އދ.ގެ ހިއުމަން ރައިޓްސް ކައުންސިލްގެ 56 ވަނަ ސެޝަން މިއަދު ސްވިޒަލޭންޑްގެ ޖެނީވާގައި ފަށައިފިއެވެ. މި ސެޝަން އޮންނާނީ 18 ޖޫން އިން 12 ޖުލައި 2024 ގެ ނިޔަލަށެވެ.
ސަރުކާރުގެ މައިގަނޑު ސިޔާސަތުތަކާއި އިސްކަންދޭ ގޮތުގެ މަތިން ރާއްޖޭގެ ވަފުދުން އެޖެންޑާގެ ގިނަ އައިޓަމްތަކެއްގެ ދަށުން ގައުމީ ބަޔާންތައް ދިނުމަށް ވަނީ ހަމަޖެހިފައެވެ.
އެހެންކަމުން ޖެނީވާގައި ހުންނަ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް)ގެ ގްރޫޕެއްގެ ފަރާތުން މޫސުމަށް އަންނަ ބަދަލުތަކުގެ ނޭދެވޭ އަސަރުތަކާއި ޓެކްނިކަލް އެސިސްޓެންސް އެންޑް ކެޕޭސިޓީ ބިލްޑިންގެ އަހަރީ ޕެނަލްގެ ޖޮއިންޓް ސްޓޭޓްމަންޓެއް ރާއްޖެއިން ދޭނެ އެވެ.
މީގެ އިތުރުން، ވިމެން އިން ޑިޕްލޮމަސީ އެންޑް މަލްޓިލޭޓަރަލިޒަމްގެ ކޯރ ގްރޫޕްގެ ދަށުން އިންކްލޫސިވް މަލްޓިލޭޓަރަލް ސިސްޓަމަކަށް އަންހެނުންގެ ހަމަހަމަ ބައިވެރިވުމާ ބެހޭގޮތުން ރާއްޖެއިން ޖޮއިންޓް ސްޓޭޓްމަންޓަކާއި، ކްރޮސް ރީޖަނަލް ކޯރ ގްރޫޕަކާ ގުޅިގެން ފަނޑިޔާރުންނާއި ވަކީލުންގެ މިނިވަންކަމާ ބެހޭ ޤަރާރެއް ހުށަހަޅަން ވަނީ ހަމަޖެހިފައެވެ.
ހިއުމަން ރައިޓްސް ކައުންސިލްގެ 56 ވަނަ ސެޝަންގައި ބައިވެރިވާ ރާއްޖޭގެ ވަފުދުގައި އިސްކޮށް ހުންނެވީ ސަފީރު ޑރ.ސަލްމާ ރަޝީދެވެ. މި ވަފުދުގައި ހިމެނިވަޑައިގަންނަވަނީ އދ.ގެ އޮފީސްތަކަށް ރާއްޖެއިން ކަނޑައަޅާފައި ހުންނަ ދާއިމީ މިޝަންގެ ކައުންސެލަރ އާދަމް ހާމިދާއި ކައުންސެލަރ އަލްއުސްތާޛާ އާމިނަތު ޝިފާޔާ އިބުރާހިމްއާއި، ސެކަންޑް ސެކެޓްރީ މަރިޔަމް ފާތިކާ ފަޔާޒުއާއި ސެކަންޑް ސެކެޓްރީ އައިޝަތު ރިފްގާއާއި، އެޓާޗޭ ރާއިދު ސައީދުއެވެ.
