ފާއިތުވި ރިޔާސީ އިންތިޚާބުގައި ވާދަކުރުމުގެ ފުރުސަތު ކުރީގެ ރައީސް ޔާމިނަށް ލިބިވަޑައިނުގެންފި ނަމަ ޕީޕީއެމްއިން އެހެން ފަރާތަކަށް ވެރިކަމަށް ކުރިމަތިލުމުގެ ފުރުސަތު ޔާމިން ނުދެއްވާނެކަން މާކުރިންވެސް އެނގޭ ކަމަށާއި، އެކަމަކަށް މާކުރިއްސުވެސް ތައްޔާރުވަމުން ދިޔަ ކަމުގައި ޕީއެންސީގެ ޗެއަރމަން އަދި ރައްޔިތުންގެ މަޖިލިހުގެ ރައީސް އަބުދުއްރަހީމް ވިދާޅުވެއްޖެއެވެ.
ޕީއެންސީން އަލަށް ހުޅުވި އެ ޕާޓީގެ ޖަގަހައިގައި ރޭ ވާހަކަ ދައްކަވަމުން އަބުދުއްރަހީމް ވިދާޅުވީ، މާކުރިއްސުރެ ރާވައިގެން ރައީސް މުއިއްޒުއަށް ޓިކެޓް ދިނުމަށް އޭނާ މަސައްކަތް ކުރިކަމަށް ބައެއް ފަރާތްތަކުން ބުނަމުންދާ ކަމަށާއި، އެއީ ހަގީގަތެއް ކަމުގައެވެ. އަބުދުއްރަހީމް ވިދާޅުވީ މާކުރިއްސުރެ އެކަމަށް ރާވަން ޖެހުނީ އޭނާއަށް ރައީސް ޔާމިން އެނގޭތީ ކަމަށާއި، އެކަމަށް ރާވަމުން ދިޔައީ 30 އަހަރުގެ ތަޖުރިބާއާއެކު ކަމަށެވެ.
30 އަހަރުގެ ތަޖުރިބާއާއެކީ އަޅުގަޑު ވިސްނަމުން ގެންދިޔައީ އަޅުގަޑުމެންގެ ޕާޓީ މަގުމަތިވިޔަ ނުދޭން. ރައްޔިތުން ބިކަވިޔަ ނުދޭން. މިގައުމުގެ މިނިވަންކަން ގެއްލިގެންދިޔަ ނުދޭން. އަމާން ވެއްޓެއް ގާއިމް ކުރަން. ރައްޔިތުންނަށް އުފާވެރި މުސްތަގުބަލެއް ހޯދާދޭން… އަޅުގަޑަށް އެނގޭ ޕްލޭން އޭ ހަދާފަ ބީ ހަދާފަ ސީ ހަދާފަ ފޮނުވިއިރުވެސް އެމަނިކުފާނުގެ އެއްބަސްވުމެއްގަ އެމަނިކުފާނުގެ ރުހުމުގަ އަޅުގަޑުމެންނަށް ރިޔާސީ އިންތިޚާބުގަ ވާދަ ނުކުރެވޭނެކަން. އެހެންވެގެންނޭ އެދުވަހު 9 ޖެހިއިރު ގޮސް ފޯމު ވެއްދީ. ފޯމު ވެއްދީ ދެވަނަ މީހަކަށް އެ ފޯމުވައްދާނެ ޖާގަ ނުދޭން ވެގެން.
އަބުދުއްރަހީމް ވިދާޅުވިއެވެ.
އަބުދުއްރަހީމް ވިދާޅުވީ އެ ފޯމު ވައްދާހިތުން ދެއްކި ވާހަކައާއި، ފޯމު ވައްދާހިތުން ތެޅިފޮޅުނު މީހުންނާއި، ފޯނު ކޯލުން ލިބުނު ޖަވާބާއެކީ "ގާގަޑެއްގެ މަތީ" އިށިން އިށީނުމާއި، އެ ހުރިހާ މަންޒަރެއްވެސް އެބަހުރިކަމުގައެވެ.
އަބުދުއްރަހީމް ވިދާޅުވީ އެއްވެސް ވާހަކައެއް ދައްކަން ނުކެރިގެން ނުތިބޭނެކަމަށާއި، ތިލަކުރަން ވީމަ އެނޫންވާހަކަތައްވެސް ތިކޮށްދޭނެ ކަމުގައެވެ.
