ދެކުނު ކޮރެއާގެ މަޝްހޫރު ބޯއީ ބޭންޑް ބީޓީއެސްގެ އެންމެ ދޮށީ މެންބަރު ކިމް ސެއޮކްޖިން (ޖިން) އެ ގައުމުގެ ޒުވާން ފިރިހެނުން ކޮންމެހެން ފުރިހަމަކުރަން ޖެހޭ ދެ އަހަރު ދުވަހުގެ އަސްކަރީ ތަމްރީނަށް ފަހު މިއުޒިކީ ދާއިރާއަށް އެނބުރި އައުމުގެ މަސައްކަތް ފަށައިފި އެވެ.
ހަތް މެންބަރުން ހިމެނޭ ބީޓީއެސްގެ އެންމެ ދޮށީ މެންބަރަކީ 30 އަހަރުގެ ޖިން އެވެ. ބީޓީއެސްގެ ހުރިހާ މެންބަރުން ވެސް ތަމްރީން ފުރިހަމަކުރުމަށްޓަކައި އަސްކަރިއްޔާއާ ގުޅޭނެ އެވެ.
ދެކުނު ކޮރެއާގެ ގާނޫނުގައި އޮންނަ ގޮތުން، ކޮންމެ ފިރިހެނަކު ވެސް އުމުރުން 28 އަހަރު ފުރުމުން 18 މަސްދުވަހަށް އަސްކަރީ ހިދުމަތް ކުރަން ޖެހެ އެވެ. އެކަމަކު، 2020 ވަނަ އަހަރު އެ ގައުމުގެ މަޖިލީހުން ފާސް ކުރި ބިލެއްގައި ވާގޮތުން، "މަޝްހޫރު ސަގާފަތާއި ފަންނުގައި މޮޅު" ދެކުނު ކޮރެއާ މީހުންނަށް އުމުރުން 30 އަހަރު ވަންދެން އަސްކަރީ ހިދުމަތާ ނުގުޅި ތިބެވޭނެ އެވެ.
ދާއިރާއަށް އެނބުރި އަންނަކަން ޖިން އިއުލާންކުރީ މިދިޔަ ހުކުރު ދުވަހު "ވީވާސް"ގައި އޭނާގެ ފޭނުން ކުރި ސުވާލުތަކަކަށް ދިން ޖަވާބުގަ އެވެ. ޖިން ބުނީ އޭނާގެ އަސްކަރީ ތަމްރީނުގައި އުޅުނު ދުވަސްވަރު ވަރަށް ގިނަ ޕްލޭންތައް ހެދި ކަމަށާއި އެ ޕްލޭންތަކަށް މިހާރު މަސައްކަތް ކުރަން ފަށާފައިވާ ކަމަށެވެ. އަދި އޭނާގެ މަސައްކަތްތައް ފޭނުންނާ ހަމައަށް ގެނެސްދޭން އަދި ކުޑަ ދުވަސްކޮޅެއް ހޭދަވާނެ ކަމަށް ވެސް ބުންޏެވެ.
