ޖަލުގައި ހުއްޓާ ނިޔާވި ޖަމީލުގެ ހަށުގަޑު ޕޯސްޓްމޯޓަމް ހަދަން އާއިލާގެ ހުއްދަ ނުލިބުމުން، ވަޅުލައިފިއެވެ. އޭނާގެ ހަށިގަޑު ވަޅުލާފައިވަނީ ރޭ ފަތިހު ފަތިސް ނަމާދަށްފަހުއެވެ.
ޖަމީހުގެ ހަށުގަޑުގެ ޕޯސްޓްމޯޓަމް ހެދުމަށް އާއިލާއިން ހުއްދަ ނުދިނީ ކޮން ސަބަބަކާހެދިކަމެއް އަދި ސާފުވެފައެއް ނުވެއެވެ. އެހެންނަމަވެސް އޭނާއަށް އަނިޔާކޮށްފައިވާކަމަށް އާއިލާއިން ތުހުމަތު ކުރެއެވެ.
މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުއްޓާ އިއްޔެ ހެނދުނު ނިޔާވި ށ. ފުނަދޫ ޒަމާނީ ވިލާ މުޙައްމަދު ޖަމީލް (45 އަހަރު) އަށް އަނިޔާ ކޮށްފައިވާކަމަށް ބައެއް ފަރާތްތަކުން ތުހުމަތު ކުރުމާއެކު އޭނާގެ މަރުގެ ފުރިހަމަ ތަހުގީގެއް ހިންގުމަށް އަންގަވާފައިވާކަމަށް ހޯމް މިނިސްޓަރ އަލީ އިހުސާން ރޭވަނީ ވިދާޅުވެފައެވެ.
އިއްޔެ ނިޔާވި ޖަމީލަށް އަނިޔާ ކޮށްފައިވާ ކަމަށް ބައެއް ފަރާތްތަކުން ތުހުމަތު ކުރަމުންދަނީ، އޭނާ ނިޔާވެފައި ވަނިކޮށް މިހާރު ސޯޝަލް މީޑިއާގައި އާންމު ވެފައިވާ ފޮޓޯއަކަށް ނިސްބަތް ކޮށެވެ.
އެ ފޮޓޯއިން އެނގެން ހުންނަ ގޮތުގައި ޖަމީލު މޫނުގެ ބައެއް ތަންތަން ރަތްވެފައި، އަދި ނޫފައިގެންފައި ވާކަމަށް ފެންނަގޮތަށް ސިފަވާން ހުރެއެވެ.
ސޯޝަލް މީޑިއާގައި ދައުރުވަމުންދާ މި ފޮޓޯއާއި ގުޅޭގޮތުން ކަރެކްޝަންސްއިން ބައެއް މީޑިއާތަކަށް މައުލޫމާތު ދެމުން ވިދާޅުވެފައިވަނީ ޖަމީލް ނިޔާވުމާއި ގުޅިގެން މަރުގެ މައުލޫމާތު ފުލުހުންނަށާއި ހިއުމަން ރައިޓްސް ކޮމިޝަނަށް ވަގުތުން ދީފައިވާނެ ކަމުގައެވެ.
މިކަމާއި ގުޅޭގޮތުން އިހުސާން ކުރެއްވި އެކްސް ޕޯސްޓުގައި ވިދާޅުވީ އިއްޔެ އިއްޔެ ހެނދުނު މާފުށީ ޖަލުގައި ގައިދީއަކު މަރުވުމާއި ގުޅޭގޮތުން ދަންނަވާލަން ބޭނުންވަނީ ޖަލުގައި މަރުވާ ކޮންމެ މައްސަލައަކީ އިންޕެކްޓަރ އޮފް ކަރެކްޝަންސްއިން މިނިވަންކަމާއެކު ބަލަމުންދާ މައްސަލައެއް ކަމުގައެވެ.
އަދި ގައިދީއަކު މަރުވުމުގައި ހިމެނޭ ހާލަތާ މެދު ޝައްކު އުފެދިއްޖެ ނަމަ، ހިއުމަން ރައިޓްސް ކޮމިޝަނުން މިނިވަން ތަހުގީގެއް ހިންގާނެ ކަމަށްވެސް އިހުސާން ވިދާޅުވިއެވެ.
