އަންހެނެއްގެ ބޮލުގައި ގާބުރިއަކުން ޖެހި ދިވެއްސަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ބުނެފައިވަނީ މި ހާދިސާގެ ރިޕޯޓް ލިބިފައިވަނީ ރޭ ދަންވަރުގެ ވަގުތެއްގައި ގއ.އަތޮޅު ދެކުނުގެ ރަށެއް ކަމަށްވާ ވިލިގިލިއިން ކަމަށެވެ. ފުލުހުން އިތުރަށް ބުނެފައިވަނީ މި ހާދިސާގައި އަނިޔާވެފައިވަނީ އުމުރުން 46 އަހަރުގެ އަންހެނެއް ކަމަށާއި އޭނާއަށް ލިބުނު ޒަހަމްތަކަށް ހޮސްޕިޓަލުގައި ފަރުވާ ދީފައިވާ ކަމަށެވެ. އަދި އަނިޔާލިބުނު މީހާއަށް ފަރުވާ ދިނުމަށްފަހު ދޫކޮށްލާފައިވާ ކަމަށްވެސް ފުލުހުން ބުނެފައި ވެއެވެ.
ފުލުހުން އިތުރަށް ބުނީ މި މައްސަލައާ ގުޅިގެން 32 އަހަރުގެ ފިރިހެނަކު ހައްޔަރުކޮށްފައިވާ ކަމަށާއި މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ. ތުހުމަތު ކުރެވޭ މީހާ އަނިޔާ ކުރި ސަބަބެއް ނޭނގޭ ކަމަށާއި އަނިޔާ ލިބުނު މީހާއާއި ހަމަލާދިން މީހާއާ ދެމެދު އޮތް ގުޅުމުގެ ބާވަތެއް ފުލުހުން ހާމަކޮށްފައެއް ނުވެއެވެ.
ފުވައްމުލަކު ސިޓީގައި ކުރީގެ އަނބިކަނބަލުންނަށް އަނިޔާކުރި މީހަކު އިއްޔެ ފުލުހުން ވަނީ ހައްޔަރުކޮށްފަ އެވެ. އޭނާ ހައްޔަރުކޮށްފައި ވަނީ އެ މީހާ އޭނާގެ ކުރީގެ އަނބިމީހާ ދިރިއުޅެމުން ދިޔަ ގެއަށް ވަދެ މާރާމާރީ ހިންގުމުގެ އިތުރުން އެ ގޭގައި ހުރި ބައެއް މުދަލަށް ގެއްލުން ދީފައިވާ ކަމަށް ބުނެ ސޯޝަލް މީޑިއާގައި ހަބަރުފެތުރެމުންދާ ދަނޑިވަޅެއްގައެވެ.
ކޮމެންޓު ފޮނުވާ