މ. އެންޒިއަންގޭގެ 3 ވަނަ ފަންގިފިލާގައި މިއަދު ހިނގި އަލިފާނުގެ ހާދިސާގައި ދުމުގެ އަސަރުކޮށްގެން 4 މީހަކު ހޮސްޕިޓަލަށް ގެންގޮސް ފަރުވާ ދީފައިވާއިރު، އޭގެ ތެރެއިން އެކެއްގެ ހާލު ސީރިއަސްވެ އައިސީޔޫގައި ފަރުވާދޭން ފަށައިފިއެވެ. އައިޖީއެމްއެޗް މީޑިއާ އޮފިޝަލް ވިދާޅުވެފައިވަނީ ދެން ތިބި މީހުންނަށް ފަރުވާ ދީފައިވަނީ އެމަޖެންސީގައި ކަމުގައެވެ.
އެމްއެންޑީއެފްއިން ބުނެފައިވަނީ، އަލިފާން ނިއްވާލެވުނުއިރު މި ހާދިސާގައި، ދުމުގެ އަސަރުކޮށްގެން 4 މީހަކު ހޮސްޕިޓަލަށް ގެންދެވުނު ކަމަށެވެ. އަދި މިހާދިސާގައި މ. އެންޒިއަންގޭގެ 3 ވަނަ ފަންގިފިލާގައި ހުރި ގިނަ ޢަދަދެއްގެ ތަކެއްޗަށް ވަނީ ބޭނުންނުކުރެވޭވަރަށް ގެއްލުން ލިބިފައި ކަމުގައެވެ.
އަލިފާން ރޯވިތާ މާގިނައިރުތަކެއް ނުވެ ސިފައިން އެ އަލިފާން ކޮންޓްރޯލް ކޮށްފައިވެއެވެ.
ނޭޝަނަލް ޑިޒާސްޓަ މެނޭޖްމެންޓް އޮތޯރިޓީން ވަނީ މި އަލިފާނުގެ ހާދިސާ އާއި ގުޅިގެން އެނދި އެޕާޓްމަންޓުގައި އުޅުނު މީހުންނަށް ވަގުތީ ހިޔާއެއް ހަމަޖައްސައިދީފައެވެ.
