ނޫސްވެރިންގެ ސުވާލުތަކަށް ކުރީގެ ރައީސް ޔާމިން ޖަވާބު ދެއްވުމަށްޓަކާ ޚާއްސަ ޖަލްސާއެއް އަންނަ ބުރާސްފަތި ދުވަހުގެ ރޭ ބޭއްވުމަށް ޕީޕަލްސް ނޭޝަނަލް ފްރަންޓް (ޕީއެންއެފް)އިން ހަމަޖައްސައިފިއެވެ.
ޕީއެންއެފްގެ ސެކެޓްރީ ޖެނެރަލް މަލީހު ޖަމާލު ވިދާޅުވި މި ޖަލްސާގައި ނޫސްވެރިންގެ ސުވާލުތައް ހުސްވަންދެން ޔާމިން ޖަވާބު ދެއްވާނެ ކަމުގައެވެ. ޖަލްސާ ބޭއްވުމަށް ހަމަޖައްސާފައިވަނީ ޕީންއެފްއެފް ޖަގަހަ ހިންގާ، ރައީސް ޔާމިންގެ އަމިއްލަފުޅު ގޭގެ ފުރަތަމަ ފަންގިފިލާގައި، ބުރާސްފަތި ދުވަހުގެ ރޭ 8:45 ގައެވެ.
ޕީއެންއެފްގެ ވަރަށް ފޯރިގަދަ ޖަލްސާއެއް ބުރާސްފަތިދުވަހުގެ ރޭ (11 ޖުލައި) 8:45ގައި ފްރަންޓު އޮފީގުގައި އޮންނާނެ. މި ޖަލްސާގައި ރައީސް ޔާމީން ވާހަކަފުޅު ދައްކަވާނެ. ނޫސްވެރިންގެ ސުވާލުތައް ހުސްވަންދެން ޖަވާބު ދިނުންވެސް އޮންނާނެ.
ޕީއެންއެފްގެ ޖަގަހަ ޔާމިންގެ ގެއަށް ބަދަލު ކުރުމަށްފަހު އެޕާޓީންދަނީ ކޮންމެ ހަފްތާއަކުވެސް ޖަގަހަ ޖަލްސާތައް ބާއްވަމުންނެވެ. ރައީސް ޔާމިންވެސް ބައިވެރިވެވަޑައިގަންނަވާ މި ޖަލްސާތަކުގައި އެޕާޓީން ދަނީ ރައީސް މުއިއްޒުއާއި މި ސަރުކާރަށް ވަރަށްބޮޑަށް ފާޑު ކިޔަމުންނެވެ.
