އިސްޒުއްދީން ސްކޫލު ސަރުކާރުން ބަންދު ކޮށްލުމަށް ނިންމާފައިވާތީ އެ ސްކޫލުގެ ދަރިވަރުން މާލޭގެ އެހެން ސްކޫލްތަކަށް ބަދަލުވުމުގެ ފުރުސަތު އެޑިއުކޭޝަން މިނިސްޓްރީން ދީފިއެވެ.
އެނގިފައިވާ ގޮތުގައި އެހެން ސްކޫލްތަކަށް ކުދިން ބަދަލުކުރަން ބޭނުންވާ ބެލެނިވެރިން ނަން ނޯޓު ކުރުމަށް ދީފައިވާ އެންމެ ފަހު ގަޑިއަކީ އަންނަ އާދިއްތަ ދުވަހުގެ މެންދުރު 12:00 އެވެ.
އެގޮތުން އިއްޒުއްދީން ސްކޫލުގެ މެނޭޖްމަންޓުން އިއްޔެވަނީ އެ ސްކޫލުގެ ބައެއް ބެލެނެވެރިންނާއި ބައްދަލުކޮށް، އެ ސްކޫލުގެ ކުރިމަތީގައި އޮތް އިމާދުއްދީން ސްކޫލަށް ބަދަލުވުމުގެ ފުރުސަތު އޮތްކަމަށް ވިދާޅުވެފައެވެ. އަދި އިއްޒުއްދީން ސްކޫލުގެ ދަރިވަރުންގެ ތެރެއިން މާލޭގެ އެހެން ސްކޫލްތަކަށް ބަދަލުވާން ބޭނުންވާ ދަރިވަރުންނަށް އެފުރުސަތުވެސް ހުޅުވާލެވިފައި އޮތްކަމަށް އިއްޔެގެ ބައްދަލުވުމުގައި ސްކޫލުގެ މެނޭޖްމަންޓުން އެންގިކަމަށް ބައެއް ބެލެނެވެރިން މައުލޫމާތު ދީފައި ވެއެވެ.
ހަމައެއާއެކު، އިއްޒުއްދީން ސްކޫލުގައި ކިޔަވަން ބޭނުންވާ ދަރިވަރުންނަށް އަންނަ އެކަޑަމިކް އަހަރު ފެށެންވާއިރަށް އެފުރުސަތު އޮތްކަމަށްވެސް ސްކޫލު މެނޭޖްމަންޓުން އެނގިކަމަށްވެސް އިއްޔެގެ ބައްދަލުވުމުގައި ބައިވެރިވި ބައެއް ބެލެނެވެރިން ބުނެފައި ވެއެވެ.
އިއްޒުއްދީން ސްކޫލް ސަރުކާރުން ބަންދުކުރަނީ އެސްކޫލް ހިންގާ އިމާރާތް ވިލާ ކުންފުނީގެ ޗެއަމަން އަދި މާމިގިލީ ދާއިރާގެ މެމްބަރުން ގާސިމް އިބުރާހިމްއަށް ދިނުމަށްކަމަށް ބުނެ ސޯޝަލް މީޑިއާގައި ދަނީ ވާހަކަ ދެކެވެމުންނެވެ. އެހެންނަމަވެސް އިއްޒުއްދީން ސްކޫލު އެއްވެސް ބަޔަކާއި ހަވާލު ކުރަން ނުވިސްނަވާ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވަނީ ވިދާޅުވެފައެވެ.
އޮންލައިން ނޫސް “މިހާރު” ނޫހަށް މައުލޫމާތު ދެއްވަމުން ޝަފީއު މިގޮތަށް ވިދާޅުވީ އިއްޒުއްދީން ސްކޫލުގައި ރެނދުލާފައިވާތީ އެތަނުގައި ދަރިވަރުން ކިޔަވަން ދިއުމާއި މެދު ގިނަ އަދަދެއްގެ ބެލެނިވެރިން ކަންބޮޑުވުން ފާޅުކުރަމުންދާ ދަނޑިވަޅެއްގަ އެވެ. ބައެއް ބެލެނިވެރިން ދަނީ އިއްޒުއްދީން ސްކޫލާއި ޖެހިގެން ހުރި ވިލާ ކޮލެޖަށް އެ އިމާރާތް ދޭން އެޑިއުކޭޝަން މިނިސްޓްރީން މަސައްކަތްކުރަމުންދާ ކަމަށް ވާހަކަ ފަތުރަމުން ނެވެ.
މިވާހަކަތަކާއެކު އެޑިއުކޭޝަން މިނިސްޓްރީން ފާއިތުވި ތަނުގައި ގެންދިޔައީ، ދަނީ އެތަނުގެ ރައްކާތެރިކަން ހުރި މިންވަރު ބެލުމަށް އެސެސްމެންޓެއް ހަދަމުން ނެވެ. އަދި ސްކޫލުގައި ކިޔަވާދިނުން އިތުރަށް ކުރިޔަށް ނުގެންދިއުމަށް މިނިސްޓްރީން ނިންމާފައިވަނީ، އެ އެސެސްމެންޓްގެ ނަތީޖާއަށް ބެލުމަށްފަހުއެވެ.
އިއްޒުއްދީން ސްކޫލު ހުންނަ އިމާރާތުގައި މީގެ ކުރިން ހިންގަމުންދިޔައީ ކުރީގެ އެމްއީއެސް ސްކޫލެވެ. އޭގެފަހުން އެ އިމާރާތުގައި މަންދު ކޮލެޖް އަދި ޤައުމީ ޔުނިވާސިޓީގެ ބައެއް ފެކަލްޓީތައްވެސް ހިންގާފައިވެއެވެ.
