އަންނަ މަހު ސިނަމާތަކަށް ގެންނަން ނިންމި ސައުތުގެ މަޝްހޫރު އެކްޓަރު ކަމަލް ހަސަންގެ ފިލްމު "އިންޑިއަން 2″ ގެ ޓްރެއިލާ ދައްކައިލައިފިއެވެ.
އަންނަ މަހުގެ 12 ގައި ސިނަމާތަކަށް ގެންނަން ތާވަލުކޮށްފައި އޮތް މި ފިލްމަކީ މި އަހަރު ވަރަށް ގިނަ ބަޔަކު އިންތިޒާރު ކުރަމުން އަންނަ އެއް ފިލްމެވެ. "އިންޑިއަން 2″ ގެ ޓްރެއިލާ ބެލި ގިނަ ބަޔަކު ފިލްމު ވަރަށް ޝައުގުވެރިވާނެކަމުގެ ކުލަވަރު ބޮޑު ކަމަށާއި މިއީ ބޮކްސް އޮފީހުގައި ބޮޑު ކާމިޔާބީއެއް ވެސް ހޯދާނެ ފިލްމެއް ކަމަށް ބުނެފައިވެ އެވެ.
"އިންޑިއަން 2″ އަކީ ކަމަލް ހަސަނާއި ބޮލީވުޑްގެ ދެ ބަތަލާއިން ކަމަށްވާ މަނީޝާ ކޮއިރަލ އާއި އުރްމިލާ މަޓޯންޑްކަރާ އެކު އިންޑިއާގެ ސައުތުގެ ކުޅަދާނަ ޑައިރެކްޓަރު ޝަންކަރު 1996 ގައި ގެނެސްދިން ފިލްމުގެ ދެވަނަ ބައެވެ.
"އިންޑިއަން 2″ އަކީ ވަރަށް ބޮޑަށް ދިގުލައިގެން ގޮސްފައިވާ ފިލްމެކެވެ. ފިލްމުގެ ފުރަތަމަ ބައި ގެނެސްދިންތާ 28 އަހަރު ފަހުން "އިންޑިއަން 2″ ގެނެސްދޭ އިރު، މި ފިލްމުގެ ބަތަލާއިންނަކީ ރަކުލް ޕްރީތު ސިންގް އާއި ކާޖަލް އަގަރްވާލެވެ.
"އިންޑިއަން 2″ އާ އެކު ކަމަލް ހަސަން، 65، އެކްޓިން ކެރިއަރު ނިންމައިލާނެކަން އޭނާ ވަނީ އިއުލާން ކޮށްފައިއެވެ. އެކަން އޭނާ އިއުލާން ކުރީ ދިގުލައިގެން ދިއަ މި ފިލްމް އިއުލާން ކުރިތަނާ ކަހަލަ ގޮތަކަށް 2018 ގެ ފަހުކޮޅު އެވެ. އަދި އޭނާ ވަނީ އެ އަހަރު ރަސްމީކޮށް ސިޔާސީ ދާއިރާ އަށް ވެސް ނުކުމެފަ އެވެ.
