އެމްއެމްޕީއާރުސީގެ ދުވަސްވީ އިސް މުވައްޒަފަކު މަގާމުން ވަކިކުރުމަށް އެކުންފުނީގެ ބޯޑުން ނިންމައިފިއެވެ.
އެނގިފައިވާ ގޮތުގައި އިއްޔެ ބޭއްވުނު އެމްއެމްޕީއާރުސީގެ ބޯޑުގެ ބައްދަލުވުމުން، މަގާމުން ވަކިކުރުމަށް ނިންމާފައިވަނީ އެމްއެމްޕީއާރުސީގެ އިދާރީ މަގާމެއްގައި ހުންނެވި އިބްރާހިމް އާސިމް (އައިބީ)އެވެ. އޭނާ ހުރީ ކުންފުނީގެ ޑިރެކްޓަރެއްގެ މަގާމުގައެވެ. އަދި އޭނާއަކީ އެކުންފުނީގެ އެންމެ ދުވަސްވީ އެއް މުވައްޒަފެވެ.
އެގޮތުން އޭނާވަނީ އެކުންފުނި އުފެދުނީއްސުރެ އެ ކުންފުނީގައި މަސައްކަތް ކުރަމުން އައިސްފައެވ. އެމްއެމްޕީއާރުސީ އުފެދުމުގެ ކުރިން އޭނާ މަސައްކަތް ކުރީ ޓޫރިޒަމް މިނިސްޓްރީގެ ދަށުން އޭރު އޮންނަ ޓޫރިޒަމް ޕްރޮމޯޝަން ބޯޑުގަ އެވެ.
ބައެއް މީޑިއާތަކަށް އޭނާ މައުލުމާތު ދީފައިވާ ގޮތުގައި މަގާމުން ވަކިކުރި ސަބަބެއް އޭނާއަށް އަންގާފައެއް ނުވެއެވެ.
އޭނާގެ އިތުރުން އެމްއެމްޕީއާރުސީގެ ޑެޕިޔުޓީ މެނޭޖިން ޑިރެކްޓަރު މުހައްމަދު ބައްސާމް އާދަމްވެސް މަގާމުން ވަކިކުރުމަށް އެކުންފުނީގެ ބޯޑުން ވަނީ ނިންމާފައެވެ. އެނގިފައިވާ ގޮތުގައި ޑީއެމްޑީ ބައްސާމް މަގާމުން ވަކިކުރަން ނިންމީވެސް އިއްޔެ ބޭއްވި އެ ކުންފުނީގެ ބޯޑު ބައްދަލުވުމުގައެވެ.
ބައްސާމް މަގާމުން ވަކިކޮށްފައިވާކަން އޭނާ އަދި ޔަގީން ކޮށްދީފައެއް ނުވެއެވެ.
ބައްސާމް މަގާމުން ވަކިކޮށްފައި ވާއިރު، އެ ކުންފުނީގެ އަންހެން މުވައްޒަފަކަށް ޖިންސީ ފުރައްސާރަ ކުރިކަމުގެ ތުހުމަތުގައި މީގެކުރިން އޭނާވަނީ ސަސްޕެންޑު ވެސް ކޮށްފައެވެ. ނަމަވެސް އޭނާ ފަހުން ވަނީ އަލުން ވަޒީފާއަށް ނެރެފަ އެވެ. އަދި އެކުންފުނީގެ އެމްޑީކަމުގެ މަގާމުގައި ހުންނެވި ފާތިމަތު ތައުފީގު (ކުޑީ) މަގާމުން ވަކިކުރުމުން، އެ ކުންފުނި ހިންގުމާއި ހަވާލުވެ ހުރީވެސް ބައްސާމްއެވެ. އެނާ ކުންފުނި ހިންގުމާއި ހަވާލުވެ ހުރީ އިބްރާހިމް ޝިއުރީ އެކުންފުނީގެ އާ އެމްޑީއަކަށް ހަމަޖައްސަން ދެނެވެ.
މީގެ ކުރިން، އެމްއެމްޕީއާރުސީގެ ބޯޑުގެ ޗެއަރމަންއަކަށް ހުންނެ ނޫރައިން ވަނީ އަމިއްލަފުޅަށް މަގާމުން އިސްތިއުފާ ދެއްވާފައެވެ.
