ސަރުކާރުގެ އިޤްތިޞާދީ ރިފޯމް މަސައްކަތުގައި އިސްކަމެއް ދެއްވާނީ، ރައްޔިތުންނަށް ބުރައަކަށް ނުވާގޮތަށް ލޯނާއި މާލީ އެހީތެރިކަން ހޯދުމަށްކަމުގައި އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
މިރޭ ބޭއްވުނު ޕީއެންސީގެ ޖަގަހަ ޖަލްސާގައި ވާހަކަ ދައްކަވަމުން ސައީދު ވިދާޅުވީ މިވަގުތަކީ ޢިޤްތިޞާދީ ތަރައްޤީއަށް ލޯނާ ދަރަނި ނެގޭ ޙާލަތުގައި އޮތް ވަގުތެއް ނޫންކަމަށެވެ. ސައީދު ވިދާޅުވީ މިވަގުތު ސަރުކާރުން އެންމެބޮޑު އިސްކަމެއް ދީގެން ކުރަމުންދާ މަސައްކަތަކީ ބޭރުގެ މާލީ އިދާރާތަކަށް މިވަގުތަށް ދައްކަންޖެހޭ 400 މިލިއަން ޑޮލަރު އަދި 1 ބިލިއަން ޑޮލަރުގެ ދަނަރި، ރައްޔިތުންގެ ހިތްތަކަށް ބިރުވެރިކަން ނާންނާނެގޮތަށް ދެއްކޭނެ އިންތިޒާމް ހަމަޖެއްސުން ކަމުގައެވެ. އަދި އެއިންތިޒާމްތައް ހަމަޖައްސަމުންދަނީ ވިޔަފާރިވެރިންނަށްވެސް ހުރަހެއް ނާންނޭގޮތަށްކަމުގައިވެސް ސައީދު ވިދާޅުވިއެވެ.
ދެން މި ރާއްޖެއަކުން ސަސްޓެއިން ނުކުރެވޭ ދަރަންޏެއް ނުއުފައްދާނަން. ދެން އުފައްދާނީ އިންކަމްއާއި ގުޅޭ ދަރަނި. އޭރުން ވިޔަފާރިތައް އިތުރުވެ ވަންނަ އާމްދަނީ އިތުވެ، އިޤްތިޞާދީ ބުރަ ކުޑަވާނެ.
ސަޢީދު ވިދާޅުވިއެވެ.
ސައީދު ވިދާޅުވީ ނިމުނު ދައުރުގައި 4 އަހަރު ފާއިތުވިއިރު، އޭގެކުރީގެ ވެރިކަމުގެ 40އަހަރާ ނުބައްދަލު ދަރަނި ދައުލަތުން ނަގާފައިވާ ކަމުގައެވެ. އެގޮތުން، 5 އަހަރު ނިމުނުއިރު ދައުލަތުގެ ދަރަނި 200 ބިލިއަނަށް އަރާފައިވާކަމަަށް ވިދާޅުވަމުން ސައީދު ވިދާޅުވީ، ވޭތުވެދިޔަ ތިން އަހަރު ތެރޭގައި ދައުލަތުން 8.2 ބިލިއަން ރުފިޔާ ޗާޕުކޮށްފައިވާކަމުގައެވެ.
އެހެންނަމަވެސް މި ސަރުކާރުން ފައިސާ ޗާޕުކުރުން ނިމުމަކަށް ގެނެސް، އިޤްތިޞާދު ސިންދަފާތު ކުުރުމުގައި ކާމިޔާބު ހޯދަމުންދާކަމުގައިވެސް ސައީދު ވިދާޅުވިއެވެ.
