ރައްޔިތުންގެ މަޖިލިހުން އެސެޓް ރިކަވަރީ ގާނޫނެއް ފާސްކޮށްގެން، ދައުލަތަށް ގެއްލިފައިވާ ފައިސާ އަނބުރާ ހޯއްދަވާނެކަމުގައި ރައީސް މުއިއްޒު ވިދާޅުވެއްޖެއެވެ.

މިރޭ އޮތް ޕީއެންސީގެ ޖަގަހަ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ، ފާއިތުވެދިޔަ ތަނުގައި އެކި ނަންނަމުގައި އެކި ކޮމިޝަންތައް ހަދައިގެންވެސް ދައުލަތަށް ގެއްލުނު ފައިސާ ހޯދިފައި ނުވާކަމަށާއި، މިސަރުކާރުން އެފައިސާ ގާނޫނެއް ފާސްކޮށްގެން ހޯއްދަވާނެ ކަމުގައެވެ.

އޭގެ ތެރޭގައި އެމްއެމްޕީއާރުސީގެ ބޮޑު ޚިޔާނާތުގައި ދައުލަތަށް ގެއްލުފައިސާ ހިމެނޭކަމަށްވެސް ވިދާޅުވަމުން ރައީސް މުއިއްޒު ވިދާޅުވީ، ޚިޔާނާތުގެ ނިޔަތުގައި އެޚިޔާނާތުގައި ބައިވެރިވެފައިވާ ފަރާތްތައް އިންސާފުގެ ކުރިމައްޗަށް ގެންނަވާނެ ކަމުގައެވެ.

އަދި އެނޫން ގޮތްގޮތުންވެސް ދައުލަތުން ގެއްލިފައިވާ ފައިސާ ދައުލަތަށް ހޯއްދަވާ ދެއްވާނެކަމުގައިވެސް ރައީސް މުއިއްޒު ވިދާޅުވިއެވެ.

މިރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރައްޔިތުންގެ މަޖިލިސް އިންތިޚާބާއި އަދި ރިޔާސީ އިންތިޚާބު އެކީ ބެއްވުމަށް ގާނޫނު އަސާސީއަށް ބަދަލު ގެނައުމަށްޓަކާ ރައްޔިތުންގެ ފެންނަ ނުފެންނަ ވޯޓެއް ނަގަންޖެހޭނެ ކަމަށާއި، މިބަދަލު ގެނެވޭނީ ރައްޔިތުންގެ ރުހުން އޮވެގެން ކަމުގައެވެ. އަދި މި ބަދަލު ގެނައުމަށްވެސް ގާނޫނު އަސާސީއަށް އިސްލާހު ހުށަހަޅުއްވާނެކަމަށްވެސް ރައީސް ވިދާޅުވިއެވެ.

އެގޮތުނަ ރައީސް ވިދާޅުވީ މަޖިލިސް އިންތިޚާބަށް 120 މިލިއަން ރުފިޔާ ޚަރަދުވާއިރު ރިޔާސީ އިންތިޚާބަށް 180 މިލިއަން ރުފިޔާ ޚަރަދުވާ ކަމުގައެެވެ. އެގޮތުން މި ދެއިންތިޚާބު އެކީ ބޭއްވިއްޖެނަމަ، ދައުލަތަށް ވަރަށް ގިނަ ފައިސާ ސަލާމަތް ކުރެވޭނެކަމަށް ރައީސް ވިދާޅުވިއެވެ. ރައީސް މުއިއްޒު ވިދާޅުވީ، މި ބަދަލުތައް މިއަހަރު ގާނޫނު އަސާސީއަށާއި ގާނޫނުތަކަށް ގެންނަވާނެ ކަމުގައެވެ.

އަދި އޭގެ އިތުރުން ރައްޔިތުންގެ މަޖިލީހާއި، ކައުންސިލްތަކުގެ ސައިޒްވެސް ކުޑަކޮށް، ދައުލަތުގެ މިނިވަން މުވައްސަސާތަކުގެ މެމްބަރުންގެ އަދަދު މަދުކޮށް، ބޭކާރު ކޮމިޝަންތައްވެސް އުވާލުމަށް ގާނޫނަށް އިސްލާހު ހުށަހަޅުއްވާނެކަމުގައިވެސް ރައީސް މުއިއްޒު ވިދާޅުވިއެވެ.

ތަފްސީލް އަންނަނީ..