ދިވެހި ކޮންމެ ރައްޔިތަކީވެސް ދިވެހީންގެ. ކުރިމަގަށް ކުރާ އުއްމީދުގެ ބައިވެރިއެއް ކަމުގައި ރައީސުލްޖުމުހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނުކުފާނު މިހެން ވިދާޅުވީ މިއަދު ފާހަގަ ކުރެވެމުންދާ ބައިނަލްއަގުވާމީ އާބާދީގެ ދުވަހުގެ މުނާސަބަތުގައި އާންމު ކުރެއްވި މެސެޖެއްގައެވެ. ރައީސް މުއިއްޒުގެ މެސެޖުގައި ވިދާޅުވެފައިވަނީ ދިވެހި އާބާދީއަށް ނިސްބަތްވާ ކޮންމެ ރައްޔިތަކީވެސް މިގައުމަށް އަގުހުރި ދަރިއެއް ކަމުގައެވެ.
ދުނިޔޭގެ އާބާދީގެ ދުވަސް ކޮންމެ އަހަރެއްގައިވެސް ފާހަގަ ކުރަނީ ޖުލައިމަހުގެ 11 ވަނަ ދުވަހުއެވެ. އެދުވަސް ފާހަގަކުރަނީ އާއިލާތަކުގެ ކުރިމަގު ރޭވުމާއި، ދަރިމައިވުމުގެ ހޭލުންތެރިކަން އިތުރު ކުރުމާއި އަދި އާބާދީގެ މައްސަލަތަކާއި ގުޅޭގޮތުން އާންމު ހޭލުންތެރިކަން އިތުރު ކުރުވުމަށެވެ.
އެގޮތުން މިދުވަސް ސަރުކާރުތަކުންނާއި އާންމު ޖަމިއްޔާ ޖަމާއަތްތަކުންވެސް ދަނީ ފާހަގަ ކުރަމުންނެވެ.
