ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 3650 ފަތުރުވެރިން ޒިޔާރަތްކުރެއެވެ. އެހެންކަމުން މި އަދަދަށް މިމަހުގެ ކުރިއަށް އޮތް ދުވަސްތަކުގައިވެސް ފަތުރުވެރިން ރާއްޖެއަށް އަންނަ ނަމަ، މިމަހުގެ 28 ނޫނީ 29 ހިސާބު ރާއްޖެއަށް 1 މިލިއަން ވަނަ ފަތުރުވެރިޔާ ޒިޔާރަތްކުރާނެކަމަށް ލަފާކުރެއެވެ.

ފަތުރުވެރިކަމާބެހޭ ވަޒީރު އިބުރާހިމް ފައިސަލް ވިދާޅުވެފައިވަނީ، މިއަހަރު ރާއްޖެ އަންނަ 1 މިލިއަންވަނަ ފަތުރުވެރިޔާ މިމަހު ފަހުކޮޅު ރާއްޖެ އަންނާނެ ކަމަށް އުއްމީދުކުރެވޭ ކަމުގައެވެ.

ޕީއެސްއެމް ނިއުސްއަށް ދެއްވި ޚާއްޞަ އިންޓަރވިއުއެއްގައި ފައިސަލް ވިދާޅުވީ އެކަން ވަރަށް ބޮޑު ސެލެބްރޭޓް ކުރާނެކަމަށާއި، މިއަހަރު ނިމޭއިރު މިއަހަރުގެ އަމާޒު ކަމުގައިވާ 2 މިލިއަން ފަތުރުވެރިންނާއި ހަމައަށް ވާސިލް ވެވޭނެ ކަމަށެވެ.

އެގޮތުން އޭނާ ވިދާޅުވީ މިއަހަރު ނިމޭއިރު 2.1 މިލިއަން ފަތުރުވެރިން ރާއްޖެ ޒިޔާރަތް ކުރާނެކަމަށެވެ. އަދި އެ އަދަދު 2.2 މިލިއަނާއި ހަމައަށްވެސް ހިގައިދާނެކަމަށް އޭނާ ވިދާޅުވިއެވެ.

އުއްމީދު ކުރަނީ މިމަހުގެ ކޮޅު 1 މިލިއަން ވަނަ ފަތުރުވެރިޔާ އަންނާނެ ކަމަށް، އެކަން ވަރަށް ބޮޑަށް ސެލިބްރޭޓުކުރާނަން ވަރަށް ގަދައަށް، އަހަރު ނިންމާލާނީ ޓޭގެޓުކުރި އަދަދު ހާސިލްކޮށް، 2 މިލިއަން ފަތުރުވެރިންނާއި އެކު، އުއްމީދު ބޮޑު 2.1 މިލިއަން ނޫނީ 2.2 މިލިއަން އަށް އަރައިވަލްސް ހިނގައިދާނެކަމަށް.

ވަޒީރު ފައިސަލް ވިދާޅުވިއެވެ.