އަދި މިމަރާއި ގުޅޭ ފުރިހަމަ ތަހުގީގެއް ހިންގުމަށާއި، އާއިލާގެ ހުއްދައާއެކު ޖަމީލުގެ ހަށިގަނޑުގެ ޕޯސްޓްމޯޓަމް ހެދުމަށްވެސް މިހާރު ފުލުހުންނަށް އަންގަވާފައިވާކަމަށްވެސް އިހުސާން ވިދާޅުވެފައި ވެއެވެ. އިހުސާން ވިދާޅުވެފައިވަނީ ކަރެކްޝަންސްއިން މި މައްސަލައިގެ ތަހުގީގަށް ހުރިހާ އިދާރާތަކަކަށް ފުރިހަމަ އަށް އެއްބާރުލުން ދޭނެ ކަމުގައެވެ
އިހުސާން ވިދާޅުވެފައިވާ ގޮތުގައި ޖަމީލު މަރުވި ސަބަބެއްގެ ގޮތުގައި ޑޮކްޓަރުން ވިދާޅުވެފައިވަނީ "ކާޑިއޯޕަލްމޮނަރީ އެރެސްޓް" (ހިތް ހުއްޓިގެން) ކަމުގައެވެ.
އިތުރަށް އިހުސާންގެ އެކްސް ޕޯސްޓުގައި ވިދާޅުވެފައިވަނީ އެ ގޮޅީގެ ސީސީޓީވީ ފުޓޭޖުން ފެންނަ ގޮތުގައި ގައިދީ އޭނާގެ އެންމެ ފަހު ވަގުތުތަކުގައި ނަމާދުކުރާ ތަން ފެނުނު އިރު، އޭނާގެ ހަށިގަޑު ފެނިފައިވަނީ ސަޖިދައަށް އޮއްވާ ކަމުގައެވެ. އަދި ކަރެކްޝަންސްއިން ސީސީޓީވީ ފުޓޭޖް ހުރިހާ ތަހުގީގީ އިދާރާތަކާ ވެސް ހިއްސާ ކުރާނެ ކަމަށްވެސް އިހުސާން ވިދާޅުވެފައި ވެއެވެ.
ޖަމީލުގެ މަރާއި ގުޅޭގޮތުން ކަރެކްޝަންސްއިން ބުނެފައިވަނީ އޭނާގެ މަރާއި ގުޅުންހުރި ކަންކަން ސާފުވާނީ ކުރެވެމުންދާ ތަހުގީގުތައް ނިމުމުންކަމަށެވެ.
ޖަމީލްގެ މަރާއި ގުޅިގެން ކަރެކްޝަންސްއިން ބުނެފައިވަނީ، މުޙައްމަދު ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ވަނީ ސީޕީއާރް ދީފައި ވާކަމށެވެ. އެހެންނަމަވެސް އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފަށާފައިވާކަމަށްވެސް ކަރެކްޝަންސްއިން ބުނެފައި ވެއެވެ. ކަރެކްޝަންސްއިން ބުނެފައިވަނީ، އެއަށްފަހު 12:45 ގައި ޑޮކްޓަރު ވަނީ މުޙައްމަދު ޖަމީލްގެ ހިތް ހުއްޓިގެން ނިޔާވިކަމަށް ކަނޑައަޅާފައި ކަމުގައެވެ.
މީނާއަކީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ޝަރީޢަތް ނިމެންދެން ބަންދުކޮށްފައި ހުރި މީހެކެވެ. މީނާއަކީ ނަފްސާނީ ބައްޔަކަށް ފަރުވާކުރަމުން އައި މީހެކެވެ.
ކަރެކްޝަންސްއިން ބުނެފައި ވެއެވެ.
މުޙައްމަދު ޖަމީލް ނިޔާވުމާ ގުޅިގެން ވަގުތުން އެކަން އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައި ވާކަމަށްވެސް ކަރެކްޝަންސްއިން ބުނެފައި ވެއެވެ.
