އަންނަ އޮގަސްޓުމަހު ތެރޭގައި ބަންކަރިންގެ އަމަލީ މަސައްކަތް ފެށޭނެ ކަމުގައި އެސްޓީއޯގެ އެމްޑީ ސިމާދު އިބުރާހިމް ވިދާޅުވެއްޖެއެވެ.
ރޭ ބެއްވުނު އެސްޓީއޯގެ އަހަރީ އާންމު ޖަލްސާގައި ހިއްސާދާރުން ކުރި ސުވާލުތަކަށް ޖަވާބު ދެއްވަމުން ސިމާދު ވިދާޅުވީ ބަންކަރިންގެ ޚިދުމަތް އަންނަމަހު އެކުންފުނިން ފަށާނެކަމަށާއި، މި ވިޔަފާރިއަށް އެކުންފުނިން ވަންނަނީ ކޮށްފައިވާ ތާވަލާއި އެއްގޮތަށް، އަންދާޒާ ކޮށްފައިވާ މުއްދަތުގައި ކަމުގައެވެ.
ފާދިއްޕޮޅުގައި ބަންކަރިން ޚިދުމަތް ގާއިމްކުރަން މަޝްހޫރު ވިޔަފާރި ކުންފުނި ވިޓޯލްއާއެކު އެސްޓީއޯއިން އެއްބަސްވުމަކަށް އައިސްފައިވަނީ މިއަހަރުގެ މާރޗްމަހުގެ 13 ވަނަ ދުވަހުއެވެ.
ރާއްޖެ މި އޮންނަ ލޮކޭޝަންއަކީ ވަރަށް މުހިން ލޮކޭޝަނަކަށްވާއިރު، ރާއްޖެ އޮން ސަރަހައްދުން ލާފަ ދުވާލަކު މައްޗަށް 300 އަށްވުރެ ގިނަ އާގުބޯޓު އެބަ ދަތުރުކުރެއެވެ. އެހެންނަމަވެސް އެ އާގު ބޯޓުފަހަރަށް ސާވިސް ދެވޭނެ ގޮތެއް އެ ސަރަހައްދުގައި ނެތެވެ. އެގޮތުން ސްޓްރެޓިކް ސްޓޯރޭޖާ އެކީގައި އިންޓަނޭޝަނަލް ބަންކަރިންއަށް ޚިދުމަތް އެ ސަރަހައްދުން ފޯރުކޮށް ދިނުމަކީ ކުރިއްސުރެ އެސްޓީއޯއިން ގެންގުޅެމުން އައިސްފައިވާ ވިސްނުމެކެވެ.
