"އެޑްވާންސްޑް އެކްސްޕްލޯސިވް އޯޑްނަންސް ޑިސްޕޯސަލް (އީއޯޑީ) ކޯސް" ގެ ދަސްވެނިވުމުގެ ރަސްމިއްޔާތު ބާއްވައިފިއެވެ.
މިކަމަށް ޓަކައި ޖޫން 24 ވަނަ ދުވަހު، ދިވެހިރާއްޖޭގެ ޤައުމީ ދިފާޢީ ބާރުގެ ހެޑްކުއޯޓަރޒް، ބަންޑާރަކޮށީގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޘްއެވެ. މި ރަސްމިއްޔާތުގައި ސްރީލަންކާ އަރމީ ޗީފް އޮފް ފީލްޑް އިންޖިނިއަރ، މޭޖަރ ޖެނެރަލް ޕީޕީއޭ ޕެރޭރާއާއި އިންޖިނިއަރސްގެ ހެޑް އޮފް ޓްރެއިނިންގ، ލެފްޓިނެންޓް ކާނަލް ޗަމިކަ ޖާގޮޑަގެ އިތުރުން ކޯހުގެ އިންސްޓްރަކްޓަރުން ބައިވެރިވެލެއްވިއެވެ.
އެއް މަސް ދުވަހުގެ މުއްދަތަށް އެމްއެންޑީއެފް ސަދަން އޭރިއާ ކޮމާންޑުގައި ކުރިއަށް ގެންދިޔަ މި ކޯހުގެ އޮނަރ ގްރެޖުއޭޓް އެވޯޑް ހާސިލުކޮށްފައިވަނީ ޕްރައިވެޓް ޙުސައިން ޒަޔާން (ސ.ނ 8322) އެވެ. މި ކޯހުގެ ސެކަންޑް އިން މެރިޓް ލާންސް ކޯޕްރަލް މުޙައްމަދު ޝާވިން (ސ.ނ 8327) ހޯދާފައިވާއިރު، ކޯހުގެ ތާޑް އިން މެރިޓް ހޯދާފައިވަނީ ޕްރައިވެޓް ޝަހުދާ އަބޫބަކުރު (ސ.ނ 8714) އެވެ. ކޯހުގެ ބެސްޓް އައިއީޑީއަކަށް ހޮވިފައި ވަނީ ލާންސް ކޯޕްރަލް ޒަޔާން ޒަކަރިއްޔާ (ސ.ނ 8153) އެވެ. އެ ފަރާތްތަކަށް ހަނދާނީ ފިލާއާއި ހަނދާނީ ލިޔުން ހަވާލުކޮށްދެއްވީ ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޘްއެވެ. އަދި ކޯސް ފުރިހަމަ ކުރި ސިފައިންނަށް ސެޓްފިކެޓާއި، އެޑްވާންސްޑް އީއޯޑީ ކޯހުގެ ބެޖު ހަވާލުކޮށްދެއްވީ ސްރީލަންކާ އަރމީ ޗީފް އޮފް ފީލްޑް އިންޖިނިއަރ، މޭޖަރ ޖެނެރަލް ޕީޕީއޭ ޕެރޭރާއެވެ.
މި ރަސްމިއްޔާތު ނިމިގެން ދިޔައީ، ކޯހުގެ ބައިވެރިން ހުށަހަޅައިދިން ޑެމޮންސްޓްރޭޝަނަކުންނެވެ. މި ކޯހުގައި ޖުމްލަ 27 ސިފައިން ބައިވެރިވިއިރު، އޭގެ ތެރޭގައި ހަތަރު އަންހެން ސިފައިން ވެސް ބައިވެރިވިއެވެ. ކޯހުގެ އިންސްޓްރަކްޓަރުންގެ ގޮތުގައި މަސައްކަތްކުރެއްވީ އެ ދާއިރާގެ ތަޖުރިބާ ލިބިފައިވާ ސްރީލަންކާ އަރމީ އިންޖިނިއަރސްގެ އިންސްޓްރަކްޓަރުންނެވެ.
އެޑްވާންސް އީއޯޑީ ކޯހަކީ، އެމްކިޔުއޭ ލެވެލް 3ގެ ފެންވަރު ކޯހެކެވެ. މި ކޯހުގައި ކޮންވެންޝަނަލް އެމިޔުނިޝަން ޑިސްޕޯސަލްއާއި، އެކްސްޕްލޯސިވް އޯޑްނަންސް ޑިސްޕޯސަލްއާއި، އެކިކަހަލަ ނުރައްކާތެރި ހަޒާޑަސް އެއްްޗެހި ރަައްކާތެރިގޮތުގައި ނައްތާލުމާއި، އެކިކަަހަލަ ނުރައްކާތެރި ތަކެތި ދެނެގަނެ ރައްކާތެރި ތަނެއްގެ ގޮތުގައި ދެމެހެއްޓުމުގެ ޢިލްމާއި ހިލްމު އެޑްވާންސް ފެންވަރަށް އުނގަންނައި ދީފައިވެއެވެ.
މި ކޯސް ނިންމުމުގެ ރަސްމިއްޔާތުގައި، އެމްއެންޑީއެފްގެ ބައެއް ޖެނެރަލް އޮފިސަރުންނާއި ސާޖަންޓް މޭޖަރ އޮފް އެމްއެންޑިީއެފް އަދުނާނު ޢަލީގެ އިތުރުން ކޯހުގެ މުދައްރިބުންނާއި ދަރިވަރުން ބައިވެރިވެލެއްވިއެވެ.
