ދައުލަތުގެ ހަރަދު ކުޑަކުރުމުގެ ގޮތުން ރައްޔިތުންގެ މަޖިލިހުގެ މެމްބަރުން ނަމޫނާ ދައްކަވަން ޖެހޭ ކަމަށް މަޖިލިހުގެ އޭދަފުށީ ދާއިރާގެ ޕީއެންސީގެ މެމްބަރު އަހުމަދު ސަލީމް (ރެޑްވޭވް ސަލީމް) މިއަދު ވިދާޅުވެއްޖެއެވެ.
ސަލީމް އެގޮތަށް ވިދާޅުވީ "އެކްސް" ގައި ކުރެއްވި ޕޯސްޓެއްގައެވެ.
ސަލީމް މި ޕޯސްޓް ކުރެއްވީ ރައްޔިތުން މަޖިލީހުގެ މެންބަރުންނާއި މެންބަރުންގެ އާއިލާއަށް އާސިއާން ގައުމުތަކުން ލިބޭ މެޑިކަލް އިންޝްއަރެންސް މެދުކަނޑާލަން ޖެހޭ ކަމަށް އައްޑޫ ހިތަދޫ ދާއިރާގެ މެންބަރު އަހްމަދު އަޒާން ވިދާޅުވި ހަބަރެއްގެ ސްކްރީން ޝޮޓާއެކުގައެވެ.
އަޒާން ވިދާޅުވީ ދައުލަތުގެ މާލީ ހާލަތު ރަނގަޅު ކުރުމަށް ރައީސް ޑރ.މުހައްމަދު މުއިއްޒުގެ ސަރުކާރުން ދަނީ ހަރަދު ކުޑަކުރަމުން ކަމަށާއި މިކަމުގައި ރައްޔިތުންގެ މަޖިލީހުގެ މެމްބަރުންވެސް ނަމޫނާ ދައްކަވަން ޖެހޭ ކަމަށެވެ.
އަދި ރައްޔިތުންގެ މަޖިލީހުގެ މެންބަރުން މިސާލު ދެއްކުމުގެ ގޮތުން ރައްޔިތުންގެ މަޖިލީހުގެ މެމްބަރުންނާއި އާއިލާގެ ބޭފުޅުންނަށް އާސިއާން ޤައުމުތަކުން ލިބެން އޮންނަ މެޑިކަލް އިންޝުއަރެންސް މެދުކަނޑާލަން ޖެހޭ ކަމަށާއި އަދި އާންމު ރައްޔިތުންނަށް ނުލިބޭ މެޑިކަލް އިންޝުއަރެންސެއް ދައުލަތުން ހަރަދުކޮށްގެން މެމްބަރުންނަށް ލިބެން ނުޖެހޭ ކަމަށް ވެސް އަޒާން ވިދާޅުވިއެވެ.
ހެލްތް އިންޝުއަރަންސް ފޯރުކޮށްދޭންޖެހޭ މަޖިލީހުގެ ކޮންމެ މެންބަރަކަށް 24،000ރ. ގެ ޕްރިމިއަމެއް ރައްޔިތުންގެ މަޖިލީހުގެ އިދާރާއިން މިހާރު ވެސް ދައްކައެވެ. މަޖިލީހުގެ ޖުމްލަ 93 މެންބަރުންނަށް އިންޝުއަރެންސް ޕްރިމިއަމްގެ ގޮތުގައި 2.2 މިލިއަން ރުފިޔާ އަހަރަކު ދައްކަން ޖެހެއެވެ.
