ސްޓެލްކޯއިން ކުރިޔަށް ގެންދިޔަ، އިންޖީނުގޭގެ މެނޭޖަރުންގެ މަހާސިންތާ ނިންމާލައިފިއެވެ.
"ޑިވެލޮޕްމަންޓް ޕްރޮގްރާމް ފޯ ސްޓޭޝަން މެނޭޖާސް"ގައި ރާއްޖޭގެ 33 ރަށަކުން ސްޓޭޝަން މެނޭޖަރުން ބައިވެރިވެފައި ވެއެވެ. ސްޓެލްކޯއިން ބުނެފައިވަނީ މި މަހާސިންތާގެ މަގްސަދަކީ ލީޑާޝިޕް ސްކިލްސް ދަސްކޮށްދިނުމުގެ އިތުރުން ދިރިއުޅުމުގެ ވައްޓަފާޅިއަށް ގެންނަ ބަދަލުތަކުން ހަކަތަ ރައްކާތެރިކުރުމަށް ކުރެވިދާނެ ކަންކަމަށް ރައްޔިތުން ހޭލުންތެރިކުރުމާއި ގުޅޭގޮތުންނާއި، ރައްޔިތުންނަށް ހިދުމަތް ދިނުމުގައި ދިމާވާ ދަތިތަކަށް އަލިއަޅުވާލައި، އެ ދަތިތައް ހައްލުކޮށް ހިދުމަތް ފުރިހަމަކަމާއިއެކު އަވަސްކުރުމަށް ކުރެވިދާނެ ކަންކަމާއި މެދު މަޝްވަރާ ކުރުން ކަމުގައެވެ.
މި މަހާސަންތާ ކުރިޔަށްދިޔައިރު ސްޓެލްކޯއިންވަނީ އެކުންފުނިން ތައްޔާރުކުރި، ސްޓެލްކޯގެ އިންޖީނުގެތައް ހިންގާނެ ގޮތުގެ އަތްމަތީ ފޮތެއް އިފްތިތާހް ކޮށްފައެވެ. މި ފޮތުގައި ކުންފުނީގެ ހިދުމަތުގެ ތާރީހާއި، ތަސައްވުރާއި، އަމާޒުގެ އިތުރުން، އިންޖީނުގެތަކުގެ އޮނިގަނޑާއި، އިންޖީނުގެތަކުގެ މަސައްކަތްތަކާއި، ކުންފުނީގެ އެކި ދާއިރާތަކުގެ އޮނިގަނޑުގެ އިތުރުންވެސް ކުންފުންޏާއި ގުޅޭ ގިނަ މައުލޫމާތުތަކެއް ހިމަނާފައި ވެއެވެ.
މި މަހާސިންތާ ނިންމުމުގެ ރަސްމިއްޔާތުގައި ވާހަކަ ދައްކަވަމުން ކުންފުނީގެ އެމްޑީ ހުސައިން ފަހުމީ ވިދާޅުވީ ކުންފުންޏައްޓަކައި، އަދި ޤައުމާއި ޤައުމުގެ މުސްތަޤުބަލަށްޓަކައި އެކުންފުނީގެ ހުރިހާ މުވައްޒަފުން ކުރަމުންގެންދާ މަސައްކަތްތަކަށް ފަޚުރުވެރިވެ، އެކަމަށްޓަކައި އެންމެހާ މުވައްޒަފުންނަށް ޝުކުރު އަދާކުރާ ކަމުގައެވެ.
