މި އަހަރު ހައްޖުގެ އަޅުކަން އަދާކުރުމަށް ރާއްޖެ އިން ފުރި ދިވެހި ހައްޖުވެރިން މާދަމާ ރާއްޖެ އަންނަން ފަށާނެ ކަމަށް އިސްލާމިކް މިނިސްޓްރީން ބުނެފިއެވެ.
މިފަހަރު ހައްޖުގެ އަޅުކަން އަދާކުރުމަށް ރާއްޖެ އިން 1،150 ހައްޖުވެރިން ދިޔައެވެ. އެކަމަކު، އެ ތަނުން އެއް ހައްޖުވެރިއަކު ވަނީ ހައްޖުގެ އަޅުކަން ނުފެށެނީސް ނިޔާވެފައެވެ. ނިޔާވެފައިވަނީ އުމުރުން ދުވަސްވީ ދިވެހި އަންހެނެކެވެ.
އިސްލާމިކް މިނިސްޓްރީން ބުނީ މި އަހަރު ރާއްޖެއިން ހައްޖަށް ދިވެހި ހައްޖުވެރިން ހައްޖުގެ އަޅުކަން ފުރިހަމަކުރުމަށްފަހު މިހާރު ފުރުމަށް ތައްޔާރުވެފައިވާ ކަަމަށެވެ.
އެގޮތުން ހައްޖުވެރިންގެ ފުރަތަމަ ގްރޫޕް މާދަމާ އަންނައިރު، ދެވަނަ ގްރޫޕް އަންނާނީ އަންނަ ހުކުރު ދުވަހުއެވެ. އަދި ތިން ވަނަ ގްރޫޕް އަންނަ މަހުގެ 1 ވަނަ ދުވަހު އޮންނަ އިރު، ފަހު ގްރޫޕް އަންނާނީ އަންނަ މަހުގެ ހަތަރެއްގައެވެ.
މިފަހަރު ހުރިހާ ހައްޖުވެރިން ވެސް ހައްޖަށް ދިޔައީ ހައްޖު ކޯޕަރޭޝަންގެ ހަވާލުގައެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މިފަހަރު ހައްޖުގައި ދިވެހި ހައްޖުވެރިންނަށް ފެންވަރު ރަނގަޅު ދިވެހި ރަހަތަކާއެކު ކާނާ ފޯރުކޮށްދެއްވުނު ކަމަށާއި ބަލި މީހުންނަށް އެންމެ މަތީ ދަރަޖައިގައި އެހީތެރިކަން ފޯރުކޮށްދެވުނު ކަމަށެވެ.
އޭގެއިތުރުން ޑައިލަސިސް ހަދާ މީހުންނަށާއި ކެންސަރަށް ފަރުވާ ހޯދާ ބައެއް މީހުންނާއި، ހިތުގެ ބަލި ހުންނަ ބައެއް މީހުން ހާޖީންގެ ތެރޭގައި ތިބިއިރު އެންމެނަށް އޯގާތެރިކަން ފޯރުކޮށްދެވުނު ކަމަށް ވިދާޅުވިއެވެ. އަދި އެޑްމިޓްކުރެވުނު ފަރާތްތަކަށް މަތީ ދަރަޖައިގައި އެހީ ފޯރުކޮށްދެއްވުނު ކަމަށް އޭނާ ވިދާޅުވިއެވެ.
ޝަހީމް ވިދާޅުވީ، މަގު އޮޅުނު 100 އެއްހާ ހާޖީން ސްމާޓް ޓެގް ޑިވައިސްގެ އެހީގައި ހުރި ތަނެއް ބަލައިގެން ހޯދި ކަމަށާއި ޢަރަފާތަށް ނުވަދެވޭ އެކަކު ވެސް ނެތް ކަމަށެވެ. ހައްޖުގެ އަޅުކަމުގައި ރަނގަޅު ކުރަން ޖެހޭ ކަންތައްތައް އަދިވެސް ހުރި ކަން ފާހަގަ ކުރައްވައި ޝަހީމް ވިދާޅުވީ އަންނަ އަހަރު އެކަންކަން ރަނގަޅު ކުރާނެ ކަމަށެވެ.
