އަމަލު ކުރުމުގެ ސަބަބުން އިގްތިސޯދު ތެރޭގައި ދައުރުވަމުންދާ ފައިސާ މަދުވެ، އިގްތިސޯދީ މަސައްކަތްތައް ހުއްޓި ގައުމުގެ އިގްތިސޯދުގެ ދުވެލި މަޑުޖެހިފައިވާ ކަމަށް ވެސް ނާޒިމް ވިދާޅުވިއެވެ.
ސަރުކާރުންވެސް މިހާރު ފައިސާ ހޯދަމުން ގެންދަނީ ޑޮމެސްޓިކް މާކެޓުން ކަމުން ކޮމެސްޓިކް މާކެޓުް ރަނގަޅަށް ރެގިއުލޭޓް ކުރުމުގެ މުުހިއްމު ކަން ބޮޑުވެފައިވާ ވަގުތެއްގައި އެކަން ކުރަމުންދާތަން ނުފެންނަ ކަަމަށްވެސް ނާޒިމް ވިދާޅުވިއެވެ.
ނާޒިމް ވިދާޅުވީ މިދިޔަ ނޮވެމްބަރު 17 އިން ފެށިގެން މި ވޭތުވެދިޔަ މުއްދަތުގެ ތެރޭގައި އެމްއެމްއޭ އިން ސަރުކާރަށް ލަފާ ދިނުމުގައި އަދި އެ މަގްސަދުތައް ހާސިލްކުރުމަށްޓަކައި އަމަލީ ގޮތުން ހަރަދަނާ މަސައްކަތްތަކެއް ކޮށްފައި ނުވާ ކަމަށެވެ. އަދި ރާއްޖޭގެ އިގްތިސޯދު ހީނަރުވެ، ގައުމު ބޮޑު އިގްތިސޯދީ ކާރިސާއަކުން ސަލާމަތްވުމަށްޓަކަައި، އެމްއެމްއޭއަކީ މުހިންމު މަސައްކަތްތަކެއް ކުރަންޖެހޭ މުވައްސަސާއަކަށްވާއިރު، އެމްއެމްއޭގެ ވެރިޔާގެ ހައިސިއްޔަތުން އެ މަސްއޫލިއްޔަތު އޭގެ އެންމެ ފުރިހަމަ ގޮތުގައި އަދާ ކޮށްފައި ނުވާ ކަމަށް ވެސް ނާޒިމް ވިދާޅުވިއެވެ.
މި ދަނޑިވަޅަކީ މަރުކަޒީ ބޭންކްގެ ފަރާތުން ގައުމުގެ މަނިޓަރީ ޕޮލިސީގެ މިސްރާބު ބަދަލު ކުރަން ނަމަ އެކަން ކުރުމުގެ ވަގުތުކަމުން، މަރުކަޒީ ބޭންކް ހިންގުމަށް ތާޒާ އާރޯ ލީޑާޝިޕެއް ބޭނުންވާ ކަމަށް ވެސް ނާޒިމް ވިދާޅުވިއެވެ. އެހެންކަމުން އެމްއެމްއޭގެ ގަވަރުނަރުކަމުން އަލީ ހާޝީމް ވަކި ކުރުމަށް ރަައީސުލްޖުމްހޫރިއްޔާއަށް ލަފާ ދިނުމަށް ހުށަހަޅުއްވާ ކަމަށް ނާޒިމް ވިދާޅުވިއެވެ.
އެމްއެމްއޭއަކީ 1981 ވަނަ އަހަރު ގާނޫނުގެ ދަށުން އެކުލަވާފައިވާ ރާއްޖޭގެ މަރުކަޒީ ބޭންކެވެ. އެ ބޭންކްގެ މައިގަނޑު މަގްސަދުގެ ތެރޭގައި ފައިސާ ނެރުމާއި، ފައިސާ ލިބެން ހުންނާނެ ގޮތް ހަމަޖެއްސުމާއި، ދިވެހި ރުފިޔާގެ ބައިނަލްއަގްވާމީ އަގު ކަނޑައެޅުމާއި ބޭންކިންގ އާ ބެހޭ މަނިޓަރީ މުއާމަލާތްތަކާއި ބެހޭ ކަންތައްތަކުގައި، ސަރުކާރަށް ލަފާ ދިިނުމުގެ ހިދުމަތްތައް އަދާ ކުރުންވެސް ހިމެނެއެވެ. އަދި ރާއްޖޭގެ މާލީ ކަންތައްތައް ހަރުދަނާ ގޮތެއްގައި ކުރިއެރުވުމަށްޓަކައި، ބޭންކްގެ މުއާމަލާތާއި ބެހޭ ކަންތައްތަކުގައި، ސަރުކާރަށް ލަފާ ދިނުމުގެ ހިދުމަތްތައް އަދާ ކުރުމާއި، އެެކަންތައްތައް ހިނގާ ނުހިނގާ ގޮތް ބެލުންވެސް ހިމެނެއެވެ.
